E Mea Maaniia Ainei?

Kauanga Karape a te Ika Tamanu

● E ruru ei i tana au ua, e kau ana te maataanga o te ika tamanu ki uta i te kauvai, na roto i te vai koko. Akapeea ratou me autu i tetai kauanga roiroi kore? Ma te kore e tuku i te au no te pakoko o te vai, e taangaanga ana teia au ika i te reira. Akapeea ra?

Akamanako ana: Kare te ika tamanu e kau pakari ana na roto i te vai pakoko. Me kau ratou ki uta, ka akono ratou i to ratou maroiroi na te taangaanga anga i te au rua vai koko, e tupu ana i te ngai e tae ana te vai na roto i te toka, te au atava rakau, me kore tetai atu au apinga. E tupu maira te au rua vai koko i te nga tua roai o tetai apinga, ka amingi te au ika i to ratou kopapa mei tetai tua ki tetai, e akaneke atu ei ia ratou na rotopu i te vai koko. (Akara i te tutu.) E taangaanga ana tetai pupu ika i te au rua vai koko tei akatupuia e te au ika e kau ra na mua ia ratou, na te aru anga ia ratou. E taangaanga katoa ana te ika i te vai koko tei akatupuia e to ratou uaorai au kopapa!

Te manako ra te aronga kimikimi i te kopi i te kau karape a te ika tamanu no te akatupu anga i te ririnui mei te vai tae marie. Tei matauia e akatupu ana te matini pamu vai ririnui i te uira kia akatae i te vai mei te 5.8 maire i te ora (9.3 kiro mita i te ora) me kore viviki atu. Teianei ka rauka i tetai matini te taangaanga ra i tetai rua vai koko, kia tuku mai i te uira mei roto i te vai tae marie e rua maire i te ora. * Inara, kare te matini i aite ki te tu karape tikai tei kiteaia i roto i taua ika ra ko te tamanu. Kua akatika te Poropeta ko Michael Bernitsas o te Apii Univetiti o Michigan, U.S.A. e: “Kare o matou kite karape mei to teia ika rai.”

Eaa toou manako? E mea tupu ua ainei te tu karape o te ika tamanu no te akatere i te ririnui mei te vai koko? Me kore, e mea maaniia ainei?

[Tataanga Rikiriki i Raro]

[Akameitakianga no te Tutu i te kapi 15]

Top: © photolibrary. All rights reserved.