Ko te tu tangi tona aiteanga kia “kite eaa ta tetai tangata e na roto ra na te akamanako anga ia koe i roto i tona turanga.” Ei taote no te mental-health, karanga a Dr. Rick Hanson e, “tei roto te reira tu ia tatou pouroa.”

AKAMANAKO ANA: Eaa ra i rauka ai ia tatou i te akaari i teia tu, e tu kare e kiteaia i roto i tetai ua atu au mea? Akakite ra te Pipiria e kua anga te Atua i te tangata mei tona uaorai tu. (Genese 1:26) Kua angaia tatou mei to te Atua tu no reira ka rauka ia tatou i te akaari i tona au tu meitaki tikai. No reira me akakeuia tetai tangata kia tauturu i tetai ke, te akaari ra ratou i te au tu takinga meitaki o tei Anga mai ia tatou, ko te Atua ko Iehova.—Maseli 14:31.

E tangi ana te Atua ia tatou e kare aia e mataora me tupu te mamae kia tatou. Akamanako ana i tei tupu ki te ngati Iseraela, kua takinokinoia ratou i Aiphiti, e kua noo ratou i roto i te metepara no tetai 40 mataiti, inara karanga te Pipiria e: “I to ratou katoa ra au mate kare aia i te enemi.” (Isaia 63:9) No reira kare te Atua i kite ua eaa te tupu ra kia ratou, kua mārama katoa ra aia i to ratou turanga. Karanga aia e, “kua kite oki au i to ratou mamae.” (Exodo 3:7) Karanga katoa te Atua e “ko tei akatukia atu oki ia kotou ra, kua akatukia ïa i tona koringo mata nei.” (Zekaria 2:8) Me tupu te mamae kia tatou, ka mamae katoa Aia.

Me tupu ake te manako e kare tatou e tau kia tangi mai te Atua ia tatou, te akapapu maira te Pipiria e “e maata te Atua i to tatou ngakau, e kua kite aia i te au mea katoa nei.” (1 Ioane 3:19, 20) Kua kite meitaki te Atua ia tatou e kua mārama aia i to tatou turanga, to tatou manako e ta tatou e na roto ra. Te tangi maira aia ia tatou.

 Akapapu mai te au Irava e

• “E kapiki koe i reira, e ka iō mai a Iehova; e kaku koe, e ka tuatua mai aia, I na, teia Au.”—ISAIA 58:9.

• “Kua kite oki au i te au akakoro anga taku i akakoro ia kotou nei, te tuatua mairā Iehova, e akakoro anga au ïa, kare to te kino, kia oronga atu au ia kotou i te openga ta kotou i manako ra. E kapiki mai oki kotou iaku, e aere oki kotou e pure mai iaku, e naku e akarongo atu ia kotou.”—IEREMIA 29:11, 12.

• “Ka tuku ana koe i toku nei roi-mata ki roto i taau ra āriki: kare ainei i roto i taau ra tuatua?”—SALAMO 56:8.

Me kite tatou e te tangi maira te Atua ia tatou, ka riro ainei te reira ei tauturu ia tatou kia akakoromaki i te au turanga ngata? Akamanako ana i te akaraanga o Maria:

“Te mateanga taku tamaiti e 18 ona mataiti i te maki cancer, mamae tikai toku ngakau. Iaku e ngata roa te oraanga e kare e aroa. Riri tikai au ia Iehova no tei kore i tauturu mai i taku tamaiti!

“E ono mataiti i muri mai, akakite au i toku manako ki tetai taeake aroa e te meitaki e kare a Iehova e tangi mai ana iaku. Muri ake i tetai nga ora i tona akarongo mai anga iaku, taiku mai aia i tetai irava tei akamaroiroi tikai iaku. Ko 1 Ioane 3:19, 20, karanga ra: ‘E maata te Atua i to tatou ngakau, e kua kite aia i te au mea katoa nei.’ Akamārama katoa mai aia e kua kite a Iehova i te tumu i tupu ei te au taitaia.

“Noatu ra te reira, ngata tikai iaku te akakore i toku riri! Tatau au ia Salamo 94:19, te karanga ra e: ‘I rotopu i toku nei manako mirimiri-ngata i roto iaku nei, na to akapumaana e akarekareka mai i toku vaerua.’ Iaku, kore ake rai kua tataia teia irava noku anake! I muri mai, kite au i te pumaana me akakite au kia Iehova i toku au manamanata, no te mea te akarongo e te mārama maira aia iaku.”

E mea pumaana i te kite e, te mārama e te manako maira te Atua ia tatou! Inara, no teaa ra i maata ua atu ei te mamae? Te akautunga ainei ra te Atua ia tatou no to tatou tarevake? Ka takore ainei te Atua i te au turanga taitaia? Ka akara tatou i teia au uianga i roto i te atikara ka aru mai.