Neke ki te tumu manako rikiriki

Neke ki te rua o te ngai ka akaari mai i te au puka

Neke ki te ngai o te au tumu tuatua

Au Kite o Iehova

Reo Rarotonga

Eaa Tikai ta te Pipiria e Apii Maira?

APENETIKI

Te Kaikai Anga Aiai a te Atu —E Akono Anga te Akangateitei ra i te Atua

Te Kaikai Anga Aiai a te Atu —E Akono Anga te Akangateitei ra i te Atua

TE AKAUEIA ra te au Kerititiano kia akono i te Akamaara Anga o te matenga o Karaiti. Te kapiki katoaia ra teia akono anga e ko te “kaikai anga aiai a te Atu ra.” (1 Korinetia 11:20, NW) Eaa te reira i puapinga rava ai? Aea e akapeea te reira te akono angaia?

Kua akatumu a Iesu Karaiti i teia akono anga i te po o te Pasa ngati Iuda i te 33 T.N. E akono anga te Pasa tei raveia okotai taime i te mataiti, i te ra 14 o te marama Nisana ngati Iuda. Te tare anga i te reira ra, e tiaki tikai ana te ngati Iuda i te equinox tuatau tupu anga rakau. E ra teia te vai ra mei te 12 ora marama e e 12 ora poiri. Te marama ou mua tei kite vaitataia ki te equinox tuatau tupu anga rakau kua akairo i te akamataanga o Nisana. Kua tae mai te Pasa e 14 ra i muri mai, i muri ake i te opuanga o te ra.

Kua akono a Iesu i te Pasa ma tana au apotetoro, kua tuaru ia Iuda Kariota, e i reira kua akatumu i te Kaikai Anga Aiai a te Atu. Kua tupau teia kaikai anga i te Pasa ngati Iuda e no reira kia akonoia okotai anake taime i te mataiti.

Te ripoti ra te Evangeria a Mataio e: “Kua rave iorā Iesu i te manga, e kua akameitaki atura, vava’i iora, tuku atura ki te au pipi, na ko atura, Ka rave, ka kai; ko toku kopapa teia. Kua rave iora aia i te kapu, akameitaki atura, tuku atura kia ratou ra, na ko atura, Ka inu na kotou ravarai; Ko toku ïa toto teia, no te koreromotu ou ra, tei akamaringiia no te tangata e manganui, kia matara te ara.”—Mataio 26:26-28.

Te irinaki ra etai pae e kua taui a Iesu i te manga ki roto i tona kiko tikai e te uaina ki roto i tona toto. Inara, te vai katoatoa ra to Iesu kopapa tangata i tona oronga anga i teia manga. Kua kai tika ainei te apotetoro a Iesu i tona kiko tikai e te inuanga i tona toto? Kare, no te mea e peu kai tangata te reira e te aati ra i te ture a te Atua. (Genese 9:3, 4; Levitiku 17:10) Kia tau kia Luka 22:20, te karanga ra a Iesu e: “Teianei kapu, ko te koreromotu [“ou,” NW] ïa i toku nei toto, e akamaringiia no kotou nei.” Kua riro mai ainei te reira kapu tikai ei ‘koreromotu ou’? Kare rava te reira e rauka, mei te mea e te koreromotu e tuku anga tika ia, kare i tetai apinga ua nei.

Varaoa e te uaina

No reira, te manga e te uaina e nga akatutu anga anake raua. Te akatutu ra te manga i te kopapa apa kore o Karaiti. Kua taangaanga a Iesu i tetai manga varaoa tei toe mai mei te kaikai anga Pasa. Kua tunuia te manga ma te kore e opue, me kore iiti. (Exodo 12:8) Te taangaanga ra te Pipiria i te opue ei akatutu anga o te ara me kore te takino anga. No reira te akatutu ra te manga i te kopapa apa kore ta Iesu i oronga ei atinga. Kare e ara i te reira.—Mataio 16:11, 12; 1 Korinetia 5:6, 7; 1 Petero 2:22; 1 Ioane 2:1, 2.

Te akatutu ra te uaina muramura i te toto o Iesu. Te akapapu ra te reira toto i te koreromotu ou. Kua karanga a Iesu e kua riringiia tona toto “kia matara te ara.” I reira te au tangata e ma ei i roto i te mata o te Atua e e rauka ai i te tomo ki roto i te koreromotu ou ma Iehova. (Ebera 9:14; 10:16, 17) Na teia koreromotu, me kore tika anga, e rauka ai i te 144,000 Kerititiano tiratiratu i te aere ki te rangi. I reira ka tavini ratou ei au ariki e te kau taunga no te akameitakianga o te au tangata katoatoa.—Genese 22:18; Ieremia 31:31-33; 1 Petero 2:9; Apokalupo 5:9, 10; 14:1-3.

Koai ma te ka piri i te kai anga i teia au oroa Akamaara Anga? Ma te tau, ko te aronga anake ua i roto i te koreromotu ou—koia oki, te aronga e manakonakoanga to ratou no te aere ki te rangi—ka tau kia kai i te manga e te uaina. Te akapapu ra te vaerua tapu o te Atua i taua aronga e kua ikiia ratou ei au ariki i te rangi. (Roma 8:16) Tei roto katoa ratou i te koreromotu Patireia ma Iesu.—Luka 22:29.

Akapeea te aronga e manakonakoanga to ratou no te nooanga i te enua Parataito e tuatau ua atu? Te akarongo ra ratou i te akauenga a Iesu e te aere ra ki te Kaikai Anga Aiai a te Atu, inara e aronga akara ua ratou ma te akono ngateitei, kare ei aronga te ka piri i te kai anga. Okotai taime i te mataiti i muri ake i te opu anga ra ia Nisana 14, e akono ana te Au Kite o Iehova i te Kaikai Anga Aiai a te Atu. Noatu e e manga tauatini ua i te ao katoa e akatutu ra i te manakonakoanga no te rangi, te riro ra teia akono anga ei mea akaperepere ki te au Kerititiano katoatoa. E atianga te reira ka rauka i te katoatoa i te akamanako i te aroa maata tikai o te Atua ko Iehova e Iesu Karaiti.—Ioane 3:16.

← Akara i te pene taikuia