Neke ki te tumu manako rikiriki

Neke ki te ngai o te au tumu tuatua

 TUMU MANAKO I TE KAPI MUA | AKAMĀRAMAANGA ORAMA NO TE AO VAERUA

Au Uianga no te Aronga i Roto i te ao Vaerua

Au Uianga no te Aronga i Roto i te ao Vaerua

I manako ainei koe no runga i te ao vaerua e te aronga e noo ra i reira? Me koia ïa, kare ko koe anake ua. No te tauatini au mataiti, kua akamanako te tangata i teia tumu manako. Irinaki tetai pae e noo ana te ui tupuna i roto i te ao vaerua e ka anoanoia kia akangateitei ia ratou. Tetai pae te manako ra ratou e e ngai rangi marie tei kapikiia e ko te au rangi, e nooia ana e te au angera e te aronga meitaki tei mate. E tetai pae, te manako ra ratou e te noo ra te anere mirioni ua atu au atua i roto i te ao vaerua.

E manganui te tangata e karanga ra e kare a tatou apinga i kite no runga i te ao vaerua no te mea kare tetai i aere mai i te akakite kia tatou no runga i te reira. Inara, e tarevake teia manako. I noo ana a Iesu Mesia i te rangi, koia oki te ao vaerua, i mua ake ka aere mai ei ki te enua nei. Kua akakite tika aia ki te au arataki akonoanga i te anere mataiti mua: “I eke mai nei oki au mei te rangi mai, e akono i to tei tono mai iaku nei anoano, auraka i toku uaorai anoano.” No reira te akakite ra a Iesu i te au mea tana i kite tikai i te na ko anga ki tana au apotetoro: “Manganui te nooanga tikai i te are o taku Metua ra.”​—Ioane 6:38; 14:2.

To Iesu Metua, ko te Atua, ko Iehova tona ingoa, e tei te rangi te “are” o Iehova. (Salamo 83:18) No reira, kare tetai ua atu e rauka i te akataka meitaki i te ao kitea koreia mari ra ko te Atua ko Iehova e Iesu Mesia. E maata ta raua i akakite mai no runga i te ao vaerua na roto i te au orama umere ta raua i oronga ki te aronga tiratiratu.

I te atikara ka aru mai ka uriuriia te au tuanga o te Pipiria tei akataka i ta te au tangata i kite i roto i te au orama. Ia koe e akamanako ra i teia au orama, e akamaara e kare te ao vaerua i te apinga pae kopapa ta tatou ka amiri me kore ka akara atu. Ko teia te tumu kare te Atua i akamārama i te ao vaerua na roto i te tu kare tatou e mārama, mari ra kua oronga mai aia i te au orama tei akaari mei teaa tikai te ao vaerua na roto i te tu ka mārama tatou. Ka tauturu teia au orama ia koe kia mārama no runga i te aronga e noo ra i te ao vaerua e “manganui te nooanga tikai.”