Neke ki te tumu manako rikiriki

Neke ki te rua o te ngai ka akaari mai i te au puka

Neke ki te ngai o te au tumu tuatua

Au Kite o Iehova

Reo Rarotonga

Eaa Tikai ta te Pipiria e Apii Maira?

APENETIKI

Eaa ra a Teoro e Ate?

Eaa ra a Teoro e Ate?

I ROTO i tona au reo mua, te taangaanga ra te Pipiria i te tuatua Epera sheʼohl′ e tona aiteite i te reo Ereni hai′des e tere atu i te 70 taime. Teia nga tuatua no runga ia i te mate. Te tuatua ra etai au urianga Pipiria ia raua e ko te “ngai tanumanga,” ko “era,” me kore te “vaarua.” Inara, i te maata anga o te au reo kare e tuatua te akataka tikai ra i te aiteanga o teia nga tuatua Epera e te Ereni. No reira te taangaanga ra te New World Translation i te nga tuatua “Teoro” e te “Ate.” Eaa tikai te aiteanga o teia nga tuatua? Ka akara ana tatou e akapeea raua i te taangaanga angaia i roto i te au irava Pipiria ke ke.

Te akakite ra a Koheleta 9:10 e: “Kare oki e angaanga, kare e kimianga, kare oki e kite, kare oki e pakari, i roto [“ia Teoro,” NW] te vaarua taau e aere na.” Ko te aiteanga ainei o teia e te tou ra a Teoro ki tetai ngai tanumanga, me kore e ngai takake tikai, te ngai penei i tanu ei tatou i tetai ra tei akaperepereia? Kare. Me taiku te Pipiria i tetai ngai tanumanga, me kore vaarua tikai, te taangaanga ra i tetai atu au tuatua Epera e te Ereni, kare a sheohl′ e hai′des. (Genese 23:7-9; Mataio 28:1) Pera katoa, kare te Pipiria e taangaanga ana i te tuatua “Teoro” no tetai ngai tanumanga e maata te au tangata i tanu kapitiia ki reira, mei tetai ngai tanumanga no te pamiri me kore tetai ngai tanumanga maatamaata.—Genese 49:30, 31.

Eaa i reira te ngai “Teoro” e tuatuaia ra? Te akakite ra te Tuatua a te Atua ia “Teoro,” me kore “Ate,” no tetai mea tei maata roa atu i tetai vaarua maatamaata tikai. Ei akaraanga, te akakite ra a Isaia 5:14 ia Teoro ei ‘maata te kaki, e i amama ua’i tona vaa kare e aite.’ Ei akatutu anga, noatu e kua apuku takere a Teoro i te au tangata mate e manganui, ka kaki maata ua atu rai aia. (Maseli 30:15, 16) Kare mei tetai ua atu ngai tanumanga tikai, e manga numero kotinga ua te aronga mate ka o ki reira, ‘kare a ade e iu ana.’ (Maseli 27:20) Koia oki, kare rava a Teoro e ki. Kare ona au kotinga. Ko Teoro, me kore Ate, kare ia i tetai ngai tikai ma tetai ngai akakoro tikaiia. Mari ra, ko te vaarua matauia o te au tangata mate ra, e ngai akatutu anga no te maata anga o te au tangata tei moe ra i te mate.

Ka riro te apiianga Pipiria o te tuakaouanga ei tauturu ia tatou kia rauka maata atu te kite oonu ki roto i te aiteanga o “Teoro” e “Ate.” Te akapiri ra te Tuatua a te Atua ia Teoro e Ate ki te tu mate ka rauka te tuakaouanga.* (Iobu 14:13; Angaanga 2:31; Apokalupo 20:13) Te akaari katoa maira te Tuatua a te Atua i te aronga i roto ia Teoro, me kore ia Ate, ka kapiti mai kare anake te aronga tei tavini ia Iehova mari katoa ra te manganui tei kore i tavini iaia. (Genese 37:35; Salamo 55:15) No reira, te apii maira te Pipiria e e “tuakaouanga to tei mate, te aronga tuatua-tika e te aronga tuatua-tika kore.”—Angaanga 24:15.


*  Ei akatuke anga, te aronga tei mate ra kare e akatuia mai te akatutuia ra, e kare i roto ia Teoro, me kore ia Ate, mari ra “i Keena.” (Mataio 5:30; 10:28, NW; 23:33) Mei ia Teoro e Ate, kare a Keena i tetai ngai tikai.

← Akara i te pene taikuia