Neke ki te tumu manako rikiriki

Neke ki te rua o te ngai ka akaari mai i te au puka

Au Kite o Iehova

Reo Rarotonga

Neke te Opati Maata o te Au Kite

Neke te Opati Maata o te Au Kite

Ia Tiurai 2009, kua oko te Au Kite o Iehova i tetai potonga enua i te tua tokerau o New York ma te akakoroanga kia neke i to ratou opati maata ki reira. Teia potonga enua e 253 eka e 80 kiro mita te mamao ki te tua tokerau opunga o te opati maata i Brooklyn, New York, te ngai i akanooia ai e ratou mei te 1909 mai.

Mei te 800 Au Kite te ka noo e ka angaanga i ko i teia ngai ou, ka akatuia mai tetai au opati, tetai ngai tunu kai e te puʼa kakau e te ā are nooanga. Kua paraniia tetai ngai vairanga apinga taito ei akaari i te tuatua enua o te Au Kite o Iehova.

Ka akatuia te au are kia tapoki e 45 eka o te potonga enua, e ka taporoporoia te vao rakau e te ngai maūū takapini. No te akamanea anga i te enua kare e āka ngai matie i te pakoti. Mari ra, ka akarotai i te are ki te vao rakau.

Kua maani te aronga parani are i te akatu i te au are kia kore e kaimoumou i te uira e te au apinga, e tei tupu ka taporoporoia te enua e kare e maata te moni ka pou i te akono i te reira. Ei akaraanga, ka tapokiia te tauu o te are ki tetai rakau matutu kare e āka angaanga i te akono, e tona akakoroanga kia kore te ua e taʼe e kia maanaana a roto i te au are. Ka taangaanga te au opati i te marama o te rā kia turama i te reira. E mea puapinga katoa kia taporoporo e te paruru i te vai.

Eaa te tumu i paraniia ai kia neke? I teianei na tetai au opati Betela o te Au Kite o Iehova i te au enua ke e rave ra i te neneianga Pipiria e te au puka Pipiria. I mua ana kua rave anakeia i Brooklyn. I te 2004, kua neke te angaanga neneianga e te tuku atu ki te au enua ke mei Marike ki Wallkill, New York mei tetai 145 kiro mita i te tua tokerau opunga o Brooklyn.

Kua akamanako katoaia te moni tei pou. E āka moni e pou ra i te taangaanga e te akono i te au ngai i Brooklyn. Na te neke anga ki tetai ngai meangiti ake e te vaitata, ka taangaanga meitaki te Au Kite o Iehova i te moni oronga ua ei turuturu i ta ratou angaanga apii Pipiria.

Ka anoanoia tetai akara anga i te turanga o te enua i mua ake ka orongaia ai te tikaanga kia akatu. Me akatikaia mai, ka akamata te angaanga pātu are i te 2013 e ka oti i roto i te ā mataiti.

Kapiti mai ki te ngai neneianga i Wallkill, New York, e ngai ke atu to te Au Kite o Iehova no te apii i Patterson, New York. Na te akaaerenga e akatere i te au opati Betela i te au enua e manganui. Takapini i teianei ao, tere atu i te itu e te āpa mirioni Au Kite o Iehova.