Neke ki te tumu manako rikiriki

Neke ki te rua o te ngai ka akaari mai i te au puka

Au Kite o Iehova

Reo Rarotonga

No Teaa ra te Au Kite o Iehova Kare e Akamaara i te rā Anau Anga?

No Teaa ra te Au Kite o Iehova Kare e Akamaara i te rā Anau Anga?

Kare te Au Kite o Iehova e akamaara ana i te rā anau anga no te mea te irinaki ra ratou e ka riro teia au akamaaraanga ei akamareka kore i te Atua. Noatu e kare te Pipiria i akakite tika mai kia kore e akamaara i te rā anau anga, ka tauturu teia ia tatou kia akamanako i te au tupuanga puapinga kia mārama i to te Atua manako no runga i teia. Akamanako ana e ā au tupuanga e te au kaveinga Pipiria.

  1. E peu etene te akamaara anga rā anau anga. Kia tau ki ta Funk & Wagnalls Standard Dictionary of Folklore, Mythology, and Legend, no ko mai teia akamaara anga i te irinaki anga e i te rā anau anga o tetai “ka tamaki atu te au vaerua kino e ka akanauru i te aronga no ratou te akamaara anga” e me “tae mai te au taeake ma ta ratou au tuatua akapaapaa, ka paruruia te tangata nona te akamaara anga.” Karanga te puka The Lore of Birthdays e i te au tuatau taito, kua riro te au papaanga rā anau anga “ei mea puapinga no te akara i te au akairo etu” tei akatumuia ki runga i “te kite umere o te akara etu.” Karanga katoa teia puka e i roto i te irinaki anga taito, “te au kanara rā anau anga, e manamana umere to te reira no te oronga i te au manakonako anga.”

    Inara, te akaapa ra te Pipiria i te au ravenga manamana, te tauraatua, te purepure, e tetai ua atu mea mei teia te tu. (Deuteronomi 18:14; Galatia 5:19-21) Te tikaanga, tetai tumu kua akautunga te Atua i te oire taito o Babulonia no te mea kua taangaanga te iti tangata i te peu akara etu, koia oki e peu tauraatua. (Isaia 47:11-15) Kare te Au Kite o Iehova e manako maata atu i te au peu ravarai, inara me oronga mai te au Tuatua Tapu i te aratakianga taka meitaki, kare tatou e kopae i te reira.

  2. Te au Kerititiano mua, kare ratou i akamaara ana i te rā anau anga. Karanga The World Book Encyclopedia e “kua manako ratou i te akamaara anga i te rā anau anga o tetai tangata ei peu etene.” Te akakite maira te Pipiria e kua akatumu te au apotetoro e tetai pae i ta Iesu au apiianga ei akaraanga kia aru te au Kerititiano ravarai.—2 Tesalonia 3:6.

  3. Te akamaaraanga anake ua ta te au Kerititiano i umuumuia kia akono, ko te matenga o Iesu, kare ko tona rā anau anga. (Luka 22:17-20) Kare teia i te mea poitirere, no te mea te karanga ra te Pipiria e meitaki maata atu “te rā e mate ei ra i te rā anau anga.” (Koheleta 7:1) I te tae anga ki te openga o tona oraanga i te enua nei, kua akatupu a Iesu i tetai ingoa meitaki ma te Atua, te akariro anga i te rā o tona matenga ei mea puapinga maata atu i tona rā anau anga.—Ebera 1:4.

  4. Kare rava te Pipiria i taiku ana e kua akamaara tetai tavini o te Atua i te rā anau anga. Kare teia i te mea tarevake no te mea kua tataia e rua rā anau anga tei akonoia e te aronga kare e tavini ana i te Atua. Inara, kua riro teia nga tupuanga ei mea kino.—Genese 40:20-22; Mareko 6:21-29.

Te manako ra ainei te tamariki a te Au Kite e te akangereia ra ratou no te kare e akamaara i te rā anau anga?

Mei te au metua meitaki ra, e aroa ana te Au Kite i ta ratou tamariki i te au mataiti ravarai, kapiti mai te oronga anga i te apinga aroa na ratou e te tamataoraanga meitaki. Ka tauta ratou i te aru i te akaraanga apa kore o te Atua, tei oronga ua i te au mea meitaki ki tana tamariki. (Mataio 7:11) Kare te tamariki a te au metua e Au Kite ratou e manako ana e te ngere ra ratou, mei ta teia au tuatua e akakite ra:

  • “E reka ana au me rauka mai tetai apinga aroa me kare koe e manako atu i te reira.”—Tammy, 12 mataiti.

  • “Noatu e kare aku apinga aroa i toku rā anau anga, ka oko rai toku nga metua i te au apinga aroa i tetai atu au atianga. E reka ana au i te reira no te mea ka poitirere oki au.”—Gregory, 11 mataiti.

  • “Te manako ra ainei koe e tai ngauru miniti, e manga kēke venevene, e tetai imene, e tamataoraanga ïa? Aere mai kotou ki toku kainga ka kite kotou eaa tikai teia apinga e tamataoraanga!”—Eric, 6 mataiti.

Apii Maata Atu

NUTI MEITAKI NO KO I TE ATUA!

Akapeea Tatou e Puapinga ai Mei te au Kaveinga Pipiria?

Akamarama mai a Iesu eaa ra tatou ka anoano ei i te aratakianga e ko teea te nga kaveinga Pipiria puapinga atu.