“Ko te Atua ta Matou e Akarongo e Tikaʼi Auraka te Tangata”

“Na Iehova oki te Tamaki”

KUA tu nga nuku vaeau e rua ki mua i tetai e tetai mei nga pae mai o te o. E 40 ra te noo mataku ua anga te au tangata o Iseraela e te tuatua akakino uaia mai anga e Golia, te tumutoa o te Philiseti.​—1 Samuela 17:1-4, 16.

Kua akaao pu ua mai a Golia i te au ngati Iseraela ki teia au tuatua: “Kimi io na kotou i tetai tangata no kotou, e aere mai aia ki raro kiaku nei. E kia tika iaia e taua iaku e kia mate au iaia, ei tavini ïa matou no kotou i reira: kia autu ra au, e kia mate aia iaku ra, ei tavini kotou no matou i reira, e e rave i ta matou angaanga. . . . Kua akavaavaa au i te au nuku o Iseraela i teianei rā; e o mai ana tetai tangata, e taua ana maua.”​—1 Samuela 17:8-10.

I te au tuatau taito, e mea matauia no te au tumutoa kia tu no to ratou au nuku vaeau i roto i te tamaki atu anga tetai tangata i tetai tangata. Ka aere te upokotuanga ki te tua o te tangata i re. Inara kare teia toa e akaao maira ia Iseraela i tetai vaeau ua nei. E aka tuputupua maatamaata tikai aia—​e enemi kino tikai e te matakuia. Inara, i te aviri mai anga i te nuku vaeau o to Iehova iti tangata, kua akapapu rai a Golia i tona mate.

Kare teia i tetai tarereanga ua nei na te vaeau. E tamakianga teia i rotopu ia Iehova e te au atua o te Philiseti. Kare i arataki mataku kore i tona nuku vaeau i te tamaki atu i te au enemi o te Atua, kua paruka ua te ariki o Iseraela ko Saula i te mataku.​—1 Samuela 17:11.

Irinaki Tikai Tetai Tangata Mapu i Roto ia Iehova

I teia taime e akanoo ua ra, kua aere mai tetai tangata mapu tei akatainu takereia ei ariki no Iseraela i te atoro i tona au tuakana i roto i te nuku vaeau o Saula. Ko Davida tona ingoa. I te rongo anga i te au tuatua a Golia, kua ui atu aia: “Koai oki teianei Philiseti peritome koreia ra, i akavaavaa mai ei aia i te au nuku a te Atua ora nei?” (1 Samuela 17:26) I roto i te mata o Davida, te tu maira a Golia no te Philiseti e to ratou au atua. Ma te tu riri tuatua tika, kua inangaro a Davida i te paruru ia Iehova e ia Iseraela e te tamaki atu i te tuputupua peikani. Kua karanga atura te Ariki ko Saula: “Kare koe e tika kia aere e taua ki tera ra Philiseti; e tangata ou oki koe.”​—1 Samuela 17:33.

E tuke maata tikai to Saula manako ki to Davida! Te manako ua ra a Saula i tetai tamaiti tiaki mamoe e akaao atura i tetai tuputupua kino. Kareka ra, te kite ra a Davida, i tetai tangata ua nei e patoi ra i te Atu Ngateitei ko Iehova. Kua akatumuia to Davida mataku kore ki runga i tona irinakianga e kare te Atua e tuku ua i Tona ingoa e Tona iti tangata kia taitoitoia ma te kore e akautungaia. Ia Golia e akapaapaa ra i tona ririnui, te tuku ra a Davida i tona irinakianga ki roto ia Iehova, te akamanako anga i te turanga mei to te Atua turanga.

“Te Aere Atu nei ra Au kia Koe ma te Ingoa o Iehova”

E akarongo ngaueue kore tikai to Davida. Te maara ra iaia e kua tauturu ana te Atua iaia i te akaora mai i tana mamoe mei te tapa e te riona. Kua papu tikai i te tiaki mamoe mapu e i teianei ka tauturu mai a Iehova iaia kia tamaki atu i teia enemi matakuia o te Philiseti. (1 Samuela 17:34-37) Ma te maka ua rai e te au toka mania ua e rima, kua aere atura Davida i te aravei ia Golia.

 Kua rave a Davida i teia akaaoanga akara anga ngata i roto i te maroiroi e oronga maira a Iehova. Ma te mataku kore, kua akakite aia ki te Philiseti: “Te aere maira koe kiaku nei ma te koke, e te korare, e te paruru: te aere atu nei ra au kia koe ma te ingoa o Iehova Sabaota ra, te Atua no te au nuku o Iseraela ra, tei akavaavaaia e koe na. Na Iehova koe e tuku mai ki toku rima akonei . . . kia kite te ao katoa nei e, e Atua to Iseraela. E ka kite teianei aronga maata katoa ra e, e tika ia Iehova kia akaora, auraka ua atu ei koke, auraka ei korare: na Iehova oki te tamaki.”​—1 Samuela 17:45-47.

Eaa ra tei tupu mai? Te karanga ra te papaanga akauruia e: “Inga iora te Philiseti ia Davida i te maka ma te toka, ta iora i te Philiseti, mate rava akera aia; kare ra e koke i te rima o Davida.” (1 Samuela 17:50) Kare e koke i roto i tona rima, kua rauka ra iaia te turuanga ririnui a te Atua ko Iehova. *

Mei teaa atura te akapapu tikaiia mai anga to Davida akarongo i roto ia Iehova i roto i taua tamakianga ra! Me anoanoia tatou kia iki i rotopu i te mataku i te tangata e te irinaki ki roto i to Iehova mana akaora, te taka ua ra te ikianga: “Ko te Atua ta matou e akarongo e tikaʼi auraka te tangata.” (Angaanga 5:29) Ei runga ravao, me akara tatou i te au turanga ngata mei to te Atua ko Iehova turanga, ka rauka ia tatou i te akono meitaki i te au manamanata taitaia.

[Tataanga Rikiriki i Raro]

[Pia/Tutu i te kapi 9]

MEI TEAA RA TE MAATAMAATA IA GOLIA?

Te akakite maira te papaanga i roto ia 1 Samuela 17:4-7 kia tatou e kua tere atu i te ono kupiti te teitei ia Golia​—tere atu i te iva tapuae. Ko tei akakite mai i te maatamaata e te maroiroi o te Philiseti koia oki ko tona paruru umauma veo. E 57 kiro te teiaa! Te mouranga o tana korare mei tetai potonga rakau roroa rai, e to te reira koi auri e 7 kiro te teiaa. Ae, i te akaraanga e teimaa atu paa te paruru umauma o Golia ia Davida uaorai!