Neke ki te tumu manako rikiriki

Neke ki te rua o te ngai ka akaari mai i te au puka

Neke ki te ngai o te au tumu tuatua

Au Kite o Iehova

Reo Rarotonga

Eaa Tikai ta te Pipiria e Apii Maira?

 APENETIKI

Akapeea ta Daniela Totou i te Akakite Anga i te Taenga Mai o te Mesia

Akapeea ta Daniela Totou i te Akakite Anga i te Taenga Mai o te Mesia

I NOO ana te peroveta ko Daniela e tere atu i te 500 mataiti i mua ake i te anau anga o Iesu. Noatu rai, kua oronga a Iehova i te akakite anga kia Daniela te ka rauka i te tou ki te tuatau e akatainuia ai a Iesu, me kore e akataoongaia ai, ei Mesia, me kore ei Karaiti. Kua akakiteia kia Daniela: “E teianei kia kite koe, e kia taka tikai,  mei te riro anga o te tuatua, i te rave akaou e te patu ia Ierusalema e tae rava atu ki te Mesia te Ariki ra, e itu ïa ebedoma, e nga ebedoma oki e ono ngauru ma rua.”​—Daniela 9:25.

I te akataka anga i te tuatau o te taenga mai o te Mesia, ka anoanoia tatou na mua kia kite i te ngai akamataanga o te tuatau tei taki atu ki te Mesia. Kia tau ki te totou, kua tupu ia “mei te riro anga o te tuatua, i te rave akaou e te patu ia Ierusalema.” I naea teia “riro anga o te tuatua” i tupu ei? Kia tau ki te tangata tata Pipiria ko Nehemia, kua tupu te riro anga o te tuatua no te patu akaou i te au patu takapini ia Ierusalema “i te mataiti tai takau o te ariki ra o Aretekasaseta.” (Nehemia 2:​1, 5-8) Te akapapu maira  te au tata tuatua enua i te mataiti 474 M.T.N. ko te mataiti katoa mua ia o Aretekasaseta ei tutara. No reira, i te 20 mataiti o tona tutara anga ko te 455 M.T.N. I teianei kua rauka ia tatou te ngai akamataanga no te totou Mesia a Daniela, koia oki, te 455 M.T.N.

Te akakite maira a Daniela eaa te roa o te tuatau e taki atura ki te taenga mai o te “Mesia te Ariki” e ope ei. Te taiku ra te totou “e itu ïa ebedoma, e nga ebedoma oki e ono ngauru ma rua”​—e 69 epetoma te katoaanga. Eaa te roa o teia tuatau? E maata te au urianga Pipiria e akakite ra i teia, kare i te au epetoma o te itu ra, mari ra e au epetoma o te au mataiti. Koia oki, okotai epetoma e itu e ra au mataiti. Teia manako o te au epetoma o te au mataiti, me kore e au tuku anga itu mataiti, kua matauia e te au ngati Iuda o te au tuatau taito. Ei akatauanga, e akono ana ratou i tetai mataiti Tapati i te au itu mataiti ravarai. (Exodo 23:​10, 11) No reira, te 60 epetoma totouia e 69 au tuku anga o te 7 mataiti takitai, me kore e 483 mataiti te katoaanga.

I teianei ta tatou ka rave e tare. Me tare tatou mei te 455 M.T.N., e 483 mataiti ka tae tatou ki te mataiti 29 T.N. Ko te mataiti tikai te reira i papetitoia ai a Iesu e kua riro mai ei Mesia! * (Luka 3:​1, 2, 21, 22) Kare ainei te reira i tetai akatupu anga umere o te totou Pipiria?

^ para. 2 Mei te 455 M.T.N. ki te 1 M.T.N. e 454 mataiti. Mei te 1 M.T.N. ki te 1 T.N. okotai ia mataiti (kare e mataiti kare). E mei te 1 T.N. ki te 29 T.N. e 28 mataiti. Me tare kapitiia teia au numero e toru ka rauka mai ia tatou e 483 mataiti te katoaanga. Kua ‘tipu keia’ a Iesu kia mate i te 33 T.N., i te tuatau o tetai 70 epetoma o te au mataiti. (Daniela 9:​24, 26) E akara i te Pay Attention to Daniel’s Prophecy! pene 11, e te Insight on the Scriptures, Voriumu 2, kapi 899-901. Kua neneiia raua roa ai e te Au Kite o Iehova.