Neke ki te tumu manako rikiriki

Neke ki te ngai o te au tumu tuatua

 TUMU MANAKO I TE KAPI MUA | KOAI MA TE AU KITE O IEHOVA?

Eaa ta te Au Kite o Iehova e Irinaki Ra?

Eaa ta te Au Kite o Iehova e Irinaki Ra?

Irinaki te Au Kite o Iehova e “te au tuatua tapu katoa i tataia ra, e mea akauruia mai e te Atua, e e mea meitaki.” (2 Timoteo 3:16) Te taangaanga nei matou i te Pipiria ei aratakianga tau no te apii no runga i Tei Anga mai e kia noo i te au oraanga meitaki.

Te karanga ra te Pipiria: “Kia kite ratou e, ko Iehova toou ingoa, e ko koe anake Tei Teitei i te enua katoa nei.” (Salamo 83:18) No reira, e akamori anake ua ana matou i te Atua ko Iehova, ei Au Kite nona, ka tauta matou i te akakitekite i tona ingoa.​—Isaia 43:10-12.

Ei au Kerititiano, te irinaki ra matou ia Iesu, “ko te Tamaiti teia na te Atua,” * tei aere mai ki te enua nei e kua riro mai ko te Mesia. (Ioane 1:34, 41; 4:25, 26) I muri ake i tona mate, kua akatuia mai a Iesu ki te rangi. (1 Korinetia 15:3, 4) I muri akera kua riro mai aia ei Ariki no te Patireia o te Atua. (Apokalupo 11:15) Teia Patireia e kavamani tikai te reira te ka akaoki mai i te Parataito ki te enua nei. (Daniela 2:44) “Kareka te aronga maru ra, ka noo ïa i te enua, e ka rekareka ratou i te maata o te au ra,” i karanga ai te Pipiria.​—Salamo 37:11, 29.

“Me tatau ratou i te Pipiria, irinaki ratou e te tuatua ra te Atua kia ratou. Me tupu ake te au manamanata i to ratou oraanga, ka rave mai ratou i te Tuatua na te Atua e ka kimi i te pauanga. . . . Kia ratou e mea ora te Tuatua na te Atua.”​—Orometua Katorika ko Benjamin Cherayath, Nutipepa Münsterländische Volkszeitung, i Tiamani

Te irinaki ra te Au Kite o Iehova e ka puapingaia te tangata i teia tuatau mei te au kaveinga Pipiria. (Isaia 48:17, 18) No reira, ka aru vaitata matou i te reira au kaveinga. Ei akaraanga, no te mea te akamatakite maira te Pipiria ia tatou kia kopae i te au peu te ka akataero i to tatou au manako e te kopapa, no reira kare matou e kai avaava ana e kare e kai i te apinga akakona. (2 Korinetia 7:1) Ka kopae katoa matou i te au peu te akaapaia ra i roto i te Pipiria, mei te konā kava, te ainga tau kore, e te keikeia.​—1 Korinetia 6:9-11.

^ para. 5 Te akataka katoa ra te Pipiria ia Iesu ei “Tamaiti anau tai a te Atua,” no te mea koia te momua tei angaia e Iehova.​—Ioane 3:18; Kolosa 1:13-15.