Neke ki te tumu manako rikiriki

Neke ki te ngai o te au tumu tuatua

 TUMU MANAKO I TE KAPI MUA | TE PATIREIA O TE ATUA—EAA TA TE REIRA KA RAVE NOOU?

Te Patireia o te Atua​—Eaa ta te Reira ka Rave Noou?

Te Patireia o te Atua​—Eaa ta te Reira ka Rave Noou?

Penei kua mārama koe mei te nga atikara i mua ake e e puapinga tikai te Patireia o te Atua ki te Au Kite o Iehova. Pera katoa, ka umere koe i te kite i tetai au akameitakianga ta te Patireia o te Atua ka apai mai a te tuatau ki mua. I taua taime ra, penei kua ekoko koe me ka tupu rai te reira.

E tu pakari kia matakite auraka kia irinaki i te au mea pouroa taau ka akarongo. (Maseli 14:15) Te aru nei koe i te tu matakite o te au tangata Berea i taito. * Te taime mua i akarongo ei ratou i te tuatua meitaki o te Patireia, kare to Berea i āriki ana i ta ratou i akarongo no te mea kua manako ratou e e tika te reira. Mari ra, kua apii meitaki ratou i te au Tuatua Tapu “i te tau anga oki i taua tuatua ra.” (Angaanga 17:11) Tera te aiteanga, kua akaaite to Berea i te tuatua meitaki ta ratou i akarongo ki ta te au Tuatua Tapu i akakite mai. Aere ua rai, kua papu ia ratou e kua akatumuia te tuatua meitaki ki runga i te Tuatua a te Atua.

Te pati pumaana nei te Au Kite o Iehova ia koe kia akapera rai. Na roto i ta matou porokaramu no te apii Pipiria kare e tutaki, te oronga nei matou i te atianga noou kia akaaite i te au irinakianga a te Au Kite o Iehova no te Patireia o te Atua ki ta te Pipiria e apii maira.

Kapiti mai ki te apii anga i te Patireia o te Atua, na roto i taau apii Pipiria, ka kite koe i te pauanga ki te au uianga puapinga roa atu.

Te mea puapinga rava atu me apii koe i te Pipiria, ka tauturuia koe kia “akavaitata atu ki te Atua.” (Iakobo 4:8) I reira, me akavaitata atu koe ki te Atua, ka kite maata atu koe i te au mea meitaki ta te Patireia o te Atua ka rave noou i teianei, e tuatau ua atu. Mei ta Iesu rai i pure ki tona Metua: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.”—Ioane 17:3.

^ para. 4 Ko Berea tetai oire i Makedonia.