Te Marama Maira Aia i to Tatou Mamae
E Akavaitata Atu ki te Atua
Te Marama Maira Aia i to Tatou Mamae
“TE TANGI aroa ko toou mamae i roto i toku ngakau.” I akapera tetai mitinari pakarikari o te Au Kite o Iehova i te akamarama anga mai te aiteanga o teia tu akaperepereia. Ko te Atua ko Iehova te akaraanga mua tikai no te tangi aroa. Te manako maira aia uaorai i te mamae e tupu ra ki tona iti tangata. Akapeea tatou i papu ei i tera? Kua kitea te akakiteanga apa kore i te tu tangi aroa maru o Iehova i roto i te au tuatua e te au angaanga a Iesu, iaia i runga nei i te enua. (Ioane 5:19) Akamanako ana, ei akaraanga, i te tupuanga e akatakaia maira i roto ia Ioane 11:33-35.
I te mate manako koreia anga te oa o Iesu ko Lazaro, kua aere atu a Iesu ki te oire o Lazaro. Ka marama meitakiia, e e tu mii maata tikai to nga tuaine o Lazaro, ko Maria raua ko Mareta. E inangaro maata tikai a Iesu i teia pamiri. (Ioane 11:5) Eaa i reira tana ka rave? Te karanga ra te tataanga e: “E kite akerā Iesu [ia Maria] i te aue anga, e te ngati Iuda i aere katoa maira i te aue anga, ngunguru iora aia i roto iaia, e taitaia atura. E kua na ko atura, Teiea aia te vaio angaia e kotou? Kua na ko maira ratou, E te Atu ka aere mai ka akara. Aue iorā Iesu.” (Ioane 11:33-35) Eaa a Iesu i aue ei? E tika, kua mate tona oa piri mou ko Lazaro, inara te aere ra a Iesu ka taui i tera na te akatuakaou mai anga iaia. (Ioane 11:41-44) E apinga ke atu ainei tetai te akakeu ra i to Iesu au manako ngakau?
E akara akaou i te au tuatua i taikuia i runga akenei. Te kite ra koe e i to Iesu kite atu anga ia Maria e te aronga i te pae iaia e aue ra, kua “ngunguru” aia e kua “taitaia atura.” Ko te reo mua o teia au kupu i taangaangaia i konei te akaari ra i te manako ngakau oonu tikai. * Kua akakeu oonuia tikai a Iesu e tana i kite atu. Kua tupu viviki te manako ngakau pakari i roto iaia e kua kiki atura tona nga mata i te roi mata. Te taka meitaki ra, e kua akakeuia te ngakau o Iesu e te mamae o etai ke. I akakeuia ana ainei koe kia aue no te mea te aue ra tetai e inangaroia ra e koe?—Roma 12:15.
Te tu tangi aroa o Iesu te apii maira i te marama anga puapinga i te au tu e te au mataara a tona Metua, ko Iehova. E akamaara e kua akaata apa kore mai tikai a Iesu i te au tu o tona metua i rauka ai iaia i te karanga e: “Ko te akara mai iaku nei, kua akara ïa i te Metua.” (Ioane 14:9) No reira me tatau tatou e kua “aue iorā Iesu,” ka papu ia tatou e te manako maira a Iehova uaorai i te mamae o te aronga e akamori ra iaia. E tika rai, te akapapu maira tetai aronga tata Pipiria i teia tika. (Isaia 63:9; Zekaria 2:8) E Atua maru tikai a Iehova!
E marekaia ana te tu tangi aroa. Me taitaia tatou me kore kua maromaroa, e inangaro ana tatou i te akavaitata ki tetai tangata e marama maira i to tatou au turanga e kua kite i to tatou tu mamae. Mei teaa atura tatou i te akavaitata maata atu kia Iehova, e Atua tu tangi tikai te manako maira i to tatou mamae e te marama maira i te tumu no ta tatou aue!—Salamo 56:8.
[Tataanga Rikiriki i Raro]
^ para. 3 Te tuatua Ereni e e “aue iorā” te taiku putuputu ra ki te “aue muteki ua,” inara te kupu tei taangaangaia ei akataka mai i te aue anga a Maria e etai ke atu te akataka ra i te “aue maata, aue reo maata.”