Neke ki te tumu manako rikiriki

Neke ki te rua o te ngai ka akaari mai i te au puka

Au Kite o Iehova

Reo Rarotonga

Eaa te Au Kite o Iehova ka Kore ei e Akono i te Keritimiti?

Eaa te Au Kite o Iehova ka Kore ei e Akono i te Keritimiti?

Au manako tarevake tei matauia

Mea Maani ua: Te tumu kare te Au Kite o Iehova e akono ana i te Keritimiti no te mea kare ratou e irinaki ana ia Iesu.

Te tika: E Kerititiano matou. E irinaki ana matou e ka na roto mai te ora ia Iesu Karaiti.—Angaanga 4:12.

Mea Maani ua: Te akatakake ra kotou i te au ngutuare tangata na te apiianga i te au mema kia kore e akono i te Keritimiti.

Te Tika: Te manako oonu ra matou i te au ngutuare tangata, e te taangaanga nei matou i te Pipiria ei akamaroiroi maata atu i te au ngutuare tangata.

Mea Maani ua: Te ngere ra kotou i te “tamataora anga Keritimiti” o te tu oronga ua, te au i te enua nei, e te meitaki ki te au tangata.

Te Tika: Te tauta ra matou i te oronga ua ma te au i te au rā ravarai. (Maseli 11:25; Roma 12:18) Ei akaraanga, te rotai ra ta matou au uipaanga e te tutu aere anga ki te ikuikuanga a Iesu: “E mea o mai ua to kotou, e oronga ua atu oki kotou.” (Mataio 10:8) Tei kapiti atu, te akara ra matou ki te Patireia o te Atua ei manakonakoanga mou no te au i te enua nei.—Mataio 10:7.

Eaa te Au Kite o Iehova ka Kore ei e Akono i te Keritimiti?

  • Kua akaue a Iesu ia tatou kia akamaara i tona mate anga, kare i tona rā anauanga.—Luka 22:19, 20.

  • Kare ta Iesu au apotetoro e te au pipi mua i akono ana i te Keritimiti. Te karanga ra te New Catholic Encyclopedia kua akanooia te “kaikaianga o te anau anga o Iesu i muri ua ake i te 243 [T.N.],” e tere atu i te anere mataiti i muri ake i te mate anga o te apotetoro openga.

  • Kare e akapapuanga e kua anauia a Iesu ia Titema 25; kare tona rā anauanga i rekotiia i roto i te Pipiria.

  • Kua irinaki matou e kare te Keritimiti i marekaia e te Atua no te mea kua akatumuia ki roto i te au peu etene.—2 Korinetia 6:17.

Eaa ka Akariro ei i te Keritimiti ei Mārō Anga?

E manganui te akono nei rai i te Keritimiti e noatu tona au tumu peu etene e noatu kare te Pipiria e turu ana i te reira. Ka ui taua au tangata e: Eaa ra te au Kerititiano ka rave ei i teia tu? Eaa ka akariro ei i te reira ei maro anga?

Te akamaroiroi maira te Pipiria ia tatou kia akamanako oonu, “e tau ïa ia kotou.” (Roma 12:1, 2) Te apii maira te reira kia tatou i te puapinga o te tuatua mou. (Ioane 4:23, 24) No reira koi manako ei tatou i ta tetai pae e manako maira ia tatou, ka aru matou i te au kaveinga a te Pipiria noatu e kare matou e rekaia mai.

Noatu e te iki ra matou kia kore e akono i te Keritimiti, ka akangateitei matou i te tika anga o tetai tangata no te rave atu i te reira. Kare matou e tamanamanata atu i te au tamataora Keritimiti a tetai ke.