INANGARO te Atua ko Iehova i tona aronga akamori kia rekareka ma te au. Inangaro aia ia ratou kia aruaru i te tu au. Me akapera ratou, ka vai te au i roto i te putuputuanga Kerititiano. Te riro ra teia tu au ei arataki i te tangata ki roto i te putuputuanga.

Ei akaraanga, kua kite tetai taunga purepure i Madagascar i te tu au i rotopu i te iti tangata o Iehova e kua manako, ‘Me piri atu au ki tetai akonoanga, ko teia taku ka aru.’ Kare i roa ana, kua akamutu aia i te akamori i te au temoni, kua rave i te au taui anga i tona oraanga akaipoipo, e kua akamata i te akamori ia Iehova, te Atua o te au.

Mei tera tangata, e tauatini ua atu aronga i te au mataiti ravarai tei tomo mai ki roto i te putuputuanga Kerititiano e kua kitea te tu au ta ratou i inangaro ua ana. Inara tatau tatou i roto i te Pipiria “te vareae maata e te māro” i roto i te putuputuanga ka takore i te au pirianga taeake e ka tupu te manamanata. (Iakobo 3:14-16) Inara te oronga maira te Pipiria i te akoanga tau akapeea te kopae i teia au manamanata e kia akaketaketa i te tu au i rotopu i te au taeake e te au tuaine. Akara tatou akapeea teia ako te angaanga anga i roto i tetai au turanga tikai.

“Manamanata tikai au i te taeake taku i angaanga kapiti. Te karo anga maua, e rua tangata i kite i te reira.”​—CHRIS.

“Te tuaine taku i tutu aere tamou, kare i roa kua akamutu i te aru iaku i te tutu aere. E kua akamutu i te tuatua mai kiaku. Kare au i kite eaa te tumu.”​—JANET.

“Te pukapuka ra au i runga i te tereponi toko toru tangata. Kua tuatua mai tetai e, noo ake ra, manako au kua oti rai aia. I reira, kua tuatua au i te au mea tau kore no runga iaia ki tetai mai tangata, inara tei runga rai te tangata mua i te tereponi.”​—MICHAEL.

“I ta matou putuputuanga, kua tupu te manamanata i rotopu i nga painia e rua. Kua akakino tetai i tetai. Kua riro ta raua karo ua ei akataitaia i tetai pae.”​—GARY.

Te akaraanga penei kare teia i te au manamanata kino. Inara kua tupu te mamae ngakau ki teia aronga e kua takino i te tu au o te putuputuanga. Ma te rekareka, kua aru teia au taeake e te au tuaine i te aratakianga a te Pipiria e kua tupu akaou te au. I toou manako, eaa te au arataki anga Pipiria tei tauturu ia ratou?

“Auraka kotou e tauetono aere i te arataa.” (Genese 45:24) Oronga a Iosepha i teia akoanga pakari ki tona ai taeake ia ratou e oki ra ki to ratou metua tane. Me kare tetai tangata e akakoromaki i tona au manako ngakau e ka riri vave ua, ka kino roa atu te turanga. Penei ka riri rai tetai pae. Kite mai a Chris e ngata i tetai taime i te taakaaka iaia uaorai ma te aru i te au ikuiku  anga. Kua inangaro aia i te taui, no reira kua tuatua tataraara aia ki te taeake tei karo raua. E oti kua angaanga pakari a Chris i te akatere i tona tu riri. Te kite anga te taeake ia Chris e angaanga pakari ra i te taui, kua pera katoa aia. I teianei te noo au ua ra raua ma te tavini kapiti ia Iehova.

“Kare e uruoaanga tuatua ra, kare tei akakoroia e tupu.” (Maseli 15:22) Te akamutu anga te oa o Janet i te tuatua kiaia, akamata rai a Janet i te taangaanga i teia irava Pipiria. Kua aere aia i te aravei e te tuatua ki te tuaine. Kua ui a Janet me kua akariri me kore kua tamamae aia iaia. I te akamata anga, e manga tuke rai raua. Inara ia raua e tuatua maru ua ra, kua mako mai raua. Kua kite mai te tuaine e kua mārama kore ua aia i tetai apinga tei tupu i te tuatau i topa e kare rava a Janet i akariri ana iaia. Kua tuatua tataraara aia kia Janet, e kua piri akaou raua ma te tavini kapiti ia Iehova.

“E teianei, kia apai koe i taau apinga oronga ua ki te atarau, e kua manako iora koe i reira e, e ara ta to taeake ia koe na: Vaio atu i to apinga i mua i te atarau, e akamata i te aere e ongi i to taeake.” (Mataio 5:23, 24.) Kua oronga a Iesu i teia tuatua i tana Akoanga i te Maunga. Tataraara tikai a Michael te tuatua anga i te au mea tau kore no runga i te taeake. Kua manako aia i te rave i te au mea ravarai no te rapakau i te manamanata. No reira kua aere aia ki te taeake i te tuatua ma te tataraara tikai kiaia. Eaa tei tupu? Karanga a Michael, “Kua akakore ua mai toku taeake i toku apa.” Piri akaou raua ei nga oa.

“E tauturu atu tetai ki tetai, e akakore tetai i ta tetai ara, e tapepeanga ta tetai ki tetai.” (Kolosa 3:12-14) Te maaraara koe i te nga painia tei karo i te ngai tutu aere? Kua tauturu tetai tangata pakari ia raua kia kite e te akataitaia ra raua i tetai pae. Kua akamaara aia ia raua kia akakoromaki i tetai e tetai e kia akatupu i te au i roto i te putuputuanga. Kua āriki e kua taangaanga raua i tana ako. I teianei kua piri akaou raua te tutu aere i te nuti meitaki.

Ka tauturu katoa te ako ia Kolosa 3:12-14 kia akaaka koe, kia akakore i te ara a tetai tangata tei tamamae ia koe, e auraka e manako atu i te reira. Inara akapeea me kua tauta tatou i te akakore i tana ara inara e ngata roa? Te vaira te kaveinga Pipiria ia Mataio 18:15 te ka tauturu ia tatou. Noatu te tuatua tikai ra a Iesu no runga i te au ara kino, kua akakite aia i te ka rauka ia tatou i te rave me tupu te manamanata ki tetai taeake me kore tuaine. Na roto i te tu takinga meitaki e te akaaka, ka aere tatou ki te reira tangata kia uriuri i te manamanata e ka tauta i te rapakau i te reira.

E maata atu te au tauturu tau i roto i te Pipiria. Te maata anga ka o mai te irinaki anga ki rungao i te vaerua tapu o te Atua e rauka ai ia tatou te akaari i te ua o te vaerua. Teia au tu ko “te  inangaro ïa, te rekareka, te au, te akakoromaki, te takinga-meitaki, te meitaki, te pikikaa kore, Te maru, te akono meitaki.” (Galatia 5:22, 23) Akamanako ana i teia. Ka angaanga meitaki ua tetai matini me taʼinuia te reira. Mei tera katoa, e māmā ake i te rapakau i te au manamanata kia rauka te au pirianga maru me akaari tatou i teia au tu meitaki o Iehova.

E tuke te au tu o te tangata tatakitai. E tuke to tatou au tu e te au ravenga te akamanako anga pera katoa me tuatua i to tatou uaorai manako. Ka akareka atu teia i to tatou pirianga oa. Inara ka akatupu katoa te tuke o teia au tu i te au turanga mārama koreia e te au manamanata. Oronga tetai tangata pakari i te akaraanga me tupu teia te karanga anga: “Ka ngata i tetai tangata akamā i te noo i te pae i tetai tangata oraora, e te tuatua maata. Penei ka akara anga puapinga kore ua teia tu; inara, ka taki atu teia ki te au manamanata kino.” Ka irinaki ainei koe kare rava tetai nga tangata tuke to raua tu e reka i tetai e tetai? Ka akara ana tatou i te au akaraanga o nga apotetoro. Me akamanako tatou ia Petero, ka kite tatou i tetai tangata tei tuatua ua i tona manako. Me akara tatou ia Ioane, ka kite tatou i te taeake aroa te ka akamanako i tana ka tuatua e ka rave atu ei. E tuke to Petero tu kia Ioane. Inara kua angaanga kapiti meitaki raua te tavini anga ia Iehova. (Angaanga 8:14; Galatia 2:9) Pera katoa tatou i teia rā. Ka rauka katoa kia angaanga meitaki te au Kerititiano tuke to ratou tu.

Inara akapeea me rave e me tuatua tetai i roto i taau putuputuanga i tetai apinga tei akariri ia  koe? E mea meitaki i te akamaara e kua mate a Karaiti no tera taeake e koe katoa, e kia aroa i toou taeake. (Ioane 13:34, 35; Roma 5:6-8) Kare i te mea tau kia manako e kare koe e piri atu ki tera tangata e ka kopae koe iaia. Mari ra, e ui kia koe uaorai: ‘Te rave ra ainei toku taeake i tetai apinga tei akaapaia e te ture a Iehova? Te akakoro ra ainei aia i te tamamae iaku? Me e tuke ua to maua tu? Te tika, penei e au tu to te taeake taku ka inangaro?’

Ei akaraanga, me reka aia i te tuatua e ka muteki ua koe, kore i reira e angaanga kapiti i roto i te angaanga tutu aere kia kite i taau ka apii mai? Akapeea me e tu oronga atu tona i toou? Te kite ra ainei koe i te mataora ka tupu me oronga ki te au ruaine, te makimaki, e te apikepike? Ka rauka ainei ia koe te apii mei tera tangata kia maata atu toou tu oronga ua? Noatu e tuke to korua tu, ka akamou koe ki runga i tona au tu meitaki. Noatu kare rava korua e riro ei nga oa piri, ka vaitata atu ra to korua pirianga. Ka akatupu teia i te au i rotopu ia korua e te putuputuanga.

I te anere mataiti mua, te vaira tetai nga tuaine ko Euodia e Sunetuke. Te akara anga e tuke tikai to raua tu, inara kua akamaroiroi te apotetoro ko Paulo “kia okotai rai o raua ngakau i te Atu nei.” (Philipi 4:2) Ka inangaro katoa tatou i te akamori kapiti ia Iehova ma to tatou au taeake e te au tuaine ma te aruaru i te au i roto i te putuputuanga.

No teaa ra tatou ka kopae viviki ei i te au manako ngakau kino no tetai ke? Ka akaaite tatou i teia au manako ngakau ki te au ngangaere e tupu ra i roto i tetai aua tiare manea. Me kare tatou e vaere i te reira, ka ngangaere te aua tiare. Mei  tera katoa to tatou manako ngakau kino, ka takino teia i te putuputuanga. Inara me e inangaro to tatou ia Iehova e to tatou au taeake, ka rave ua tatou te paruru i te tu au o te putuputuanga.

Me tauta tatou i te akaau i tetai ke, ka poitirere tatou i te meitaki ka tupu. Kua kite mai tetai Kite i teia. Teia tana tua: “Manako au e te akatamariki maira tetai tuaine iaku. Kua riri tikai au. Iaku e riri ua ra, kua akamata au i te tuatua kino kiaia. Manako au, ‘Kare aia e akangateitei mai ana iaku, kare rai au e akangateitei iaia.’”

E oti kua akamanako teia tuaine i tona tu. “Akamata au i te kite i toku tu kino, e kua poitirere tikai. Anoanoia au kia akatikatika i toku manako. I muri ake i te pure anga kia Iehova, kua apai au i tetai manga apinga aroa na te tuaine ma te tata i te kati no te tataraara kiaia. Kua takave maua ma te tuatua kia kore te reira e taiku akaouia. Kare o maua manamanata akaou mei te reira taime mai.”

Te anoano ra te katoatoa i te tu au. Inara na te tu tinamou kore e te ngakau parau e akatupu i te tangata kia ngere i te au. E mea matauia teia i teianei ao, inara e maata atu ta Iehova e anoano ra i te aronga e akamori ra iaia. I rotopu i te Au Kite o Iehova, ka anoanoia te tu au e te taokotai. Kua akauru a Iehova ia Paulo kia tata ki te au Kerititiano “kia tau to kotou aerenga i te kapikianga” tei rauka ia ratou. Akamaroiroi aia ia ratou kia rave i teia “ma te ngakau akaaka roa, e te maru, ma te akakoromaki, i te tauturu anga atu tetai i tetai ma te aroa; Ma te matakite tikai oki kia vai rai te taokotaianga a te Vaerua ra i te ruru o te au.” (Ephesia 4:1-3) Ko te taokotaianga “ruru o te au” ta te iti tangata o Iehova e akaperepere tikai ra. No reira kia rave ua tatou i te akaketaketa i te reira ma te rapakau i tetai ua atu manamanata i to tatou au taeake e te au tuaine.