Au Uianga a te Aronga Tatau

I roto i teea au turanga i tau ei tetai vaine Kerititiano kia tapoki i tona upoko no te au tumu pae vaerua?

“Ko te vaine katoa ra e pure, e e ako oki, ma te upoko tapoki koreia ra, kua taakaaka ïa i tona upoko,” ta te apotetoro ko Paulo i tata. No teaa ra? No te kaveinga tu-Atua oki o te upoko anga: “To te vaine ra upoko, ko te tane ïa.” Te pureanga me kare te akoanga i roto i te putuputuanga Kerititiano te mea matauia e apainga ia na te tane. No reira, me ka akono tetai vaine Kerititiano i te au tumu no te akamori anga tei matauia ra e na tana tane e akono me kore na tetai tangata papetitoia, ka tau aia kia tapoki i tona upoko.​—1 Korinetia 11:​3-10.

Te au turanga i tau ei te vaine Kerititiano kia tapoki i tona upoko penei ka tu mai i roto i tona pirianga akaipoipo. Ei akatauanga, me akaputu mai te pamiri no te apiianga Pipiria me kare no te kaikaianga, te mea matauia na te tane e rave te arataki anga i te apiianga ia ratou e te raveanga oki i ta ratou pure ki te Atua. Inara, me e tangata akarongo kore aia, penei ka topa mai teianei apainga ki runga i tana vaine. No reira, me te pure maata maira nona e etai atu me kare me te akono ra i te apiianga Pipiria ma tana tamariki e tana tane i reira katoa, ka tika te tuaine Kerititiano kia tapoki i tona upoko. Me kare tana tane i reira, kare e umuumuia te vaine kia tapoki i tona ra upoko, i te mea kua akamanaia aia e te Atua kia apii i te tamariki.​—Maseli 1:8; 6:20.

 Inara, akapeea ra me e tamaroa ou tetai i roto i te pamiri kua akatapuia, e kua papetitoia ei tavini no te Atua ko Iehova ra? I te mea e mema taua tamaiti ra no te putuputuanga Kerititiano, ka tau kia orongaia mai te apiianga mei ko mai i te au mema tane ra. (1 Timoteo 2:12) Me e tangata akarongo tona metua, ka tau kia apii aia i taua tamaiti ra. Inara, me kare tona metua i reira, ei reira te metua vaine ra e tapoki ei i tona upoko me ka akono aia i te apiianga ma te tamaiti papetitoia ra e etai atu tamariki ra. Me ka kapiki aia i taua tamaiti papetitoia ra kia rave i te pure i taua apiianga ra me kare i te kaikaianga tei iaia te ikianga. Penei ka manako ngakau aia e kare aia i papa meitaki ake e penei ka iki aia nana uaorai e pure. Me ka iki aia e nana e pure i taua atianga ra, ka tau aia kia tapoki i tona upoko.

I te rave kapitianga i etai angaanga putuputuanga, penei ka tau te au vaine Kerititiano kia tapoki i to ratou ra upoko. I te uipaanga i rotopu i te epetoma no te angaanga tutu aere, ei akatauanga, penei e au tuaine Kerititiano anake to reira kare e tane papetitoia. Penei te vaira etai atu atianga kare e tane papetitoia i reira i te uipaanga putuputuanga. Me ka riro na te tuaine e akono i te au angaanga tei matauia ra na te taeake e rave te au uipaanga akanoonooia ra me kare te uipaanga no te tutu aereanga, ka tau aia kia tapoki i tona upoko.

Ka tika ainei te au vaine Kerititiano kia tapoki i to ratou upoko me te oronga ra i te urianga reo me kare urianga na te taringa turi i te akoanga Pipiria me kare te tatauanga i te au parakarapu ra mei te puka apii Pipiria ra i te uipaanga putuputuanga ra? Kare. Te au tuaine te rave ra i te reira au angaanga kare e akaaere ana me kare e apii ana. Ma te aiteite katoa oki, kare e umuumuia te tapokianga no te upoko o te au tuaine i roto i te au akakitekite anga, e te tuatuaanga i te au tupuanga ra, me kare te rave anga i te tuatua anga i te Apii Orometua Teokaratiki ra.

Ko te apiianga i roto i te putuputuanga na te au tane papetitoia e rave, ko te au tane e te au vaine na ratou te apainga no te tutu aereanga e te apiianga i vao ake i te putuputuanga. (Mataio 24:14; 28:19, 20) No reira me te tuatua atura te au vaine Kerititiano ki te aronga o vao no te Tuatua a te Atua ki mua i tetai tane e Kite no Iehova, kare aia e umuumuia kia tapoki i tona upoko.

Inara, e tuke te turanga me ko tetai apii Pipiria putuputu, tei akapapaia ra te raveia ra i roto i te are e e tane akatapuia, kua papetitoia tei reira. E akaputu anga akanoonooia teia no te apiianga e ko te akono ra i te apiianga te akaaere ra i te reira. I raro ake i teia au turanga nei, kua riro taua apii ra ko tetai akatotoa anga i te putuputuanga. Me akono tetai vaine e Kite papetitoia i taua apii ra ma tetai Kite tane i reira, ka tika aia kia tapoki i tona upoko. Inara, ka tau na te taeake akatapuia ra e rave i te pure. Kare tetai tuaine e pure i mua i te taeake akatapuia ra na te tumu taka ke anake ra, mei te ngere anga taua taeake ra i tona mana kopapa kia tuatua.

Penei i tetai atianga kua kapitiia atu te tuaine Kerititiano ra e tetai papuritia tane no te Patireia kare ra i papetitoia ake. Me ka inangaro aia, penei ka pati atu aia nana e akono i te apiianga ra. Inara i te mea kare e rauka iaia i te mono i te tuaine ra i te pure anga kia Iehova, ka tika na te tuaine e pure i taua apii ra. Me te akono ra i te apii e me te pure ra i raro ake i teia au turanga, e mea tau kia tapoki te tuaine i tona upoko. Noatu rai e kare te papuritia tane ra i papetitoia ake, te akataka maira te aronga o vao iaia ma te putuputuanga no te mea te rave ra aia i te angaanga tutu aere.

“Ei tapoki to te upoko o te vaine e tikaiʼi, no te au angela,” ta Paulo i tata. Ae, tei te au tuaine Kerititiano ra te tika no te au akatauanga meitaki ki te au mirioni ua atu au angera tei rave tiratiratu ra i te kauraro anga ia ratou uaorai kia Iehova. Mei teaa ra te tau no te au vaine tau i te Atua kia oronga i te akamanako anga kia tapoki i to ratou upoko i te au atianga tika ra no te reira!

[Au Tutu i te kapi 26]

Te tapokianga i te upoko e akairo no te akangateitei anga i te upokoanga