Neke ki te tumu manako rikiriki

Neke ki te rua o te ngai ka akaari mai i te au puka

Au Kite o Iehova

Reo Rarotonga

Turoto Anga i te Tuatua Enua

Turoto Anga i te Tuatua Enua

Ia Okotopa 2012, kua akamata te tere turoto no runga i te tuatua enua o te Au Kite o Iehova i ko i to matou opati maata i Brooklyn, New York. * E akaariarianga tetai no runga i te putotoanga, te au kino, e te autuanga o tetai pae tei aruaru i te oraanga Kerititiano.

Ka rave te au manuiri i tetai tere tuatua enua, akamata ki te tuatau Kerititiano i te 33 T.N. e tae mai ki teia rā. Kua akatuangaia te akaariarianga e ā tuanga, kapiti mai te papaanga tuatau tei akarotai i te au tuanga. I te tuanga takitai, e tumu manako Pipiria tona e ka akaariia na runga i tetai vitio poto te ka rongoia i te reo Papaa, ma te au tata tuatua e ono reo—Itaria, Korea, Paniora, Portugal, Tiapani, e Varani.

Au Tuanga Maata o te Akaariarianga

Te tuanga mua, “Anoano Akenei te Tangata i te Poiri” no roto mai te reira i te au tuatua a Iesu ia Ioane 3:19. Kua totou te Pipiria e ka “tu mai oki [te aronga kino] . . . e tuatua mai i te tuatua mingi.” (Angaanga 20:30) Kua ki teia tuanga i te au akamaaraanga kino ta teia aronga i rave.

Te tuanga rua tona tumu tuatua “Tei Akaue i te Mārama Kia Kakā” no roto mai ia 2 Korinetia 4:6. Te akataka ra te papaanga tuatau mei te openga o te 1800 ki te akamataanga o te 1900. Akamata teia tuanga ki te tua o te pupu tangata tei akamata akaou i te apii i te au Tuatua Tapu e te akakite ra i te tupuanga to ratou mārama e te numero o te aronga irinaki i mua ake i te Tamaki I o te Ao.

Tei aru mai i roto i te tuanga rua ko te akaarianga i te teata rongonui ko te “Photo-Drama of Creation.” I te 1914, kua akamata te Aronga Apii Pipiria (te ingoa mua o te Au Kite o Iehova) i te akaari i teia teata umere, tei kapiti mai te au tutu e te au teata ma te akatangianga rekotiia. I te au mataiti i muri mai, e mirioni ua atu tei akara i teia porokaramu. Kapiti mai i teia akaarianga te au tutu taito, tetai vitio poto no te tuatua mua o te porokaramu, e tere atu i te 500 tutu karakara.

Te tumu tuatua no te tuanga toru “Riri Rava Akera te Taae,” no roto mai ia Apokalupo 12:17. Te akapapa ra te reira i te takinokino anga i te au pipi a Karaiti i te akamataanga o te 20 anere mataiti e te akaari ra i te au tua umere no te au Kerititiano tei vai takake i te tuatau tamaki. Te akaari ra tetai vitio i te tua o Remigio Cuminetti, tetai Kite tei patoi i te aao kakau vaeau no Itaria e te piri ki roto i te Tamaki I o te Ao. Tetai akaou vitio, no runga ia Alois Moser no Austria mai. No tei patoi aia i te tuatua “Heil Hitler!” kua ngere aia i tana ngai angaanga e kua apainaia atu ki te puakapa tamamae anga o Dachau.

Kua akatuia tetai kopi no te areauri poiri e kua akanooia te au tutu no te Au Kite o Iehova tei tapekaia no to ratou akarongo i te au enua mei ia Ereni, Poland, Serbia e Tiapani.

Te tuanga openga tona tumu tuatua “Evangelia no te pa Enua Ravarai” tei akatumuia ki runga ia Mataio 24:14 e te akataka maira i te angaanga a te Au Kite o Iehova mei te 1950 ki teia tuatau. Te akaari maira te au tutu e manganui i te tupuanga maata, te tutu anga maroiroi, e te aroa taeake tei akataka i te Au Kite o Iehova.

I mua ake ka akaruke ei i te akaariarianga ka rauka i te aronga turoto i te taangaanga i tetai komupiuta kia akara i te Bible House e te Brooklyn Tabernacle, e nga are tei taangaangaia e te Au Kite o Iehova tere atu i te 100 mataiti.

Eaa te Tumu i Akatu ei i te Akaariarianga?

Kua pou e tai mataiti i te parani i teia akaariarianga e kua pou tetai au marama i te akatu i te reira. Kua oronga te Au Kite o Iehova takapini i teianei ao i ta ratou apinga takere tei akaperepereia.

Eaa te tumu i raveia ai teia angaanga maata? Te uianga eaa te puapinga ta te Au Kite o Iehova ka rauka mai mei teia turoto, kua karanga tetai mema o te Pupu Akaaere o te Au Kite o Iehova i teia tuatua rongonui: “Kia kite tatou te ngai ka aere tatou, ka anoanoia kia kite noea mai tatou.”

^ para. 2 Tei ko te akaariarianga i te 25 Columbia Heights, Brooklyn, New York, e ka ngaa mei te Monite ki te Varaire, 8:00 a.m. ki te 5:00 p.m. Aere ki roto, kare e tutaki.