ATIKARA APII 41
IMENE 13 Te Mesia, to Tatou Akaraanga
Ta Tatou ka Apii Mei to Iesu au Rā Openga e 40 i te Enua Nei
“E a ngauru anga ona po i te akara angaia e ratou, e te tuatua anga atu i te tuatua no te basileia o te Atua.” —ANGA. 1:3.
AKAKOROANGA
Akapeea tatou me aru i to Iesu akaraanga i tona au rā openga e 40 i te enua nei.
1-2. Eaa tei tupu ki te nga pipi a Iesu ia raua e aere ra ki te oire ko Emausa?
IA NISANA 16, 33 T.N., kua taitaia e kua mataku te au pipi a Iesu. E rua pipi tei akaruke ia Ierusalema e kua aere atu ki tetai oire ko Emausa, e 11 kiro mita te mamao mei ia Ierusalema. Kua maromaroa teia nga tangata no te mea kua tamateia to raua Atu ko Iesu, ta raua i aru ana i mua ana. Kua kore to raua manakonakoanga no te Mesia. Inara, kua tupu tetai apinga umere kia raua.
2 Kua aere mai tetai tangata i te aravei ia raua. Kua akakite te nga pipi kiaia i te au mea kino tei tupu kia Iesu. Inara, kua tuatua teia tangata i te au apinga kare e ngaropoina ia raua. “Mei ia Mose e tae rava akera ki te au peroveta katoa,” kua akamārama aia i te tumu i takinokinoia ai e i tamateia ai te Mesia. Te tae anga ratou ki Emausa, kua kite mai raua e ko Iesu taua tangata ra ta te Atua i akatu mai! Akamanako ana i to raua mataora te kite anga e kua ora te Mesia!—Luka 24:13-35.
3-4. Eaa tei tupu ki ta Iesu au pipi, e eaa ta tatou ka apii mai i roto i teia atikara? (Angaanga 1:3)
3 Kua noo ana a Iesu e 40 rā i te enua i mua ake ka aere ei aia ki te rangi e kua mama mai aia ki tana au pipi i tera tuatau. (E tatau ia Angaanga 1:3.) Kua akamaroiroi a Iesu i tana au pipi tei maromaroa e te mataku. Tei tupu, kua mataora ratou e kua ngakau toa i te tutu aere e te apii i te nuti meitaki no runga i te Patireia. a
4 Ka puapingaia tatou mei te apii anga no runga i ta Iesu i rave i tera tuatau i roto i tona oraanga. I teia atikara, ka uriuri tatou akapeea a Iesu (1) me akamaroiroi i tana au pipi, (2) te tauturu ia ratou kia mārama i te au irava, e te (3) te tereni ia ratou kia rave i ta ratou au apainga. E oti, ka kite mai tatou akapeea me aru i to Iesu akaraanga.
AKAMAROIROI I TETAI KE
5. Eaa te au pipi a Iesu i anoanoia ai kia akamaroiroiia?
5 Kua anoanoia te au pipi a Iesu kia akamaroiroiia. No teaa ra? Kua akaruke tetai pae i to ratou kainga, ngutuare tangata, e te pitiniti no te aru ia Iesu. (Mata. 19:27) Tetai pae, kua takinokinoia ratou no tei riro mai ei pipi na Iesu. (Ioa. 9:22) Kua rave ratou i te au tauianga no te mea kua irinaki ratou e ko Iesu te Mesia taputouia. (Mata. 16:16) Inara te tamateia anga a Iesu, kua maromaroa e kua taitaia ratou no te mea kare ratou i kite eaa te ka tupu kia ratou.
6. Eaa ta Iesu i rave i muri ake i tona tuakaouanga?
6 Kua mārama a Iesu i te tumu i maromaroa ai tana au pipi no tona matenga. Kua kite aia e kare ratou i ngere i te akarongo. I te rā i akatuakaouia ai aia, kua akamaroiroi aia i tona au oa. Ei akaraanga, kua mama aia ki mua ia Maria Magadala iaia e aue ra i ko i te ngai tanumanga. (Ioa. 20:11, 16) Kua aravei katoa aia i te nga pipi e teretere ra ki Emausa tei taikuia i te akamataanga o teia atikara. Kua aravei katoa aia i te apotetoro ko Petero. (Luka 24:34) Eaa ta tatou ka apii mei to Iesu akaraanga? Akamanako ana i tei tupu te mama anga aia ki mua ia Maria Magadala.
7. Ia Ioane 20:11-16, eaa ta Iesu i kite ia Maria e rave ra i te popongi ia Nisana 16, e eaa ta Iesu i rave? (Akara katoa i te tutu.)
7 E tatau ia Ioane 20:11-16. I te popongi maiata ia Nisana 16, kua aere atu tetai au vaine ki te ngai tanumanga o Iesu. (Luka 24:1, 10) Ka uriuri tatou i te akaraanga o te vaine ko Maria Magadala. Te tae anga a Maria ki te ngai tanumanga, kare te kopapa o Iesu i reira. Kua oro aia i te akakite kia Petero e Ioane e kua aru atu raua iaia ki te ngai tanumanga. Kua kite raua e kare te kopapa o Iesu i reira e kua oki atu raua ki to raua ngutuare. Kua noo atu a Maria e kua aue aia. Inara, kare aia i kite e te akara maira a Iesu iaia. Te aue ra a Maria e kua inangaro a Iesu i te akapumaana iaia. No reira, kua mama aia ki mua ia Maria e kua akamaroiroi atu iaia. Kua akakite aia kia Maria kia kave i tetai karere puapinga ki tona au taeake. Nana e akakite ki tona au taeake e kua ora akaou a Iesu.—Ioa. 20:17, 18.
Aru ia Iesu na te akapumaana anga i te au taeake tei taitaia (Akara i te parakarapa 7)
8. Akapeea tatou me aru ia Iesu?
8 Akapeea tatou me aru ia Iesu? Mei ia Iesu, ka akamaroiroi tatou i te au taeake e te au tuaine kia tavini ua rai ia Iehova me kite tatou e te taitaia ra ratou. Akamanako i te akaraanga o te tuaine ko Jocelyn, kua mate tona teina i roto i tetai tumatetenga. Karanga aia: “Kua taitaia tikai au no tetai tuatau roa.” Inara, kua pati tetai taeake e tana vaine iaia ki to raua kainga, kua akarongo meitaki kiaia e kua akapapu e te akaperepere ra a Iehova iaia. Karanga a Jocelyn: “Kua tumatetenga au. Mei te mea e te maremoia ra au i roto i te moana uriia. Inara kua taangaanga a Iehova i teia nga tokorua ei akaora mai iaku. Kua tauturu raua iaku kia tavini ua atu rai ia Iehova.” Ka rauka katoa ia tatou i te akamaroiroi i tetai ke me akarongo meitaki ki to ratou au manako taitaia, te akapumaana ia ratou e te akamaroiroi ua rai ia ratou kia tavini i te Atua.—Roma 12:15.
TAUTURU I TETAI KE KIA MĀRAMA I TE TUATUA A TE ATUA
9. Eaa te au manamanata ta te au pipi a Iesu i na roto e akapeea a Iesu te tauturu anga ia ratou?
9 Kua āriki te au pipi a Iesu i te Tuatua a te Atua e kua taangaanga i te reira i roto i to ratou oraanga. (Ioa. 17:6) Noatu ra, kare ratou i mārama i te tumu i tamateia ai a Iesu ei tangata rave kino. Kua kite a Iesu e kua inangaro tana au pipi ia Iehova inara, kua anoanoia ratou kia mārama i te Tuatua a te Atua. (Luka 9:44, 45; Ioa. 20:9) E kua akamārama a Iesu i te reira kia ratou. Akamanako ana i tana i rave te mama anga aia ki mua i te nga pipi i runga i te mataara ki Emausa.
10. Akapeea a Iesu te tauturu anga i tana au pipi kia kite e koia te Mesia? (Luka 24:18-27)
10 E tatau ia Luka 24:18-27. Kare a Iesu i akakite vave ki te nga pipi e koai aia. Mari ra, kua ui aia i te au uianga. Eaa te tumu? Penei kua inangaro aia ia raua kia akakite i to raua manako. Kua manako raua e ka riro mai a Iesu ei ariki no Iseraela e ka akaora ia ratou mei te tutaraanga a Roma. I muri ake te akakite anga raua i to raua manako, kua taangaanga a Iesu i te au irava ei tauturu ia raua kia mārama eaa tei tupu. b I taua po ra, kua akapapu a Iesu i teia au tuatua mou ki tana au pipi ke. (Luka 24:33-48) Eaa ta tatou ka apii mai mei teia akaraanga?
11-12. (a) Eaa ta tatou ka kite mai mei ta Iesu apii anga i te Pipiria? (Akara katoa i te au tutu.) (e) Akapeea te puapii o Nortey te tauturu anga iaia?
11 Akapeea tatou me aru ia Iesu? Mea mua, me apii koe i taau aronga apii Pipiria, e ui i te au uianga kia kite i to ratou manako. (Mase. 20:5) Me mārama koe i to ratou turanga, e akaari akapeea me kimi i te au irava te ka tauturu ia ratou. Auraka e akakite eaa ta ratou ka rave. Mari ra, e ui i te au uianga no runga i te au irava e te akamaroiroi ia ratou kia akamanako oonu i te au kaveinga Pipiria e kia taangaanga i te reira. Akamanako i te akaraanga o Nortey no Ghana mai.
12 E 16 mataiti o Nortey, kua akamata aia i te apii i te Pipiria. Inara i muri mai, kua patoi tona ngutuare tangata iaia. Eaa tei tauturu iaia kia apii ua atu i te Pipiria? Kua akamārama tona puapii ia Mataio pene 10 e ka takinokinoia te au Kerititiano mou. Karanga a Nortey: “Te tupu anga te takinokinoanga, kua papu iaku e ko te tuatua mou teia.” Kua akaari katoa te taeake ia Mataio 10:16 e kua uriuri raua akapeea teia irava me tauturu ia Nortey kia akamārama i tona irinakianga ki tona ngutuare tangata na roto i te tu marū. I muri ake i tona papetitoanga, kua inangaro a Nortey i te painia, inara kua inangaro tona metua tane kia aere aia ki te apii teitei. Kare te taeake i akakite kia Nortey eaa tana ka rave mari ra, kua ui aia i te au uianga no te tauturu iaia kia akamanako i te au kaveinga Pipiria e kia rave i te au ikianga puapinga. Tei tupu, kua akamata a Nortey i te painia tamou. Kua tuaru tona metua tane iaia mei te kainga. Eaa to Nortey manako no tei tupu kiaia? Karanga aia: “Kua papu taku ikianga.” Me akamaroiroi tatou i tetai ke kia akamanako i te au irava, ka tauturu tatou ia ratou kia riro mai ei Kerititiano pakari.—Ephe. 3:16-19.
Aru ia Iesu na te tauturu anga i tetai ke kia mārama i te au irava (Akara i te parakarapa 11) e
TAUTURU I TE AU TAEAKE KIA RAVE I TA RATOU AU APAINGA
13. Eaa ta Iesu i rave kia akono i te angaanga a tona Metua me oki aia ki te rangi? (Ephesia 4:8)
13 Iaia i te enua nei, kua rave meitaki a Iesu i te angaanga a tona Metua. (Ioa. 17:4) Inara kare a Iesu i manako ana e koia anake ua te ka rave i to Iehova anoano. No reira, e toru e te āpa mataiti iaia e tutu aere ra kua tereni katoa aia i tetai ke. Te oki anga aia ki te rangi, kua oronga aia i te au apainga ki tana au pipi, penei e 20 tuma o ratou mataiti, kia tutu aere e te apii i nuti meitaki ma te akono i to Iehova iti tangata. (E tatau ia Ephesia 4:8.) I tona au rā openga e 40, akapeea a Iesu te tauturu anga i teia au taeake tiratiratu e te maroiroi kia riro mai ei ‘aronga meitaki’?—Ephe. 4:8.
14. I tona au rā openga e 40 i te enua, akapeea a Iesu te akamaroiroi anga i tana au pipi kia akono i te apainga? (Akara katoa i te tutu.)
14 Kua oronga a Iesu i te akoanga ki tana au pipi ei tauturu ia ratou. Ei akaraanga, kua kite aia e kare tetai pae o tana au pipi i irinaki ana e kua mate aia e kua akatuakaouia mai. No reira, kua ako aia ia ratou auraka kia manako ekoko. (Luka 24:25-27; Ioa. 20:27) Kua akamaroiroi katoa aia ia ratou kia akono i to Iehova iti tangata e eiaa e akaputu i te moni. (Ioa. 21:15) Kua akamaara katoa aia kia ratou auraka e akaaite ia ratou ki tetai ke i roto i ta Iehova angaanga. (Ioa. 21:20-22) E kua akatikatika aia i to ratou au manako tarevake no runga i te Patireia e kua akamaroiroi ia ratou kia tutu aere i te nuti meitaki. (Anga. 1:6-8) Eaa ta te aronga pakari ka apii mei te akaraanga o Iesu?
Aru ia Iesu na te tauturu anga i te au taeake kia rave i ta ratou au apainga (Akara i te parakarapa 14)
15-16. (a) Akapeea te aronga pakari me aru i te akaraanga o Iesu? Akamārama mai. (e) Akapeea a Patrick te puapingaia anga mei te ako?
15 Akapeea te aronga pakari me aru i te akaraanga o Iesu? Ka tereni ratou i te au taeake e te au mapu tane kia rave i te au angaanga i roto i te putuputuanga. c Kare te aronga pakari e manako e kua kite takere teia au taeake i te angaanga. Mari ra, ka oronga ratou i te akoanga ki teia au mapu kia akaari i te tu akaaka, tiratiratu e te tavini i tetai ke.—1 Timo. 3:1; 2 Timo. 2:2; 1 Pete. 5:5.
16 Akamanako akapeea te taeake ko Patrick te puapingaia anga mei te ako. I tona mapuanga, kua akakino aia i te au tuaine. Kua kite tetai tangata pakari i to Patrick tu paruparu e kua ako maru atu iaia. Karanga a Patrick: “Kua āriki au i tana ako. E taitaia ana au me orongaia te au apainga taku i inangaro ki tetai ke. Kua tauturu te ako a te tangata pakari iaku kia kite e ka anoanoia au kia tavini akaaka i toku au taeake e te au tuaine, e auraka kia akamou ki runga i te au apainga i roto i te putuputuanga.” Tei tupu, e 23 o Patrick mataiti, kua ikiia aia ei tangata pakari.—Mase. 27:9.
17. Akapeea a Iesu te akaari anga e kua irinaki aia i tana au pipi?
17 Kua oronga a Iesu i te apainga ki tana au pipi kia tutu aere e te apii i te nuti meitaki. (Mata. 28:20) Penei kua ekoko te au pipi e kare e rauka ia ratou i te rave i ta Iesu e pati maira. Inara, kua akamaroiroi a Iesu ia ratou e ka rauka rai ia ratou i te rave i te angaanga. Kua irinaki papu a Iesu ia ratou e kua karanga: “Mei te Metua oki i tono mai iaku nei, e tono katoa oki au ia kotou.”—Ioa. 20:21.
18. Akapeea te aronga pakari me aru i te akaraanga o Iesu?
18 Akapeea te aronga pakari me aru i te akaraanga o Iesu? Ka tereni te aronga pakari i tetai ke kia rave i te au apainga. (Phili. 2:19-22) Ei akaraanga, ka pati ratou i te au mapu e te tamariki kia tamā e kia akono i te Are Uipaanga Patireia. Ka tereni te aronga pakari ia ratou akapeea me rave i te angaanga ma te irinaki e ka rave ratou i te reira. Kua mataora tetai tangata pakari ko Matthew i te terenianga a te aronga pakari kia rave i te au angaanga tukeke i roto i te putuputuanga e to ratou irinaki e ka rave aia i te reira. Karanga aia, “Me rave au i tetai tarevake, ka tauturu ratou iaku kia kite akapeea au me akatikatika i te reira.” d
19. Eaa ta tatou ka anoanoia kia rave?
19 Kua akapou a Iesu i tona au rā openga e 40 i te enua nei no te akamaroiroi, apii e te tereni i tetai ke. No reira, kia aru vaitata katoa tatou i tona akaraanga. (1 Pete. 2:21) Ka tauturu aia ia tatou kia rave i te reira e kua taputou aia: “Tei vaitata ua ra au ia kotou, e tae ua atu ki te openga o teianei ao.”—Mata. 28:20.
IMENE 15 Akapaapaa i ta Iehova Tama Mua!
a I roto i te au Evangelia e te au puka Pipiria ke atu, e maata te au atianga i mama ai a Iesu tei akatuakaouia mai ki mua i tetai ke mei ia: Maria Magadala (Ioa. 20:11-18); tetai au vaine ke (Mata. 28:8-10; Luka 24:8-11); te nga pipi e rua (Luka 24:13-15); Petero (Luka 24:34); au apotetoro, kare ra ia Toma (Ioa. 20:19-24); au apotetoro e ia Toma (Ioa. 20:26); tokoitu au pipi (Ioa. 21:1, 2); e 500 tuma pipi (Mata. 28:16; 1 Kori. 15:6); tona teina ko Iakobo (1 Kori. 15:7); te au apotetoro pouroa (Anga. 1:4); e ki te au apotetoro vaitata ia Betania. (Luka 24:50-52) Penei kare i rekotiia tetai au atianga ke i roto i te Pipiria.—Ioa. 21:25.
b Kia kite i te au totou no te Mesia, akara i te atikara i runga i te jw.org “Akapapu Maira Ainei te Totou no te Mesia e ko Iesu te Mesia?”
c Tetai taime, ka ikiia te au taeake tau e 25 tuma o ratou mataiti ei au akaaere kotinga. Inara, ka anoanoia ratou na mua kia tavini ei aronga pakari.
d Kia kite akapeea me tauturu i te au taeake mapu kia rave i te au apainga, tatau i Te Punanga Tiaki o Aukute 2018, kapi 13-14, para. 15-17, e ia Aperira 15, 2015, kapi 3-13.
e AKATAKA ANGA TUTU: Muri ake i tona mārama anga i te au irava, kua iki te tangata apii i te titiri i tana au apinga akamanea no te Keritimiti.
