Neke ki te tumu manako rikiriki

Neke ki te rua o te ngai ka akaari mai i te au puka

Au Kite o Iehova

Reo Rarotonga

Akapeea Au me Riro ei Kite no Iehova?

Akapeea Au me Riro ei Kite no Iehova?

Te au takainga tei anoanoia kia riro mai ei Kite no Iehova kua akatakaia e Iesu e ka kiteaia i roto ia Mataio 28:19, 20. Te akapapa ra teia irava i ta tetai tangata ka rave kia riro mai ei pipi na Iesu, te kapiti maira te tuatuaanga, me kore te akakitekiteanga, no runga ia Iehova.

Takainga 1: Apii i ta te Pipiria e apii maira. Kua ikuiku a Iesu i tana au pipi “e akariro i to te pa enua katoa ei pipi . . .; Ma te apii atu ia ratou.” (Mataio 28:19, 20) Te aiteanga tikai o te tuatua “pipi” koia oki e “tangata apii.” Ko te Pipiria, e te au apiianga tikai o Iesu Mesia i roto i reira, te oronga maira i te au akakiteanga taau e anoano ra kia rauka te oraanga mataora e te puapinga. (2 Timoteo 3:16, 17) Ka mataora matou i te tauturu ia koe kia apii i te Pipiria na roto i ta matou porokaramu apii Pipiria kare e tutaki.Mataio 10:7, 8; 1 Tesalonia 2:13.

Takainga 2: Taangaanga i taau e apii ra. Karanga a Iesu e ka anoanoia te aronga apii “kia akono i te au mea katoa [tana] i akaue atu.” (Mataio 28:20) Tera te aiteanga kare taau apii Pipiria ko te taangaanga ua i toou roro—mari ra ka anoanoia koe kia rave i te au tauianga maata ki toou aerenga manako e toou tu. (Angaanga 10:42; Ephesia 4:22-29; Ebera 10:24, 25) I reira ka akakeuia te aronga te akono ra i ta Iesu au akauenga kia rave i ta ratou uaorai ikianga kia aru iaia e te akatapu i to ratou oraanga ki te Atua ko Iehova.Mataio 16:24.

Takainga 3: Kia papetitoia. (Mataio 28:19) I roto i te Pipiria, kua akaaiteia te papetitoanga ki te tanumanga. (Akaaite ia Roma 6:2-4.) E akairo te reira e kua mate koe i toou oraanga taito e kua akamata i te oraanga ou. Tera i reira, ka riro toou papetitoanga ei akakite ki te katoatoa e kua aru takere koe i te nga takainga mua tei akatakaia e Iesu e te pati nei koe i te Atua no te akava ngakau mā.Ebera 9:14; 1 Petero 3:21.

Akapeea au e kite ei kua papa au no te papetito?

E tuatua atu ki te aronga pakari o te putuputuanga. Ka tuatua ratou kia koe ei akapapu e kua mārama koe eaa te ō maira, te taangaanga ra koe i taau i apii e naau rai e iki kia akatapu i toou oraanga ki te Atua.Angaanga 20:28; 1 Petero 5:1-3.

Ka tau ainei teia au takainga no te tamariki a te au metua Au Kite?

Ae. Ka utuutu matou i ta matou tamariki e te “apii ra ia ratou kia pakari ma te ako a te Atu,” mei ta te Pipiria e akaue maira. (Ephesia 6:4) Inara, me maata mai ratou, na ratou rai e iki kia apii, āriki, e kia taangaanga i ta te Pipiria e apii maira i mua ake ka tau ei ratou no te papetito. (Roma 12:2) I te openga, na te au tangata tatakitai e rave i tona uaorai ikianga no te akamorianga.Roma 14:12; Galatia 6:5.