Neke ki te tumu manako rikiriki

Neke ki te ngai o te au tumu tuatua

 APII 7

E Maromaroa Ana Rai Koe e te Mataku?

E Maromaroa Ana Rai Koe e te Mataku?

Akara ana ra i te tamaiti meangiti i roto i te tutu. Akara anga maromaroa tikai aia e te mataku, me kare ainei? E akapera ana rai koe?— Tetai au taime, mei tera rai tetai aronga. Te tuatua ra te Pipiria no runga i tetai au oa o Iehova tei maromaroa katoa ana e te mataku. Ko Elia tetai ia ratou. Ka apii taua no runga iaia ine.

Kua inangaro a Iezebela i te tamate ia Elia

E noo ana a Elia i te enua Iseraela i te tuatau mua, i mua ake i te anau mai anga a Iesu. Ko Ahaba te ariki o Iseraela, kare aia e akamori ana i te Atua mou ko Iehova. E akamori ana a Ahaba e tana vaine ko Iezebela i te atua pikikaa ko Baala. No reira kua akamata katoa te maataanga o te iti tangata Iseraela i te akamori ia Baala. E ariki vaine kino tikai a Iezebela. Inangaro aia i te tamate i te au tangata pouroa e akamori ra ia Iehova. Ko Elia tetai ia ratou! Kua kite koe eaa ta Elia i rave?—

Kua oro a Elia ki tetai ngai ke! Aere aia ki tetai ngai mamao i roto i te metepara, e kua  pipini ki roto i tetai ana. Eaa ra toou manako i akapera ai aia?— Ae, kua mataku oki aia. Inara kare e tumu tau no Elia kia mataku. No teaa ra? No te mea kua kite ke ana aia e ka tauturu mai a Iehova iaia. Kua akaari ana a Iehova i tona mana kia Elia i mua ana. I tetai tuatau kua pau a Iehova i te pure a Elia. Kua tuku mai aia i te ai mei runga i te rangi. No reira, papu e ka tauturu mai rai a Iehova ia Elia i teia taime!

Akapeea a Iehova i te tauturu anga ia Elia?

Ia Elia i roto i te ana, kua tuatua mai a Iehova kiaia e kua ui mai e: ‘Eaa taau angaanga i konei?’ Pau atu a Elia e: ‘Ko au anake rai te tangata e akamori nei ia koe. Ko au ua e kare atu, e te mataku nei au e ka tamateia au.’ Kua manako a Elia e kua tamate pouroaia te au tangata akamori o Iehova. Inara kua akakite a Iehova kia Elia e: ‘Kare, kare tera i te tika. E 7,000 tangata e akamori nei rai iaku. Auraka e mataku. E maata taku angaanga naau! Toou manako e kua rekareka a Elia i tona akarongo anga i tera?—

Eaa ra taau apiianga ka mou mai no runga i tei tupu kia Elia?— Kare roa e tumu tau kia maromaroa koe, e kia mataku. E maata toou au oa tei inangaro ia Iehova e tei inangaro ia koe. E mana maata katoa to Iehova e ka tauturu ua rai aia ia koe! Te rekareka ra koe te kite e kare ko koe anake ua?—

TATAU I ROTO I TAAU PIPIRIA