Neke ki te tumu manako rikiriki

Neke ki te rua o te ngai ka akaari mai i te au puka

Au Kite o Iehova

Reo Rarotonga

Orongaia te au Pipiria i to Ratou Reo Anau

Orongaia te au Pipiria i to Ratou Reo Anau

Ka oronga te Au Kite o Iehova i te New World Translation of the Holy Scriptures ki tetai ua atu tei inangaro i te tatau i te reira.

Noatu e pirioni ua atu Pipiria e e maata te au urianga tei neneiia e te au taiate Pipiria tukeke, kua riro te putaua e te akonoanga papakitai ei arai i te tangata kia rauka te Pipiria i to ratou uaorai reo. No reira, ka oronga ua te Au Kite o Iehova i te New World Translation i roto i te 115 tuma reo.

Akamanako i te au akaraanga:

  • Rwanda: “E putaua tikai matou,” i karanga ai a Silvestre e Venantie, e ā a raua tamariki, “no reira kare e peke tetai Pipiria na matou tataki tai. I teianei, kua tu matou tataki tai i te New World Translation i te reo Kinyarwanda, e te tatau kapiti nei matou i te Pipiria i te au rā ravarai.”

    Akakite tetai orometua Anglican i te reira enua e: “E Pipiria tikai teia taku ka mārama. E meitaki atu i tetai ua atu Pipiria taku i tatau ana. Te manako tikai ra te Au Kite o Iehova i te tangata!”

  • Democratic Republic of the Congo: Kua patoi tetai au akonoanga i te oko i te au Pipiria i te reo Lingala—tetai o te reo matauia o teia enua—ki te Au Kite o Iehova.

    No reira, mei te taime i orongaia ai te New World Translation i te reo Lingala, kua aruaru te Au Kite Congo i te taangaanga e te tuʼa i teia Pipiria. No te rekareka ta te New World Translation i akatupu, i te orongaia anga te reira i tetai uruoaanga a te Au Kite o Iehova, kua tu ua te akava i te tiaki i tana uaorai kopi o te Pipiria.

  • Viti: No te ākā moni te Pipiria i te reo Viti, no reira te Au Kite o Iehova i te tuatau i topa i taangaanga ai i te New World Translation i te reo Papaa. Inara i te 2009, kua rauka i te au Viti te New World Translation of the Christian Greek Scriptures (Koreromotu Ou) i to ratou reo anau.

    Kua umere tikai tetai tangata no te taka meitaki o te New World Translation reo Viti e kua pati i tetai kopi nana. Inara, akakite atu te Au Kite o te reira ngai e ka tiaki ua aia e tai marama i mua ka tae mai ei te tukuanga Pipiria ki tona oire. Kare teia tangata i tiaki ana kua aere i te aravei i tetai Kite e 35 kiromita te mamao e New World Translation tana ka oronga kiaia. Karanga te tangata e: “E meitaki atu teia urianga i taku e tatau ra. E taka meitaki e te māmā ua i te mārama.”

  • Malawi: I muri ake te akamata anga a Davide i te apii ki te Au Kite o Iehova, kua aere mai te akonoanga Baptist ki tona kainga e kua rave i te Pipiria ta ratou i oronga kiaia. No reira, kua riro te oronga anga i te New World Translation i te reo Chichewa ei moemoea tika tikai kia Davide.

    Mei te mea e ākā moni te Pipiria i Malawi, kua manako a Davide akapeea ra e rauka akaou ei tetai. Inara te orongaia anga tetai New World Translation nana, karanga aia: “E meitaki atu taku Pipiria i teianei, i taku i tatau ana!”

E tere atu i te 60 mataiti i topa akenei, te orongaia anga te tuanga mua o te New World Translation i te reo Papaa i ko i tetai uruoaanga i New York City, kua akamaroiroiia te katoatoa: “Tatau i te reira. Apii i te reira . . . Oronga i te reira ki roto i te rima o tetai ke.” Ei akatupu i te reira akakoroanga, kua nenei te Au Kite o Iehova e tere atu i te 175 mirioni kopi o te New World Translation. Pera katoa, i teianei ka rauka ia koe te tatau i te Pipiria i runga i te Initaneti i roto i te 50 tuma reo.