“E tei akarongo i te pure ra e, ka tae te tangata ravarai kia koe na.”​—Salamo 65:2.

Te pure ra tetai pae no te mea karanga ratou e ka akameitaki te reira i to ratou turanga, noatu kare ratou e irinaki ana e te akarongoia maira te reira. Inara kare te pure i tetai mea kia rave tatou ei akamarū i to tatou manamanata. Akapapu maira te Pipiria kia tatou e “Te vaitata mairā Iehova a i te aronga i kapiki atu iaia, i te aronga i kapiki atu iaia ma te pikikaa kore. . . . ka akarongo mai aia i ta ratou kapiki.”​—Salamo 145:18, 19.

Papu ia tatou e te akarongo maira a Iehova i te au pure a te aronga e akamori ra iaia. Karanga aia ma te aroa: “E kapiki mai oki kotou iaku, e aere oki kotou e pure mai iaku, e naku e akarongo atu ia kotou.”​—Ieremia 29:12.

“Tamou marie tikai i te pure.”​—Roma 12:12.

I roto i te Pipiria, kua akamaroiroi ia tatou kia “pure” e kia “tukumoe kore, i te au pure ravarai.” Taka meitaki, te inangaro maira te Atua ko Iehova ia tatou kia pure kiaia.—Mataio 26:41; Ephesia 6:18.

Eaa ra te Atua i inangaro ei ia tatou kia pure kiaia? Akamanako ana: Koai ïa metua kare e inangaro i tana tamaiti meangiti kia kapiki mai e “Tati, ka rauka ia koe te tauturu mai iaku”? E tika, penei kua kite takere te metua tane e ka anoano tana tamaiti i te tauturu, inara me akarongo aia ki tana e pati maira, te akaari maira te reira e te irinaki e te akavaitata ra tana tamaiti kiaia. Me te reira rai, me pure tatou ki te Atua ko Iehova, te akaari ra tatou e te irinaki e te akavaitata ra tatou kiaia.​—Maseli 15:8; Iakobo 4:8.

“E uri i to kotou tumatetenga katoa ki runga iaia; koia oki te tiaki mai ia kotou.”​—1 Petero 5:7.

Inangaro te Atua ia tatou kia pure kiaia no te mea te inangaro e te manako maira aia ia tatou. Kua kite meitaki aia i to tatou au manamanata, te tu taitaia, e te inangaro ra aia i te tauturu ia tatou.

I roto i tona oraanga, kua pure te Ariki ko Davida ki te Atua ko Iehova no te tauturu e te akakite kiaia i tona au manako. (Salamo 23:1-6) Eaa to te Atua manako ia Davida? Kua inangaro te Atua ia Davida e kua akarongo aia ki tana au pure. (Angaanga 13:22) Me te reira rai, ka akarongo mai te Atua ki ta tatou au pure no te mea te manako maira aia ia tatou.

E tuatua teia na te tata salamo i roto i te Pipiria. Kua papu iaia e kua akarongo te Atua ki tana au pure e kua tauturu maata te reira iaia. Kua akavaitata aia ki te Atua e kua rauka iaia te maroiroi no te akakoromaki i te au tu taitaia e te mamae o tona oraanga.​—Salamo 116:1-9.

Me papu ia tatou e te akarongo maira te Atua i ta tatou au pure, ka tuatua ua atu rai tatou kiaia. Akamanako ana i tei tupu kia Pedro, tei noo ana i te tua tokerau i Paniora. Kua mate atu tana tamaiti i roto i tetai ū anga motoka. E 19 rai ona mataiti. I tona turanga taitaia, kua akakite a Pedro i tona mamae ngakau ki te Atua e kua pure putuputu aia no te pumaana e te tauturu. Eaa tei tupu mai? “Kua pau mai a Iehova i tana pure na te tu akapumaana e te tauturu a te au taeake Kerititiano kiaia e tana vaine,” i karanga ai a Pedro.

Noatu kare te pure i akaora mai te tamaiti a Pedro, kua tauturu ra te reira iaia e tona ngutuare tangata. Kua tuatua tana vaine ko María Carmen e: “Kua tauturu te pure iaku kia akakoromaki i toku mamae ngakau. Kite au e kua mārama a Iehova i toku turanga no te mea me pure au kiaia, ka kite au i te ‘au e te tu marū.”

Te akaari maira te au tupuanga i roto i te Pipiria e pera to te tangata e te akarongo maira te Atua i te au pure. Inara, te akaari katoa maira e kare te Atua e akarongo ki te au pure katoatoa. Eaa ra te Atua ka pau mai ei i tetai au pure e kare i tetai?