E akatupu ana te pāpati i te au tangi anga tukeke, mei te pakapakakina e te au puipui, e oti ka akarongo aia kia oki mai tera tangi anga, kia kite aia i te ngai ka aere aia e i te akarakara takapini iaia. Kua akakeuia te aronga kite e te tu karape o te pāpati Tursiops truncatus kia taangaanga i tetai ravenga ou te ō maira te au tangi anga tukeke kia kimi ravenga no te au manamanata i raro i te moana.

 Kia akamanako: Na te tu karape o te pāpati i tauturu iaia kia kite i tetai ika e pipini ra i roto i te one e kia kite i te tuke i rotopu i tetai ika e tetai toka. Karanga a Keith Brown, tetai tangata kite i ko i te Heriot-Watt University, Edinburgh, i Scotland e, ka rauka i tetai pāpati kia “kite i te tuke i rotopu i tetai vairanga vai, vairanga tai moana, vairanga vai venevene, e te vairanga penitini, mei te tai ngauru mita te mamao.” Inangaro te aronga kite i te maani i te au matini kia aite rai tona tu ki te tu karape o te pāpati.

 Kua tauta te aronga kimikimi i te kopi i te tu tangi anga e te tu akarongo o te pāpati. Kua rauka mai tetai matini tei maani karapeia, te ka ō ki roto i tetai vairanga mei te tai mita te roroa. Ka tapiriia te reira ki tetai pai ruku, tei aite ki tetai pōmu. Kua maaniia teia matini kia kimi i te au ara uira e te au paipa mamaata i raro i te moana, e te akara matatio i te reira mei te ngai mamao. Irinaki te aronga tei maani i teia matini e ka riro te reira ei mea puapinga no te au kamupani inu matini e te penitini. Na teia ravenga ou e akameitaki atu i te au kimikimianga tei rauka mai. Ka tauturu teia i te tangata kia tuku i te au matini e te au paipa ki te ngai tau tikai i raro i te moana, e kia kite me kua kino tetai apinga​—mei te poupou kinokino o tetai oil-rig​—e me kua piritia te au paipa i raro i te moana.

 Eaa toou manako? E mea tupu ua ainei te tu karape o te pāpati? Me e mea maaniia te reira?