Neke ki te tumu manako rikiriki

Neke ki te ngai o te au tumu tuatua

“Inangaro Au i te Tatara!”

“Inangaro Au i te Tatara!”

 “Inangaro Au i te Tatara!”

Te akaari maira tetai are mako kore e kare e akono meitakiia ana. I te au mataiti i aereia, meitaki ua te reira i roto i te au uriia, kare ra te katoatoa i puapingaia. I teianei, kua paruparu te are, akaraanga e ka pururu te reira ki raro.

TE AKATAKA maira te reira akatutuanga i te turanga o te au akaipoipo e manganui i teia tuatau. Te manako ra ainei koe e penei te kino atura toou uaorai akaipoipo? Me koia ia, kia papu e e tupu ana te au manamanata ki te aronga akaipoipo. Ko te tikaanga, te akakite tikai maira te Pipiria e ko te aronga tei akaipoipo ka kite mai i “te mamae e te taitaia.”​—⁠1 Korinetia 7:28, The New English Bible.

I te akamanako anga i te tikaanga o taua au tuatua ra, te akataka maira tetai pupu kimikimianga e ko te akaipoipo “te ravenga kino roa atu e rave putuputuia nei e te maataanga o te au tangata i roto i to tatou taiate tangata.” Kua tuatua katoa ratou e: “Ko tei akamata mai ei pirianga rekareka maata e te taputouanga ka riro mai ei taitaia anga maata tikai e te mamae i roto i te oraanga o tetai tangata.”

Akapeea ra toou akaipoipo? Te akaari maira ainei e tai tu me kore i te au tu i raro akenei?

● Taumaro putuputu

● Tuatua akakino

● Tiratiratu kore

● Akamoupuku

Me te akaraanga paruparu ra ainei toou akaipoipo e te kino atura te reira, eaa taau ka rave? Ko te kopaeanga ainei te pauanga?

[Pia/​Tutu i te kapi 3]

‘KUA RIRO MAI EI PEU MATAUIA’

I roto i tetai au enua, te maata atura te numero o te au tokorua akaipoipo e kopae ra. E akamanako ana ia Marike, kare te kopaeanga e kite matauia ana i te au mataiti e manganui. I muri ake i te mataiti 1960, kua tata a Barbara Dafoe Whitehead i roto i tana puka The Divorce Culture, e “te maata atura te kopaeanga.” Kua akakite mai aia e: “Kua maata rava atu i roto i te ngauru mataiti e te kake maata ua atura e tae ua atu ki te akamataanga o te mataiti 1980, e i vai ua ai te reira ki te turanga teitei rava i rotopu i te au taiate tangata puapinga i te tua Opunga. Tei tupu mai no teia kake maata viviki anga, e toru ngauru ua rai mataiti i topa, kua riro mai te kopaeanga ei peu matauia i roto i te oraanga o te au tangata Marike.”