Neke ki te tumu manako rikiriki

Neke ki te ngai o te au tumu tuatua

 TUMU MANAKO I TE KAPI MUA | KA KIMI KOE I TE AKAPUMAANA KIEA?

Inangaro Tatou Pouroa i te Akapumaana

Inangaro Tatou Pouroa i te Akapumaana

Maara ainei ia koe i toou tamarikianga kua oro koe e kua tarape toou vaevae? Penei kua motu toou rima me kore kua pakia toou turi. Maara ainei ia koe akapeea toou mama me akapumaana ia koe? Penei ka tāmā aia i te ngai tei pakia e kua vaî i te reira. Kua aue koe, inara no tana tuatua akapumaana e te takave maanaana, kua meitaki akaou koe. I tera tuatau, kare e mamao ana te akapumaana.

Inara me pakari ake tatou ka ngata te oraanga. Ka kino atu te manamanata e ka ngata atu i te kimi i te pumaana. Te mea mii, kare e rauka i te akatikatika i teia au manamanata ma tetai vaî e te takave a mama. Akamanako ana i teia au akaraanga.

  • Kua tumatetenga ainei koe no tei ngere i te ngai angaanga? Karanga a Julian i te akarukeia anga aia e tana ngai angaanga, kua poitirere e kua taitaia aia. Manako aia, ‘Akapeea au me akono i toku ngutuare tangata? Noatu kua angaanga pakari au no tetai tuatau roa, eaa ra te kamupani i manako ei kare oku puapinga?’

  • Penei kua ati toou ngakau no tei pueurikiriki toou akaipoipo. “Te akarukeanga taku tane iaku e 18 marama i topa, kua mii tikai au. Mei te mea rai kua ati toku ngakau,” i akamārama ai a Raquel. “Kua mamae au i te pae kopapa e te pae manako ngakau. Kua mataku au.”

  • Penei e maki kino toou e kare e meitaki akaou te reira. I tetai au taime, penei ka manako koe mei te tangata i taito rai ko Iobu tei aue e: “Kua iu au; auraka au kia ora roa atu.” (Iobu 7:16) Penei ka manako koe mei ia Luis, e tangata e 80 ona mataiti tei karanga e, “Tetai taime te tiaki ua nei au kia mate.”

  • Me kore kua mate toou akaperepere e ka inangaro koe i te akapumaana. Akamārama a Robert e: “Te mateanga taku tamaiti i te ū anga te pairere, toku manako mua kare au i irinaki i te reira. I reira kua tupu te mamae, te mamae tei akatakaia i roto i te Pipiria mei te puta koke ra tei puta mama rava ki roto i toou ngakau.”​—Luka 2:35.

Kua akapumaanaia a Robert, Luis, Raquel, e Julian noatu to ratou turanga taitaia. Kua kite mai ratou i Tei Akapumaana mai​—koia oki te Atua Mana Katoatoa. Akapeea aia me oronga i te akapumaana? Ka oronga ainei aia i te akapumaana noou?