1. Eaa te au tauturu ta Iesu i oronga mai kia tatou?

 KARE e tangata i aite kia Iesu i te tauturu i tetai ke. Iaia i te enua, kua taangaanga aia i tona mana ei tauturu i tetai ke. (Luka 9:​12-17) Tei maata atu, kua oronga aia i tona oraanga no te tangata. (Ioa. 15:13) Mei tona tuakaouanga, te tauturu nei rai a Iesu ia tatou. Kua pati aia kia Iehova kia oronga i tona vaerua tapu ei apii e te akapumaana ia tatou. (Ioa. 14:​16, 17; 16:13) E na roto i te au uipaanga, te tereni nei a Iesu ia tatou kia akariro i te tangata ei pipi nana.—Mata. 28:​18-20.

2. Koai ma te aronga meitaki e taikuia ra i roto ia Ephesia 4:​7, 8?

² Akamanako akaou i tetai tauturu ta Iesu i oronga mai no tatou. Kua tata te apotetoro ko Paulo e i te aere anga a Iesu ki te rangi, kua oronga mai aia i “te meitaki i te tangata nei,” te au taeake kia akono i te putuputuanga. (E tatau ia Ephesia 4:​7, 8.) Karanga a Paulo e kua oronga a Iesu i teia aronga kia rave i te au angaanga tukeke i roto i te putuputuanga. (Ephe. 1:​22, 23; 4:​11-13) Ka kapiti mai te au tavini tauturu, te aronga pakari e te au akaaere kotinga. a Inara e aronga apa ua ratou. (Iako. 3:2) Noatu ra, kua oronga a Iesu Karaiti i teia aronga akaperepere ei tauturu ia tatou.

3. Akatutu mai akapeea tatou me tauturu i teia aronga akaperepere.

³ Kua oronga mai a Iesu i te au taeake akaperepere ei akamaroiroi i te putuputuanga. (Ephe. 4:12) Ka tauturu katoa tatou ia ratou kia akono i ta ratou au apainga. Ei  akatutuanga: E rave ana tetai pae i te angaanga pātu Are Uipaanga Patireia. Tetai pae ka tauturu ratou i te angaanga na te akapapa i te kai, te apinga akaoro e te oronga i te au apinga tei anoanoia. Pera katoa, na roto i ta tatou e tuatua ra e e rave ra, ka tauturu tatou i te au tavini tauturu, aronga pakari e te au akaaere kotinga. I teianei, ka uriuri tatou i te puapinga ka rauka mei ta ratou angaanga pakari, e akapeea tatou me akameitaki ia ratou e ia Iesu, tei oronga mai i teia au taeake ei tauturu ia tatou.

RAVE TE AU TAVINI TAUTURU I TE AU ANGAANGA TAUTURU

4. Eaa tetai au angaanga kua rave te au tavini tauturu i te anere mataiti mua?

⁴ I te anere mataiti mua, kua ikiia tetai au taeake ei tavini tauturu. (1 Timo. 3:8) I te akaraanga, kua rave ratou i te au angaanga tauturu ta Paulo i tata. (1 Kori. 12:28) Kua rave ratou i te au angaanga puapinga i roto i te putuputuanga kia rauka i te aronga pakari i te apii e te akamaroiroi i te au taeake. Ei akaraanga, ka kopi te au tavini tauturu i te au irava e ka oko i te au mea tei anoanoia no te reira.

5. Eaa tetai au angaanga e rave ana te au tavini tauturu i teia tuatau?

⁵ Akamanako ana i te au angaanga puapinga a te au tavini tauturu i roto i te putuputuanga i teia tuatau. (1 Pete. 4:10) Ka akono ratou i te au akanoonooanga no te moni, te au mapu tutu aere, ka ōta i te au puka na te au papuritia, akatangi i te au apinga autio e te vitio, ka tavini ei aronga raverave e ka tauturu i te akono i te Are Uipaanga Patireia. Ka anoanoia teia au angaanga kia akaaere meitakiia te putuputuanga. (1 Kori. 14:40) Kapiti mai, ka rave ratou i te au tuanga no te uipaanga Oraanga Kerititiano e te Angaanga Orometua e te oronga i te au ako na te katoatoa. Ka ikiia tetai tavini tauturu ei tauturu i te akaaere no te pupu tutu evangelia. I tetai taime, ka aru aia i tetai tangata pakari no te akamaroiroi i te au papuritia.

6. Eaa tetai au tumu i akaperepere ei tatou i te au tavini tauturu?

⁶ Akapeea te putuputuanga me puapingaia mei te angaanga a te au tavini tauturu? Karanga a Beberly, b e tuaine no Bolivia mai: “Kia akameitakiia te au tavini tauturu no te mea e mataora ana au i te uipaanga. Ka imene au, ka paupau, ka akarongo i te au ako e te tamou i te au apiianga mei te au vitio e te au tutu. Ka paruru ratou i te au taeake i ko i te uipaanga e te tauturu i te au taeake kia akarongo na runga i te vitio karangaranga. Me akamutu te uipaanga, ka rave ratou i te tamā anga, tauturu i te ko’i moni e te akapapu kua rava te puka na te katoatoa. Ka akameitaki au ia ratou!” Karanga a Leslie, no Colombia mai: “E tangata pakari taku tane e e anoano ana aia i te tauturu a teia au taeake no te akono i te au angaanga tukeke i roto i te putuputuanga. Mari ua ake ta ratou tauturu, kua māmā mai tana apainga e te akameitaki nei au ia ratou.” Penei ko teia rai toou manako.—1 Timo. 3:13.

7. Akapeea tatou me akameitaki i te au tavini tauturu i roto i te putuputuanga? (Akara katoa i te tutu.)

⁷ Noatu ka āriki rekareka tatou i te angaanga a te au tavini tauturu, te akamaroiroi maira te Pipiria kia akameitaki ia ratou. (Kolo. 3:15) Kua akakite a Krzysztof, e tangata pakari no Finland i  tona rekareka: “Ka tata au i tetai kāti e te tuku karere ki tetai tavini tauturu e te taiku i te irava ei akamaroiroi e te akameitaki iaia.” Ko Pascal e Jael, e noo ana raua ki New Caledonia, e pure putuputu ana raua no te au tavini tauturu. Karanga a Pascal, “Ka pure putuputu maua no te au tavini tauturu e kia akameitaki a Iehova ia ratou e kia tauturu i teia au taeake.” Ka akarongo a Iehova ki teia au pure e ka puapingaia te putuputuanga.—2 Kori. 1:11.

TE ARONGA PAKARI TEI “RAVE I TE ANGAANGA A TE ATU KI ROTO IA KOTOU”

8. Eaa a Paulo i tata ai e te angaanga maroiroi ra te aronga pakari i te anere mataiti mua? (1 Tesalonia 5:​12, 13)

⁸ I te anere mataiti mua, kua angaanga maroiroi te aronga pakari i roto i te putuputuanga. (E tatau ia 1 Tesalonia 5:​12, 13; 1 Timo. 5:17) Te akono ra ratou i te putuputuanga e ka rave i te au ikianga ei pupu aronga pakari. Ka “ako atu” ratou i te au taeake e te au tuaine ei paruru i te putuputuanga. (1 Tesa. 2:​11, 12; 2 Timo. 4:2) Ka angaanga pakari katoa teia au taeake no te akono i to ratou ngutuare e te akaketaketa i to ratou pirianga kia Iehova.—1 Timo. 3:​2, 4; Tito 1:​6-9.

9. Eaa te au angaanga e rave ana te aronga pakari i teia tuatau?

⁹ I teia tuatau, e rave maroiroi ana te aronga pakari i te angaanga. E rave ana ratou i te angaanga apii evangelia. (2 Timo. 4:5) Ka maroiroi ratou i te tutu aere, ka akanoo i te au ngai tutu aere, e ka tereni ia tatou kia tukatau i te tutu aere e te apii i te tangata. Ka akava katoa ratou i te aronga ara ma te aroa. Me rave tetai taeake i te ara kino, ka tauta te aronga pakari i te tauturu iaia kia rauka akaou tona pirianga kia Iehova. E ka paruru katoa ratou i te putuputuanga kia vai mā ua. (1 Kori. 5:​12, 13; Gala. 6:1) Ko te angaanga maata a te aronga pakari, ko te tiaki i te putuputuanga. (1 Pete. 5:​1-3) Ka akapapa e ka oronga ratou i te au akoanga Pipiria, ka aravei i te au taeake e ka akamaroiroi ia ratou. Tetai pae, ka tauturu i te angaanga pātu Are Uipaanga Patireia e te akono i te reira, ka akaaere i te au angaanga no te uruoaanga, ka tavini i roto i te Kumiti Aremaki, te Pupu Atoro Aronga Maki e te vai atura. Ka angaanga maroiroi te aronga pakari no tatou!

10. Eaa te au tumu ka akaperepere tatou i te aronga pakari?

¹⁰ Kua totou a Iehova e ka akono meitaki te au tiaki ia tatou e “kare atura [tatou] e mataku akaou, kare oki e tumatetenga.” (Iere. 23:4) Ko teia ta Johanna, e tuaine i Finland i kite i te tupu anga te maki kino ki tona mama. Karanga aia: “E mea ngatā i te akakite i toku manako ki tetai ke. Inara, kua akarongo ua mai tetai tangata pakari kiaku, kua pure kapiti maua e kua akamaroiroi mai aia iaku e te inangaro maira a Iehova iaku. Kare i maara iaku tana au tuatua inara, kua marū toku ngakau. Irinaki au e kua tono mai a Iehova iaia kia tauturu iaku i te tuatau ngatā.” Akapeea te aronga pakari i roto i taau putuputuanga te tauturu anga ia koe?

11. Akapeea koe me akameitaki atu i te aronga pakari? (Akara katoa i te tutu.)

¹¹ Ka inangaro a Iehova ia tatou kia aroa atu i te aronga pakari “no ta [ratou] angaanga.” (1 Tesa. 5:​12, 13) Karanga a Henrietta, e noo ana aia i Finland: “E tauturu ua ana te aronga pakari i te au taeake, inara kare te aiteanga e maata to  ratou tuatau e te maroiroi, e kare o ratou manamanata. Tetai taime, ka karanga au kia ratou: ‘Kite koe eaa? E tangata pakari meitaki tikai koe. Inangaro au i te akakite atu i teia.’” Karanga tetai tuaine ko Sera no Türkiye c mai: “Ka anoano te aronga pakari i te akamaroiroianga. No reira, ka tata tatou i tetai kāti na ratou, ka kaikai kapiti e ka rave kapiti i te angaanga tutu aere.” E tangata pakari ainei tetai i roto i taau putuputuanga ka akameitaki koe? E rave i te reira.—1 Kori. 16:18.

AKAMAROIROI TE AU AKAAERE KOTINGA IA TATOU

12. Eaa te akanoonooanga no te akamaroiroi i te putuputuanga i te anere mataiti mua? (1 Tesalonia 2:​7, 8)

¹² Kua oronga mai a Iesu i tetai au taeake kia tauturu i te putuputuanga na roto i tetai mataara ke. Kua taangaanga aia i te aronga pakari i Ierusalema kia tono atu ia Paulo, Banaba e tetai ke ei au akaaere tutaka. (Anga. 11:22) No teaa ra? Kia akamaroiroi i te putuputuanga; mei tei raveia e te au tavini tauturu e te aronga pakari katoa. (Anga. 15:​40, 41) Kua rave teia au taeake i te au atinga no te apii e te akamaroiroi i te au taeake.—E tatau ia 1 Tesalonia 2:​7, 8.

13. Eaa te au angaanga a te akaaere kotinga?

¹³ E maata te au ngai e atoro ana te au akaaere kotinga. Ka teretere tetai pae ki te au putuputuanga mamao. I te au epetoma, ka oronga ratou i te au ako, ka akamaroiroi i te au taeake, ka rave i te au uipaanga na te au painia, te aronga pakari e te uipaanga tutu aere. Ka akapapa aia i te au ako e ka akaaere i te au akaputuputuanga kotinga e te uruoaanga.  Ka apii aia i ko i te apii na te au painia, ka akapapa i tetai uipaanga takake na te au painia i roto i tana kotinga, e ka akono i tetai au angaanga rapurapu ta te opati Betela i oronga kiaia.

14. Eaa te au tumu i akaperepere ei tatou i te au akaaere kotinga?

¹⁴ Akapeea te au putuputuanga i puapinga ai mei te angaanga maroiroi a te au akaaere kotinga? Karanga tetai taeake no Türkiye no te au akaaere tutaka: “Kua akamaroiroi ta ratou atoroanga iaku kia akapou maata i te tuatau ki toku au taeake e te au tuaine. E maata taku au akaaere kotinga i aravei; e kua inangaro ratou i te pukapuka kiaku.” Ko Johanna, tei taikuia i mua ana, kua angaanga kapiti raua ko te akaaere kotinga i te tutu aere, inara kare e tangata i te kainga. Karanga aia: “Te maara nei iaku tera rā. Kua neke toku nga tuakana ki tetai ngai ke e te mii ra au ia raua. Kua tauturu te akaaere kotinga iaku kia kite e i roto i te angaanga a Iehova, e tuatau poto ua to tatou takake anga mei tetai e tetai. Inara i roto i te ao ou, e maata te tuatau no ratou.” Ka akaperepere katoa tatou i te au akaaere kotinga no ta ratou au angaanga.—Anga. 20:37–21:1.

15. (a) Ia 3 Ioane 5-8, akapeea tatou me akameitaki i te au akaaere kotinga? (Akara katoa i te tutu.) (e) Eaa te tumu ka āriki rekareka tatou i ta ratou vaine, e akapeea tatou me rave i te reira? (Akara i te pia “ E Akamaara i ta Ratou Vaine.”)

¹⁵ Kua akamaroiroi te apotetoro ko Ioane ia Gaio kia aroa i te au akaaere tutaka e “kia tauturu [aia] ia ratou i to ratou tere, i tei tau i te tavini o te Atua.” (E tatau ia 3 Ioane 5-8.) Ko tetai mataara ka rave tatou i teia, na te pati anga i te akaaere kotinga kia kaikai kapiti tatou. E tetai, na te tutu aere anga me atoro  mai aia i te putuputuanga. Ko Leslie, tei taikuia i mua ana, e akaari ana aia i tona aroa na tetai mataara ke. Karanga aia: “E pure ana au kia oronga mai a Iehova i tana e anoano ra. Kua tata maua ko taku tane i te au reta no te akakite i to maua āriki rekareka i tana tauturu.” E akamaara, e tupu ana te au manamanata ki te au akaaere kotinga e ka roiroi ratou. Ka rokoia ratou e te maki, te manako taitaia e te maromaroa. No reira, ka riro taau tuatua akameitaki ei akamaroiroi i te akaaere kotinga!—Mase. 12:25.

E AKAPEREPERE TATOU I TEIA AU TAEAKE

16. Ia Maseli 3:​27, eaa te au uianga ka ui te au taeake kia ratou uaorai?

¹⁶ I teianei ao, ka anoanoia te au taeake kia tavini ei au tiaki meitaki. Me e taeake papetitoia koe e “tei to rima rai taua meitaki ra kia o atu,” ka rauka ainei ia koe i te tauturu? (E tatau ia Maseli 3:27.) Te aruaru ra ainei koe kia riro mai ei tavini tauturu? Ka rauka ainei ia koe i te akono i toou au taeake ei tangata pakari? d Ka rauka ainei ia koe i te rave i te au tauianga kia tau koe no te aere ki te Apii na te Aronga Tutu Evangelia? Ka tereni te apii ia koe kia aru i te akaraanga o Iesu. E pure kia Iehova no te tauturu kia akono koe i teia au apainga.—Luka 11:13; Anga. 20:28.

17. Eaa ta te au taeake akaperepere e akapapu maira no runga i to tatou Ariki ko Iesu Mesia?

¹⁷ Ko te au taeake ta Iesu i iki ei aronga tiaki, te akapapu maira ratou e te arataki nei aia ia tatou i teia tuatau openga. (Mata. 28:20) Te mareka nei tatou e e Ariki aroa ua to tatou tei kite i te tauturu tei anoanoia e tatou e kua oronga mai i teia au taeake kia akamaroiroi ia tatou. No reira, e kimi i te au tuatau no te akameitaki i teia aronga angaanga maroiroi. Kia akameitakiia a Iehova koia te Tumu o “te au mea memeitaki i o maiia ra, e te au mea tika ravarai.”—Iako. 1:17.