Ko Cluj-Napoca, tetai oire maatamaata roa atu i Romania, tei kiteaia e ko Te Oire Apinganui. I te tuatau o te akaari anga puka i roto i te oire o Gaudeamus, mei ia Aperira 20 ki te 24, 2016, kua akaari te Au Kite o Iehova i te au apiianga tau i te pae vaerua tei kiteaia i roto i te Pipiria. Kua akanoo ratou i tetai ngai akaari anga puka e kua tuatua atu ki te tauatini ua atu tangata tei inangaro i te kite no runga i te au vitio, te au puka Pipiria, e te au Pipiria tei akaariia.

Maata te au apii tei aere ki teia akaari anga puka, e kua apai mai te au puapii i ta ratou au tamariki apii no te akara i te au puka a te Au Kite. Kua reka tikai te au tamariki apii i te akarakara i te au vitio Kia Riro ei oa no Iehova, e e maata katoa tei inangaro i tetai kopi o te puka Taku Puka Tua Pipiria e te poroutia Apii i Taau Tamariki. Karanga tetai tangata tiaki tamariki tei kite i teia au vitio ki tona taeake, “Ka anoanoia taua kia tata i teia website [www.jw.org] ki raro kia rauka ia taua i te akaari ki te au tamariki i teia au vitio cartoon.”

Kua umere te au tamariki apii mapu i te au vitio toroa tei akaariia i runga i te au tablet. Te au vitio E Inangaro Mou Ainei me e Akainangaro Ua?, Be Social-Network Smart, e te Patoi i te Tangata Rave Kino ma te Marū.

Kua atoro putuputu tetai orometua orthodox e tana vaine i te ngai o te Au Kite, e kua apai i te Pipiria New World Translation of the Holy Scriptures e tetai au poroutia. Karanga te orometua e kua umere tikai aia i te tuanga “Bible Words Index” e te au akakiteanga irinakiia tei taangaangaia e te aronga uri reo. Kua oronga aia i tona numero tereponi ki te Au Kite e kua pati ia ratou kia aravei mai iaia no te uriuri maata atu i te Pipiria kiaia.

Kua ui te vaine a te orometua teiea te ngai a te tamariki i runga i te jw.org website e kua aratakiia atu aia ki te tuanga a te “Tamariki.” E oti kua akarakara aia i te vitio Akakite i te Tika, e kua mataora tikai aia i te reira. I muri ake i te akara anga i teia e tetai ngai ke atu o te website, kua karanga tana tane i teia e e “apinga aroa na te Atua ki te tangata.”