Neke ki te tumu manako rikiriki

Neke ki te rua o te ngai ka akaari mai i te au puka

Au Kite o Iehova

Reo Rarotonga

E Tauatini ua Atu Tei Atoro i te Opati Betela i Central America

E Tauatini ua Atu Tei Atoro i te Opati Betela i Central America

I te mataiti 2015, vaitata rai e 175,000 manuiri tei turoto i te opati Betela o te Au Kite o Iehova i Mexico​—mei tetai 670 i te au rā ravarai! Maata te aronga turoto i roto i te au pupu mamaata tei tere na runga i te bus. Tetai pae, kua parani takere i to ratou tere no tetai au marama.

“Tere ki Betela”

No tetai pae, kua anoanoia kia rave i te au akaatinga kia tae ki te opati Betela. Ei akaraanga, e maata te au mema i roto i tetai putuputuanga i Veracruz, Mexico, kare e rava ana ta ratou moni i te tutaki i te bus kia akaoro e 550 kiro mita te mamao. No reira kua akanoo ratou i tetai parani tei kapikiia “Tere ki Betela.” Akaaere ratou i tetai nga pupu kia tunu manga e kia okooko i te reira. Koʼi katoa ratou i te au moina plastic. E toru marama i muri mai, kua rava ta ratou moni no te tere.

Kua pauna ainei te taime? Irinaki ratou e koia ïa. Ei akaraanga, tata mai tetai mapu tane i roto i teia putuputuanga ko Lucio tona ingoa: “Kua akakeuia au e to matou tere ki Betela kia akanoo i te au akakoroanga pae vaerua, e i teianei te tavini maata atu nei au i roto i ta matou putuputuanga.” Karanga a Elizabeth, e 18 ona mataiti: “I ko i te Betela, kua kite mata au i te aroa ngakau tae tei akairo i te aronga e tavini ra ia Iehova. Akamaroiroiia au kia tavini maata atu i te Atua, no reira kua riro mai au ei tavini tamou.”

E Tauatini ua Atu Aronga Turoto

Tetai taime, e tauatini ua atu aronga turoto tei tae mai i te rā okotai. Tauta pakari te aronga angaanga no te Akaaere Turoto i te āriki pumaana atu i teia au manuiri. “Mea akamaroiroi tikai te kite eia aronga tei tae mai,” i karanga ai a Lizzy. “Akaketaketaia toku akarongo me kite i te tu āriki rekareka o te aronga turoto e me rongo i ta ratou au akaatinga anga kia atoro i te opati Betela.”

Ei turou atu i te au tauatini aronga turoto, ka piri mai tetai atu aronga angaanga o te Betela ei arataki i te turoto. Noatu e maata ta ratou angaanga, e mataora ana ratou i te turou atu i te aronga turoto. “Me oti au i te rave i tetai turoto,” i na Juan ei, “kite au i te mata katakata o te au manuiri e kua pauna te taime.”

“Mataora Tikai te Tamariki”

Mataora katoa te tamariki i te turoto i te Betela. Karanga a Noriko, e angaanga ana i roto i te Tipatimani Komupiuta: “E pati ana au i te tamariki turoto me ka inangaro ratou i te tavini i konei i Betela. Ka pau ratou katoatoa, ‘Ae!’” Tetai ngai e reka maata ana te tamariki i te turoto koia oki “Te Ngai o Kaleba.” Ka rauka ia ratou te nenei tutu ma tetai tutu taraiia no Kaleba raua ko Sophia, no roto mai raua i te vitio o te tamariki, Kia Riro ei oa no Iehova. “Mataora tikai te tamariki i te reira,” i na Noriko ei.

E maata te tamariki tei akaari i to ratou āriki rekareka no te angaanga tei raveia i ko i te Betela. Ei akaraanga, ko Henry, e tamaiti rikiriki no Mexico mai, kua akaputu i tana moni i roto i tetai pia ei oronga ua i te reira me tae aia ki te Betela. “Me ka tika, e taangaanga i teia moni kia nenei maata i te puka,” i tata ai aia i runga i te pepa tei kapitiia ki tana moni oronga ua, e kua tata katoa aia, “Akameitaki au ia kotou no te angaanga na Iehova.”

Te Patiia Nei Koe Kia Aere Mai

E rave ana te Au Kite o Iehova i te au turoto aratakiia kare e tutaki i ko i to ratou au opati e te ngai nenei puka takapini i teia ao. Me inangaro koe i te atoro i tetai opati Betela, te pati pumaanaia nei koe kia aere mai. Papu e ka mataora koe i teia atoro anga. Ka rauka te au akakiteanga maata no te turoto i raro ake i te NO RUNGA IA MATOU > AU OPATI E TE TUROTO.