Ka akamaana te ra i te peau o te pepe kia rere. Me kerekere te tumurangi kua papa te pepe kapati teatea i te rere i mua ake i tetai au pepe. Eaa tei tauturu i te reira?

 Kia Akamanako: I mua ake ka rere ei, ka akamaana te ra i te peau o te au pepe tukeke me topiriia e me ooraia te reira. Ko te pepe kapati teatea, ka akatanotano te reira i tona peau-V. Akakite mai te aronga kimikimi e kia maana viviki te reira, ka akateitei te pepe i tona peau e ka taanga mei te 17 tikiri te atea. Na teia tu ka iti te solar energy ki roto i tona uaua, te ka akamaana i te reira no te rere anga.

 Akara te aronga kimikimi o te Apii Teitei o Exeter, Peritane, e me ka rauka rai ia ratou i te maani i te au solar panel kia meitaki atu na te kopi anga i te peau-V o te pepe. Mei te reira, kua kite mai ratou e ka maata atu i te 50 patene te ririnui ka rauka.

 Kua kite mai te aronga kimikimi i te tu kanapanapa o te peau o te pepe. Na te kopi anga i te peau-V e tona peau kanapanapa, kua rauka ia ratou i te maani i te solar panel mama e te meitaki. No reira te Professor ko Richard ffrench-Constant, e mema o te pupu kimikimi, i kapiki ei i te pepe kapati teatea e “e karape i te opu mai i te solar energy.”

 Eaa toou manako? E mea tupu ua ainei te peau-V o te pepe kapati teatea? Me e mea maaniia te reira?