Neke ki te tumu manako rikiriki

Neke ki te ngai o te au tumu tuatua

 APII 6

Kare a Davida i Mataku Ana

Kare a Davida i Mataku Ana

Eaa taau e rave ana me mataku koe?— Penei ka aere koe ki ko i toou mami e toou tati kia tauturu mai ia koe. Inara e Atua tetai te ka rauka i te tauturu mai ia koe. E ririnui roa atu aia i tetai ua atu tangata. Kua kite koe e koai aia?— Ae, ko Iehova tona ingoa. Ka tuatua ana ra oki tatou i tetai mapu tane i roto i te Pipiria. Ko Davida tona ingoa. Kua kite aia e ka tauturu ua rai a Iehova iaia. No reira kare roa aia e mataku ana.

Mei te pepe mai anga o Davida, kua apii tona nga metua iaia kia inangaro ia Iehova. Kua tauturu teia ia Davida kia kore e mataku noatu me tupu tetai apinga kino kiaia. Kua kite aia e ko Iehova tona Oa, e ka tauturu mai Aia iaia. Tetai ra, te akono ra a Davida i tana mamoe. Kua aere mai tetai riona maatamaata e kua opu i tetai mamoe ki roto i tona vaa! Kua kite koe eaa ta Davida i rave? Kua arumaki aia i te riona e oti, kua ta aia i te reira ki tona nga rima! E i te aere mai anga tetai pea i te kai i te mamoe, kua ta katoa a Davida i te reira kia mate! I toou manako, naai i tauturu ia Davida?— Ae, na Iehova.

E taime ke mai rai tetai, kare roa a Davida i mataku ana. Te tamaki ra te tamariki Iseraela i tetai iti tangata tei karangaia e ko te Philiseti. Tetai vaeau o ratou e aka tangata roroa, e tuputupua aia! Ko Golia tona ingoa. Te aviri maira teia tuputupua i te au vaeau Iseraela, e ia Iehova. Tatiaeae mai a Golia i te au vaeau kia tamaki atu iaia. Inara e aka mataku tikai to te au vaeau Iseraela i te tamaki atu iaia. Te akarongo anga a Davida i te reira, akakite aia kia Golia e: ‘Naku e tamaki atu ia koe! Ka tauturu mai a Iehova iaku, e naku koe e tamate!’ Toou manako e, e tu mataku kore rai to Davida?— Ae, e tamaiti mataku kore aia. Ka inangaro koe kia kite e eaa tei tupu mai?

Kua rave mai a Davida i tana maka, e te au toka e rima, e kua aere atu i te tamaki i te tuputupua. Te kite mai anga a Golia e e tamaiti mapu ua rai a Davida, aviri mai aia ia Davida. Inara akakite atu a Davida kiaia e: ‘Te aere mai nei koe kiaku ma te koke, te aere atu nei ra au ma te ingoa o Iehova!’ I reira kua tuku aia i tetai toka ki roto i tana maka, oro atu aia ki ko ia Golia e kua pei tika atu i te reira ki runga iaia. Tano meitaki te toka ki rotopu tikai i tona nga mata! Inga te tuputupua  ki runga i te one, e kua mate takiri! Mataku tikai te au tangata Philiseti e kua orooro pouroa ratou. Akapeea ra i rauka ai i tetai tamaiti mapu mei ia Davida i te ta i teia tuputupua?— Na Iehova i tauturu iaia. E ririnui roa atu oki a Iehova i tera tuputupua!

Kare a Davida i mataku ana no te mea kua kite aia e ka tauturu mai a Iehova iaia

Eaa ra te apiianga ka mou mai ia koe mei te tua o Davida?— E ririnui roa atu a Iehova i tetai ua atu tangata. E e Oa aia noou. No reira a tetai taime me mataku koe, akamaara e ka rauka ia Iehova i te tauturu ia koe kia kore e mataku!

TATAU I ROTO I TAAU PIPIRIA