Neke ki te tumu manako rikiriki

Neke ki te ngai o te au tumu tuatua

 TUMU MANAKO I TE KAPI MUA | KA AKAOPE AINEI TE MATE I TE AU MEA RAVARAI?

Tautaanga a te Tangata Kia Kore e Mate

Tautaanga a te Tangata Kia Kore e Mate

EMEPERA QIN SHI HUANG

TANGATA TUROTO KO PONCE DE LEÓN

E enemi rikarika te mate. E tauta ana tatou i te kopae i te reira ma to tatou maroiroi katoa. Penei kare tatou e inangaro ana i te ariki me tupu te reira ki tetai akaperepere o tatou. E me te mapu maroiroi nei rai tatou, penei ka manako tatou e kare rava tatou e rokoia e taua enemi ra​—e ka irinaki ua rai tatou i teia manako tarevake.

Maata atu ta te au Pharao i taito kimi ravenga anga kia ora ua atu rai i muri ake i te mate anga, i ta tetai ua atu tangata. Kua akapou ratou i te maataanga o to ratou oraanga​—pera te oraanga o te tauatini ua atu aronga angaanga—​i te kimi kia ora e tuatau ua atu. Ta ratou au pyramid i akatu, te akapapu maira i te reira—e te puapinga kore o to ratou akakoroanga.

Mei tera rai to te au emepera Tinito manakonakoanga kia ora ua atu rai, na roto ra i tetai ravenga ke—koia oki, e vairakau manamana tamanako ua no te ora. Kua akaue te Emepera Qin Shi Huang i tona au taineti kia kimi mai i tetai vairakau manamana te ka akakore i te mate. Inara, te maataanga o ta ratou vairakau kua poitiniia e te mercury, e na tetai o taua au vairakau ra i tamate iaia.

I te 16 anere mataiti T.N., kua tere atu te tangata turoto a Juan Ponce de León ki te Caribbean i te kimi i te puna vai kia mapu akaou. Inara, ko Florida i te enua ko Marike tana i kite mai, e kua mate aia i tetai au mataiti i muri mai no tetai manamanata i rotopu iaia e te iti tangata Initia o Marike. E kare roa i kiteaia ana te puna vai e mapu akaou ei.

Kua umuumu pouroa te au Pharao, te au emepera, e te au tangata turoto, kia kore e mate. Koai ra ia tatou kare e reka ana i to ratou akakoroanga, noatu kare tatou e reka ana i te mataara i rave ei ratou i te reira? I roto i to tatou ngakau, vaitata rai e te inangaro nei tatou pouroa kia ora ua atu rai.

KA RAUKA AINEI KIA AUTU I RUNGAO I TE MATE?

Eaa ra te tumu kare tatou e inangaro ana kia mate? Te akamarama maira te Pipiria i te tumu. No runga i te Atua ko Iehova Tei Anga mai ia tatou, * te karanga ra te reira e: ‘Kua akamanea aia i te au mea katoa i te tuatau tikai ra, e kua tuku aia i te manako mutu  kore ki roto i to ratou [to te tangata ravarai] ngakau.’ (Koheleta 3:11) Ka inangaro tatou kia mataora ua i te akara i te mekameka o te enua e tuatau ua atu, kare no tetai 80 mataiti ua. (Salamo 90:10) Ko tera ta tatou e inangaro nei.

No teaa ra te Atua i tuku ei i te ‘manako mutu kore’ ki roto i to tatou ngakau? Ei akamanamanata ua ainei ia tatou? Kare. No te mea, kua taputou mai te Atua e ka kore te mate. Te akakite putuputu maira te Pipiria no runga i te takore anga i te mate, e ta te Atua taputou no te ora mutu kore.​—Akara i te pia tei kapitiia mai,  “Autu ki Rungao i te Mate.”

Kua akakite taka meitaki mai a Iesu e: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) No reira ko te tautaanga kia kore e mate, kare i te mea puapinga kore. Kua akapapu mai a Iesu e, ko te Atua anake ua rai te ka autu i taua tautaanga ra no tatou.

^ para. 9 Ko Iehova te ingoa o te Atua tei akakiteia mai i roto i te Pipiria.