Neke ki te tumu manako rikiriki

Neke ki te ngai o te au tumu tuatua

 TUMU MANAKO I TE KAPI MUA

Koai ma te Au Kite o Iehova?

Koai ma te Au Kite o Iehova?

“E roa toku kite anga ia Mike. Koia tetai o te Au Kite o Iehova. Inara e umere ua ana au i tana akonoanga. Koai a Iehova? Eaa te tumu kare te Au Kite e akono i te au orote? Te piri ra ainei a Mike ki tetai akonoanga kino?”​—Becky, California, Marike.

“Te akamata anga te aronga i toku ngai i te apii i te Pipiria ki te Au Kite o Iehova, e manako ana au e eaa te aiteanga o te reira ingoa? Tuke rai te ingoa o tera akonoanga!”​—Zenon, Ontario, Kanata.

“Kua manako maua ko taku vaine e te atoro maira te Au Kite o Iehova i te akakeu ia maua kia manako kino no te mea kare maua i aere pure ana. Kua kite maua e mei te mea kare e apinga e kitea i roto i te au akonoanga tumu, kare katoa e kiteaia i roto i tetai akonoanga tuke ua ake rai mei te Au Kite o Iehova.”​—Kent, Washington, Marike.

“Kare tikai au i kite e koai ratou e eaa ta ratou i irinaki.”​—Cecilie, Esbjerg, Denmark.

Penei i kite ana koe ia ratou e tutu aere ra mei tera are ki tera are, i te ngai tangata, te tuʼa tuʼa anga i te au puka Pipiria e te oronga anga i te au apii Pipiria kare e tutaki. Penei kua oake mai tetai ia ratou i teia makatini kia koe. Noatu ra, ka manako koe e koai tikai te Au Kite o Iehova. Penei e aiteite toou manako ki tei taikuia i runga ake nei.

Me e au uianga taau e te manako mei teia rai, ka kimi koe i te pauanga kiea? Akapeea koe e kite ei eaa tikai ta te Au Kite o Iehova e irinaki ra, akapeea ta ratou angaanga tutu aere e te au ngai akamorianga te tutakiia anga, e eaa te tumu i atoro ei ratou ia koe i toou kainga e i aravei atu ia koe i te ngai tangata?

“E maata te au mea taku i tatau no runga i te Au Kite o Iehova i runga i te Initaneti,” i karanga ai a Cecilie i taikuia i te akamata anga. “Kua rongo ana au i te au koumuumu anga e te au tuatua papaki tai no runga ia ratou. Tei tupu, kua manako tau kore au no runga i te Au Kite o Iehova.” Inara i muri mai, kua tuatua au ki te Au Kite o Iehova e kua mareka au i te au pauanga ki taku au uianga.

Ka inangaro ainei koe i te kite i te au pauanga tika ki taau uianga no runga i te Au Kite o Iehova? Te akamaroiroi atu nei matou kia aere koe ki te ngai tikai e rauka mai ei te pauanga koia oki te Au Kite o Iehova, tei nenei i teia makatini. (Maseli 14:15) Te manakonako nei matou e ka tauturu te au atikara ka aru mai kia kite koe e koai matou, eaa ta matou i irinaki e kia mārama katoa koe i te angaanga ta matou e rave ra.