Riro te au mapii e te au mea ora e tupu ra, i vao ake i te paruru o te pai, ei tamanamanata maata i te au rangatira pai. Na roto i teia takino anga, ka marie te tere anga o te pai, ka pou te penitini, e ka anoanoia kia uutiia mai ki uta e ka tāmāia i te au mataiti ravarai. Te akarakara ra te aronga taieni ki te au mea natura ei rapakau i teia manamanata.

 Kia akamanako: Kua kitea i roto i te au kimikimi anga e ka rauka i te pakiri o te pilot whale e peau roroa tona (Globicephala melas) i te tāmā iaia uaorai. E au nanoridges to runga i tona pakiri, e kare te au ua mapii e pipiri ki runga. Kua ki teia au ridges i te gel ei tamate i te algae e te bacteria. Ka akataʼe mai te toora i teia gel ou, iaia e taui ra i tona pakiri.

 Kua parani te aronga taieni i te kopi i te pakiri tāmā o te toora ei tāmā i te paruru o te pai. I te tuatau i topa, kua taangaangaia ana te au peni vairakau, kia kore tetai au mea ora e mou ki runga i te pai. Inara, kua araiia teia au peni, no te mea kua tamate te reira i te au mea ora o te moana. Kua kite mai te aronga kimikimi e ka tapoki ratou i te au ngai putaputa o te paruru o te pai, ki tetai āriki te ka akataʼe mai i te vairakau, kare e takino i te moana. Me kairo te reira ki te tai, ka petetue mai ei gel, e ka aite mei te pakiri te tu, te ka tapoki i te paruru o te pai. Kare e roa, me tae tona petetue ki te 0.7 mirimita [0.03 ini], ka maore te reira, e ka pururu te au mea ora tei pipiri ki runga. E oti ka tupu akaou tetai pakiri gel ou, no te tapoki i te paruru o te pai.

 Kua kite mai te aronga kimikimi e ka akameangiti teia ravenga i te akakino anga i te moana e 100 tuma te meitaki. E e mea puapinga teia ki te au kamupani pai, no te mea e aka moni te ka pou no te tāmā i te au pai.

 Eaa toou manako? E mea tupu ua ainei te pakiri o te pilot whale te ka rauka i te tāmā iaia uaorai? Me e mea maaniia te reira?