Neke ki te tumu manako rikiriki

Neke ki te ngai o te au tumu tuatua

 TUMU MANAKO I TE KAPI MUA | KOAI MA TE AU KITE O IEHOVA?

Mei Teaa te tu o te Au Kite o Iehova?

Mei Teaa te tu o te Au Kite o Iehova?

E akaaereanga pa enua matou kare i kapiti atu ki te au pupu akonoanga ke. Noatu e tei Marike to matou opati maata i te ao katoa, e noo ana te manganui o te Au Kite o Iehova i te au enua ke ke. Te tika, mei te varu mirioni ia matou e apii ra i te Pipiria ki te tangata i roto i te 230 tuma enua. Ka pera tatou te aru anga i te tuatua a Iesu: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai.”​—Mataio 24:14.

Noatu teiea te ngai e noo ra matou, e aru ana matou i te ture. Inara ka tauta tatou kia vai takake mei te au angaanga poritiki. Te tumu, no te mea e aru ana matou i ta Iesu ikuikuanga no te au Kerititiano “kare kotou i to teianei ao.” No reira kare matou e piri atu ki te au manamanata e te au angaanga poritiki e kare matou e turu i te angaanga tamaki. (Ioane 15:19; 17:16) Te tika, i te tuatau o te Tamaki II o te Ao, kua tiriaia te Au Kite o Iehova ki roto i te are auri, kua tamamaeia, e kua tamateia no te mea kare ratou e piri atu ki te angaanga poritiki. Kua tata tetai epitikopo Tiamani no mua ana e: “Ka rauka tikai ia ratou i te karanga e ko ratou anake ua te aronga i patoi kia tau ki to ratou akava ngakau i te tuatau o te Third Reich.”

“E maroiroi te [Au Kite o Iehova] i te rave i te mea tau. Ka puapingaia teia aronga noinoi kore i roto i te au angaanga poritiki​—inara kare rava ratou e rave i te reira. . . . Te āriki ra ratou i te au mana kavamani inara te irinaki nei ratou e na te Patireia o te Atua e akatikatika i te au manamanata o te tangata.”​—Nutipepa Nová Svoboda, i Czech Republic.

Noatu ra, kare matou e akatakake ana ia matou mei te katoatoa. Kua pure a Iesu ki te Atua no tana au pipi e: “Kare au i pure ia koe e, ka apai ke atu koe ia ratou i teianei ao.” (Ioane 17:15) No reira, penei ka kite koe ia matou e angaanga ra, e okooko ra, e aere apii ra i toou ngai.