Penei kare atu e angaanga e akataka mai ia matou mari ra ko ta matou angaanga tutu aere​—mei tera are ki tera are, i te ngai tangata, e te au ngai ravarai ka kitea te tangata. Eaa ra matou i rave ei i teia?

E tutu aere ana te Au Kite o Iehova kia akakaka i te Atua e kia akakitekite i tona ingoa. (Ebera 13:15) Ka inangaro katoa matou i te akarongo kia Iesu Karaiti, tei akaue mai e: “E teianei, ka aere kotou, e akariro i to te pa enua katoa ei pipi; . . . Ma te apii atu ia ratou, kia akono i te au mea katoa taku i akaue atu kia kotou.”​—Mataio 28:19, 20.

Tetai katoa, inangaro matou i to matou tangata tupu. (Mataio 22:39) E tika, kua kite matou e e akonoanga rai ta te maata anga o te tangata e kare te katoa anga e inangaro i te akarongo i ta matou karere. Noatu ra, te irinaki nei matou e ka riro te au apiianga Pipiria ei akaora i te tangata. Ko te tumu teia “te apii anga atu e te tuatua anga atu ia Iesu Mesia,” mei te au Kerititiano rai i te anere mataiti mua.​—Angaanga 5:41, 42.

Te maata anga o te aronga tei tatau i ta matou puka, kare ratou i te Au Kite o Iehova. E mirioni ua atu te apii ra i te Pipiria kia matou, no roto mai i te au akonoanga ke ke. Noatu ra, te rekareka nei ratou e te atoro maira te Au Kite o Iehova ia ratou.

E tika, penei e au uianga ke taau no runga i te Au Kite o Iehova. Te pati nei matou ia koe kia kimi i te au pauanga na te

• Ui anga ki tetai o te Au Kite o Iehova.

• Aere anga ki runga i ta matou website, www.jw.org.

• Aere anga ki ta matou au uipaanga, kare e koʼi moni e e turou mai te katoatoa.