Neke ki te tumu manako rikiriki

Neke ki te rua o te ngai ka akaari mai i te au puka

Neke ki te ngai o te au tumu tuatua

Au Kite o Iehova

Reo Rarotonga

Nuti Meitaki no ko i te Atua!

 APII 12

Akapeea Koe me Akavaitata Atu ki te Atua?

Akapeea Koe me Akavaitata Atu ki te Atua?

1. Te akarongo maira ainei te Atua i te au pure ravarai?

Te pati maira te Atua i te au tangata ravarai kia akavaitata atu kiaia na roto i te pure. (Salamo 65:2) Inara, kare aia e akarongo mai ana me kore e ariki mai ana i te au pure ravarai. Ei akaraanga, kare te au pure a tetai tangata tei takinokino i tana vaine e akarongoia mai. (1 Petero 3:7) Pera katoa, te rave anga te ngati Iseraela i te kino, kare te Atua i akarongo mai ana ki ta ratou pure. Taka ua ra e, e tikaanga ngateitei te pure. Inara, ka ariki mai te Atua i te au pure a te aronga tei rave i te ara kino me tataraara ratou.​—E tatau ia Isaia 1:15; 55:7.

2. Akapeea tatou me pure?

E tuanga no ta tatou akamorianga te pure, no reira ka pure anake ua tatou ki Tei Anga mai ia tatou, ko Iehova. (Mataio 4:10; 6:9) Pera katoa, no te mea e aronga apa ua tatou, ka pure tatou na roto i te ingoa o Iesu no te mea kua mate aia no ta tatou au ara. (Ioane 14:6) Kare a Iehova e inangaro ana ia tatou kia ripiti ua i te au pure tei tamou ngakauia me kore tei tataia. Te inangaro ra aia kia pure tatou mei roto mai i to tatou ngakau.​—E tatau ia Mataio 6:7; Philipi 4:6, 7.

Te akarongo katoa maira Tei Anga mai ia tatou i te au pure muteki ua. (1 Samuela 1:12, 13) Te pati maira aia kia pure tatou i te au atianga ravarai, mei te akamataanga e i te openga o te ra, i te tuatau kaikai, e me aro atu tatou i te au manamanata.​—E tatau ia Salamo 55:22; Mataio 15:36.

3. Eaa ra te au Kerititiano ka uipa taokotai ei?

Kare i te mea mama i te akavaitata atu ki te Atua, no te mea te noo nei tatou i rotopu i te au tangata kare e irinaki ana i te Atua e te aviri ra i tana taputou no tetai turanga au i te enua nei. (2 Timoteo 3:1, 4; 2 Petero 3:3, 13) No reira tatou ka anoano  ei i te kapitianga akamaroiroianga o te au taeake irinaki e te anoano maira ratou ia tatou.​—E tatau ia Ebera 10:24, 25.

Te kapitianga ki te au tangata tei inangaro i te Atua, ka riro ei tauturu ia tatou kia akavaitata atu ki te Atua. E atianga meitaki tikai te au uipaanga a te Au Kite o Iehova kia akamaroiroiia mai e te akarongo o etai ke.​—E tatau ia Roma 1:11, 12.

4. Akapeea koe me akavaitata atu ki te Atua?

Ka rauka ia koe i te akavaitata atu kia Iehova na te akamanako oonu anga i taau i apii mai mei tana Tuatua. Akamanako ana i tana au angaanga, tana akoanga, e tana au taputou. Te tauturu maira te pure e te akamanako oonu anga ia tatou kia marama tikai i te puapinga o to te Atua aroa e te pakari.​—E tatau ia Iosua 1:8; Salamo 1:1-3.

Ka rauka ia koe i te akavaitata atu ki te Atua me irinaki koe iaia e me tuku koe i toou akarongo ki roto iaia. Inara mei tetai ua rakau rai te akarongo te anoanoia ra kia angaiia. E mea tau kia angai putuputu koe i toou akarongo na te akamanako anga i te tumu o toou irinakianga.​—E tatau ia Mataio 4:4; Ebera 11:1, 6.

5. Akapeea koe e puapinga ai me akavaitata atu ki te Atua?

Te manako maira a Iehova i te aronga e inangaro ra iaia. Ka paruru aia ia ratou mei tetai au mea te ka takino i to ratou akarongo e to ratou manakonakoanga no te ora mutu kore. (Salamo 91:1, 2, 7-10) Te akamatakite maira aia ia tatou no runga i te au mea no te oraanga te ka takino mai i to tatou oraanga kopapa e te tu mataora. Te apii maira a Iehova ia tatou i te arataa meitaki rava atu o te oraanga.​—E tatau ia Salamo 73:27, 28; Iakobo 4:4, 8.