Neke ki te tumu manako rikiriki

Neke ki te ngai o te au tumu tuatua

 TUMU MANAKO I TE KAPI MUA

Me Mate Tetai Taau i Akaperepere

Me Mate Tetai Taau i Akaperepere

“E pepe, e mea tau teia ki te Atua. . . . Auraka . . . koe . . . e aue.”

Kua koumuumuia teia au tuatua ki roto i te taringa o tetai vaine ko Bebe tona ingoa. Tei te tanumanga aia o tona papa, tei u i te motoka e kua mate.

E pirianga vaitata to Bebe ki tona papa. No ko mai teia au tuatua i tetai oa o te ngutuare tangata, inara e tuatua taitaia tikai teia kia Bebe kare i te mea pumaana. “Kare tona mate anga i te mea tau,” i nana ai kiaia uaorai. I tetai tuatau roa i muri mai, ia Bebe e akakite ra i teia tupuanga i roto i tetai puka, te taka ua ra e te mamae ngakau ra aia.

Mei ta Bebe i kite mai, ka roa te tuatau e kore ei te mamae ngakau, i te mea e e pirianga vaitata to raua. I roto i te Pipiria, kua akatakaia te mate e ko “taua enemi openga ra.” (1 Korinetia 15:26) Me tupu te mate, ka tamanamanata i to tatou oraanga e kare e rauka i te tāpu i te reira, e maata te taime ka tupu poitirere ua mai te mate e ka akangere ia tatou i tei akaperepereia. Kare e okotai ia tatou i paruruia i teia tu kino. No reira kare i te mea poitirere ua me kare tatou e kite i te akakoromaki me na roto i teia turanga.

Penei e manako ana koe e: ‘Eaa te roa e ngaro ei te mamae ngakau? Akapeea tetai tangata me akakoromaki i tona mamae ngakau? Akapeea au i te akapumaana anga i tetai pae tei na roto i teia turanga? E manakonakoanga ainei tetai no te aronga tei mate, ta tatou e akaperepere ra?’