Kua roa te tuatau te akarakara anga te aronga taieni i te tu karape o te mapii i te tapiri iaia uaorai kia pipiri roa ki runga i tetai toka, te uapu e ia raro i te paī. Karangaia e meitaki atu teia apinga tapipiri i tetai ua atu apinga tei angaia e te tangata. Kua roa te vai muna anga te ravenga e pipiri ei teia manu ki runga i te apinga māʼu.

 Kia akamanako: Kitenaia mai e te aronga kimikimi e ka kimi te roeroe o te mapii i tetai ngai meitaki nona ei tapiri iaia ki runga. Me kiteaia te reira, i te akara anga ka akataʼe te roeroe e rua apinga. Te mea mua, e apinga inuʼinu tona akakoroanga e akaatea i te vai mei te ngai ka tapiri iaia ki runga. Tauturu katoa te apinga inuʼinu iaia kia akapapa no te tuku i te rua o te apinga, tei kapikiia e phosphoproteins.

 Me kaʼiro nga apinga, ka rauka mai tetai apinga tapipiri ketaketa kare e kaingaʼia e te manumanu. E puapinga kia vai ketaketa ua te apinga tapipiri no te mea ka piri ua te mapii ki tera ngai no te katoaanga o tona oraanga.

 E umere tikai te tu e maani ra te mapii i te apinga tapipiri. Karanga tetai mema o te aronga taieni tei kite i teia ravenga: “E mea umere tikai e te pakari teia ravenga no te tapipiri ki runga i tetai ngai māʼu.” Penei ka tauturu teia kite ou i te aronga kimikimi kia maani i te apinga tapipiri kia taangaangaia i roto i te vai, pera katoa ei vaî no te au apinga electronic e te tua rapakauanga.

 Eaa toou manako? E mea tupu ua ainei te apinga tapipiri o te mapii? Me e mea maaniia te reira?