Neke ki te tumu manako rikiriki

Neke ki te rua o te ngai ka akaari mai i te au puka

Neke ki te ngai o te au tumu tuatua

Au Kite o Iehova

Reo Rarotonga

Koai ma te Rave ra i to Iehova Anoano i Teia Tuatau?

 Apii 3

Akapeea te Tuatua Mou Pipiria i Kitea Akaouia Mai Ei?

Akapeea te Tuatua Mou Pipiria i Kitea Akaouia Mai Ei?

Aronga Apii Pipiria, au mataiti 1870

Itiu mua o Te Punanga Tiaki, 1879

Te Punanga Tiaki i teia tuatau

Kua totou mai te Pipiria e i muri ake te mate anga o Karaiti, ka na roto mai te au orometua pikikaa i te au Kerititiano mua e ka taui i te tuatua mou Pipiria. (Angaanga 20:29, 30) Kare i roa ana kua tupu mai te reira. Kua taui ratou i te au apiianga a Iesu ki te au manako akonoanga peikani, e kua tupu mai tetai tu Akonoanga Kerititiano pikikaa. (2 Timoteo 4:3, 4) Akapeea i papu ei ia matou i teia tuatau e kua marama meitaki matou eaa tikai ta te Pipiria e apii maira?

Kua tae te tuatau no Iehova i te akakite mai i te tuatua mou. Kua totou mai aia e i ‘te tuatau openga, ka tupu maata mai te kite.’ (Daniela 12:4) I te mataiti 1870, kua kite mai tetai pupu meangiti e kimi ra i te tuatua mou e e maata te au apii a te ekaretia kare no roto mai i te Tuatua Tapu. No reira, kua kimi ratou i te akamaramaanga a te au apiianga mua o te Pipiria, e kua tauturu a Iehova ia ratou kia marama i te au tuatua tapu.

Kua apii meitaki te au tangata ngakau tae i te Pipiria. Kua aruaru taua Aronga Apii Pipiria ra, i mua ake ia matou, i te rave i tetai ravenga meitaki no te apii anga, e te taangaanga nei matou i te reira i teia tuatau. Kua uriuri ratou i te au tumu manako tataki tai o te Pipiria. Me kite ratou i tetai irava Pipiria kare ratou e marama ana, kua kimi ratou i tetai au irava ke mai i te akamarama i te reira. Me marama ratou i te reira e te rotai ra te manako ki te katoaanga o te au Tuatua Tapu, kua tata ratou i te reira. Na te tuku anga i te Pipiria kia akamarama mai i te au irava, kua kitea akaouia mai e ratou te tuatua mou no runga i te ingoa o te Atua e tona Patireia, tona akakoroanga no te au tangata e no te enua nei, te turanga o tei mate, e te manakonakoanga no te tuakaouanga. Kua tauturu taua kimikimi anga ra ia ratou kia akaruke i te au apiianga e te au peu pikikaa.Ioane 8:31, 32.

Tae anga ki te mataiti 1879, kua marama te Aronga Apii Pipiria e kua tae te tuatau i te akakitekite aere i te tuatua mou. No reira i taua mataiti rai, kua akamata ratou i te nenei i te makatini, Te Punanga Tiaki Akakiteanga i te Patireia o Iehova, mei ta matou e nenei nei i teia tuatau. Teianei te akakite nei matou i te tuatua mou Pipiria ki te au tangata i roto i te 239 enua e mei tetai au 700 reo. Kua totoa maata atu te kite tuatua mou, tei kare rava i tupu ana i mua ana!

  • Muri ake te mate anga o Karaiti, eaa tei tupu mai ki te tuatua mou Pipiria?

  • Akapeea i kitea akaouia mai ei e matou te tuatua mou mei te Tuatua a te Atua?