Neke ki te tumu manako rikiriki

Neke ki te rua o te ngai ka akaari mai i te au puka

Au Kite o Iehova

Reo Rarotonga

E Pipiria Ainei ta te Au Kite o Iehova?

E Pipiria Ainei ta te Au Kite o Iehova?

E maata te au urianga Pipiria ta te Au Kite o Iehova e taangaanga ana i roto i ta ratou apii Pipiria. Inara i roto i te au reo i uriia te reira, te āriki rekareka nei matou i te New World Translation of the Holy Scriptures no te mea te taangaanga ra i te ingoa o Iehova, tona tu tika tikai, e te taka meitaki.

  • Taangaanga i te ingoa o te Atua. Tetai aronga nenei Pipiria, kare ratou e akangateitei ana i Tei Tata i te reira. Ei akaraanga, kua taiku mai tetai urianga Pipiria e e 70 tuma tangata tei piri atu ki te maani anga o te reira Pipiria. Inara, kua kiriti takiriia te ingoa o Tei Tata, ko Iehova mei roto i teia Pipiria!

    Inara ko te New World Translation, te akaoki ra i te ingoa o te Atua i te au ngai ravarai tei kiteaia te reira i roto i te tataanga mua o te Pipiria, kare ra te au kumiti tei rave i teia urianga e inangaro ana kia taikuia to ratou ingoa.

  • Tona tu tika tikai. Kare te katoaanga o te au urianga Pipiria e akakite mai i te tika tikai o te karere mua o te Pipiria. Ei akaraanga, tetai urianga te tata ra ia Mataio 7:13 mei teia rai te tu: “Aere na roto i te ngutupa o iti, no te mea e atea te ngutupa e te mama ua o te mataara e tae atu ei ki roto i te a’i tamamae anga.” Inara, kua taangaanga te tataanga mua i te tuatua “mate,” kare i te “a’i tamamae anga.” Penei kua tāru te aronga uri i te tuatua “a’i tamamae anga” no to ratou irinakianga e ka akautungaia te aronga kino ki roto i te a’i tamamae anga e tuatau ua atu. Inara kare teia irinakianga i turuia e te Pipiria. No reira, te akakite ra te New World Translation i te mea tika tikai i te na ko anga e: “Aere na roto i te ngutupa o iti, no te mea e atea te ngutupa e te mama ua o te mataara e tae atu ei ki te mate.”

  • Taka meitaki. Kia tau ki te urianga meitaki o te Pipiria kia tika tikai, kia taka meitaki, e kia māmā ua i te mārama. Akamanako ana i tetai akaraanga. I roto ia Roma 12:11, kua taangaanga te apotetoro ko Paulo i tetai tuatua tona aiteanga e tika, te “pupu maira mei roto i te ngakau.” No te mea kare teia irava e mārama roaia ana i teia tuatau, te uri nei te New World Translation i teia irava na roto i te mataara māmā ua i te mārama. Te karanga ra e “kia maroiroi oki te ngakau” o te au Kerititiano.

Kapiti mai i te taangaanga i te ingoa o te Atua, tona tu tika tikai, e te taka meitaki, e apinga ke atu tetai tei akatuke i te New World Translation: Kua tu’aia te reira kare e tutaki. Tei tupu mai, e mirioni ua atu ka rauka i te tatau i te Pipiria i roto i to ratou reo tupuna—kapiti mai te aronga kare e peke ia ratou i te oko i tetai Pipiria na ratou.