Neke ki te tumu manako rikiriki

Neke ki te rua o te ngai ka akaari mai i te au puka

Au Kite o Iehova

Reo Rarotonga

Araveianga i te Iti Tangata Sinti e te Roma i Tiamani

Araveianga i te Iti Tangata Sinti e te Roma i Tiamani

E tai ngauru ua atu tauatini tuma iti tangata Sinti e te Roma e noo ra i Tiamani. * I ou akenei, kua nenei te Au Kite o Iehova i te au aenga pepa Pipiria, te au poroutia, e te au vitio i to ratou reo anau, koia te reo Romany. *

I te tuatau o te angaanga takake ia Tepetema e Okotopa 2016, kua tauta te Au Kite o Iehova i te oronga i teia akakiteanga reo Romany ki te iti tangata Sinti e te Roma i roto i te au oire tukeke i Tiamani, kapiti mai ia Berlin, Bremerhaven, Freiburg, Hamburg, e Heidelberg. Kua akanoo katoa ratou i te au uipaanga na te katoatoa i te reo Romany i ko i te au Are Uipaanga Patireia.

Āriki Anga Meitaki

E manganui te au iti tangata Sinti e te Roma tei poitirere e te rekareka i te angaanga a te Au Kite o Iehova. “Rekareka te tangata no te mea kua raveia tetai tauta anga kia itae ia ratou,” i ripoti ei a Andre e Esther, e tokorua tei piri ki roto i teia angaanga. Kua pakiaia te ngakau o te aronga tei rongo e tei tatau i te karere a te Pipiria i roto i to ratou reo anau. Kua akara tetai mapu vaine i te vitio Eaa te Tumu ka Apii ei i te Pipiria? Kua kapiki putuputu aia ma te umere, “Noku teia reo!”

Karanga tetai Kite tona ingoa ko Matthias, tei turu i teia angaanga i Hamburg: “Kua aru maua ko taku vaine e te tokovaru Au Kite kia atoro i te ngai e 400 tangata Sinti e te Roma e noo ra. Pouroa te tangata ta maua i tuatua atu kua pati mai i te au puka.” Karanga a Bettina, tei aru ki Hamburg: “Kua aue tetai pae te kite anga mai e kua nenei te Au Kite o Iehova i te au puka i te reo Romany.” E manganui tei akamata viviki i te tatau i te au puka ma te reo maata, e kua apai tetai pae i te au puka na to ratou au oa.

Kua āriki tetai au tangata Sinti e te Roma i te patianga ki tetai o te au uipaanga na te katoatoa. E manganui o te 94 tangata tei aere ki Hamburg kare rava ratou i tomo ana ki roto i tetai Are Uipaanga Patireia. I Reilingen i te pae ia Heidelberg, kua tae e 123 tangata ki tetai uipaanga. I muri akera, e rima au tangata reo Romany tei pati mai i tetai apii Pipiria.

I te tuatau o teia angaanga, kua tuʼa te Au Kite o Iehova vaitata i te 3,000 aenga pepa e te poroutia. Kua rave te Au Kite i te au uriuri anga ki te tere atu i te 360 au tangata Sinti e te Roma, e e 19 tei akamata i te apii i te Pipiria. E maata ia ratou tei karanga, “E meitaki tikai e te manako maira te Atua ia matou.”

^ para. 2 E pupu meangiti ua teia iti tangata Sinti e noo ra i te Western e te Central Europe, e te iti tangata Roma e pupu meangiti ua no te Eastern e te Southeastern Europe.

^ para. 2 Akakite te Encyclopædia Britannica Online e i roto i te au reo Romany te vaira e “60 me kore e maata atu au reo ke ke.” Ei akamama mai, ka taangaanga teia atikara i te tuatua “Romany” ei akakite i te reo e tuatuaia ra e te iti tangata Sinti e te Roma e noo ra i Tiamani.