Neke ki te tumu manako rikiriki

Neke ki te ngai o te au tumu tuatua

E Tangata Ainei Tetai e Akatupu nei te Kino?

E Tangata Ainei Tetai e Akatupu nei te Kino?

 E Tangata Ainei Tetai e Akatupu nei te Kino?

“KUA mourima ana au ki te tiaporo.” I na te rangatira vaeau ei o te United Nations i Ruanata, i te akamanako anga no runga i to ratou puapinga kore i te tapu kia kore e akapou takiriia te tangata i taua enua ra, i te mataiti 1944. Te tuatua anga no runga i te tu rikarika o te ta tangata i taua taime ra, akakite tetai tangata ke mai e: “Me ka maro tetai tangata i te akakore e kare na Satani, e aru mai aia iaku ki ko i te aka vaarua tanumanga i Ruanata.” Na te Tiaporo tika tikai ainei taua au angaanga kino ra?

Maataanga i te tangata, kare ratou e manako ana e na tetai mea ora vaerua teia angaanga ta neneva ua e te takinokino. Maata te manako ana e e tu natura rai te kino i roto i te tangata, e ko to tatou uaorai tu kino te tumu maata o te au angaanga kino. Tamanako tetai aronga e e pupu aronga moni e te ririnui tetai, mei tetai taokotaianga muna rai i te ao katoa nei, tei akanauru mai ana i te tangata no te au mataiti e manganui kia rauka ia ratou te akatere i teianei ao. Tera katoa oki te aronga tei akaapa i te au kavamani, e te au tutara no te au tu tika kore e te mamae e kite nei ratou.

Eaa ra taau e irinaki ana? Eaa ra te tu kino, te takinokino, te au angaanga kino e te mamae, i totoa ua ai i te ao katoa i teia tuatau noatu te au tautaanga kia akaiti mai te reira? Eaa ra te tumu e aru viviki ua nei te tangata i tetai arataa te ka takino ia ratou uaorai, e kare e akarongo mai ana ki te au akamatakiteanga putuputu? E tangata ainei tetai e akatupu ra i te reira? Koai tikai te tutara nei i teianei ao? Ka poitirere paa koe i te pauanga.