Neke ki te tumu manako rikiriki

Neke ki te rua o te ngai ka akaari mai i te au puka

Au Kite o Iehova

Reo Rarotonga

Te Irinaki ra Ainei te Au Kite o Iehova i te Koreromotu Taito?

Te Irinaki ra Ainei te Au Kite o Iehova i te Koreromotu Taito?

Ae. Te irinaki ra te Au Kite o Iehova e ko te katoaanga o te Pipiria, “e mea akauruia mai e te Atua, e e mea meitaki.” (2 Timoteo 3:16) Kapiti maira te Koreromotu Taito e te Koreromotu Ou, mei tei matauia i te kite. E kapiki ana te Au Kite o Iehova i teia nga tuanga o te Pipiria e ko te au Tuatua Tapu Ebera e te au Tuatua Tapu Ereni Kerititiano. Na roto i teia tu, kare matou e akariro ana i tetai au tuanga o te Pipiria ei mea takere me kore kare e puapinga ana.

Eaa ra te au Kerititiano ka anoano ei i te Koreromotu Taito e te Koreromotu Ou?

Kua akauru te Atua i te apotetoro Kerititiano ko Paulo kia tata e: “Te au tuatua ravarai oki i tataia i muatangana, i tataia ïa kia kite tatou.” (Roma 15:4) No reira, e au manako puapinga tetai no tatou i roto i te au Tuatua Tapu Ebera. Kapiti mai ki teia, te oronga maira te reira i te tuatua enua te ka tauturu ia tatou e te au akoanga tau.

  • Tuatua enua ei tauturu ia tatou. Te kapiti maira te au Tuatua Tapu Ebera i tetai rekoti taka meitaki no te au mea angaia e te ara anga te tangata. Naringa kare teia au manako, kare e rauka ia tatou te au pauanga meitaki ki teia au uianga: Noea mai tatou? Eaa te tangata i mate ei? (Genese 2:7, 17) Tei maata atu, kua rekoti mai te au Tuatua Tapu Ebera i ta Iehova akono anga i te au tangata tei na roto i te au turanga mataora e te au manamanata tei aiteite ki to tatou.—Iakobo 5:17.

  • Te akoanga tau. Tei roto i te nga puka Pipiria o Maseli e Koheleta, te au kite pakari mutu kore no te oraanga, ei tuanga no te au Tuatua Tapu Ebera. Te oronga maira te reira i te akoanga kia mataora te oraanga i roto i te ngutuare tangata (Maseli 15:17), kia rauka te manako tau no runga i te angaanga (Maseli 10:4; Koheleta 4:6), e akapeea te au mapu me taangaanga i to ratou turanga mapu kia rauka te mataora maata (Koheleta 11:9–12:1).

Tetai katoa, ka puapingaia tatou mei te apii anga i te Ture a Mose tei rekotiia i roto i te au puka mua e rima o te Pipiria. Noatu e kare te reira au Ture e tau ra no te au Kerititiano, tei roto i reira te au kaveinga puapinga te ka tauturu ia tatou kia rauka tetai oraanga mataora.—Levitiku 19:18; Deuteronomi 6:5-7.