I teia tuatau o te apinga apaipai, ka inangaro toou pu, te au oa angaanga, e tetai aronga kia vā ua koe 24-7, e e ngata kia akatanotano i te oraanga—kia akatakake i te ngai angaanga e kia akariro i toou oraanga akaipoipo e te ngutuare ei mea puapinga.

•  Taau ka anoanoia kia kite

•  Tauturu kia akatanotano i te oraanga

•  Karanga te tokorua

•  Au manako no te uriuri

•   Ka riro te apinga apaipai ei akapou i toou taime ki te angaanga e kare ki toou tokorua. Ka tae mai te au taniuniu anga, te au imere, e te au karere i te tuatau akangaroi, mei te mea rai e ka inangaroia kia tamate vivikiia te reira.

   “Te oraanga matauia kia akapou i tetai tuatau ki te ngutuare tangata i muri ake i te angaanga, e ngata ra te reira, ko te au imere e te au karere angaanga e tae maira kua akangaropoinaia te oraanga akaipoipo.”—Jeanette.

•   Kia mako taau angaanga e te oraanga i te kainga, ka anoanoia koe kia akamanako meitaki. Me kare aau parani, ka takino taau ngai angaanga i toou oraanga akaipoipo.

   “Ko te tokorua te mea mua taau ka akangaropoina, no te mea ka manako koe, ‘Ka mārama ua aia. Ka akakoromaki ua aia. Akonei maua aravei ei.’”—Holly.

•   E puapinga toou oraanga akaipoipo. Karanga te Pipiria: “Ta te Atua i topiri ra, auraka te tangata e akataka ke atu.” (Mataio 19:6) Me kare koe e akatika i tetai tangata kia “akataka ke atu” ia koe mei toou tokorua, eaa i reira koe ka akatika ai i te angaanga?

   “Manako te aronga na ratou e tutaki ana ia koe, e ka rauka ia ratou te taniuniu mai i tetai ua atu taime. Mei te mea e puapinga toku oraanga akaipoipo, ka akakite au e kare au e angaanga i toku au rā akangaroi, e ka aravei atu au ia ratou a tetai atu rā.”—Mark.

   Ui kia koe, ‘Te akaari maira ainei toku tu e te akariro ra au i toku oraanga akaipoipo ei mea puapinga atu i taku angaanga?’

•   Karanga e kare me ka anoanoia. Karanga te Pipiria: “Tei te aronga akaaka ra te pakari.” (Maseli 11:2) Penei ka akakeu te tu akaaka ia koe kia manako pakari kia akaruke e kia vaio i tetai atu angaanga na tetai.

   “E tangata parama au, me inangaro tetai tangata i toku tauturu no tetai tumatetenga, ka apiapiia aia. Me kare au e tae vave, ka pati au i tetai tangata ke.”—Christopher.

   Ui kia koe: ‘Ka inangaro ainei au i te arai i tetai atu angaanga mei te mea ka manako toku tokorua e kua akangaropoinaia aia? Eaa ta te tokorua ka karanga?’

•   Akapou kapiti i te tuatau. Karanga te Pipiria: “E atianga to te au mea katoa.” (Koheleta 3:1) Me e apainga teiaa taau i te angaanga, e akanoo i tetai tuatau no toou oraanga akaipoipo.

   “Te maata anga o te taime me tupu te au mea ravarai i te reira taime, ka akanoo maua i tetai ora—noatu me e taime kaikai me e ori aere i taatai—e tuatau te reira ko maua anake ua.”—Deborah.

   Ui kia koe: ‘E akanoo ana ainei au i tetai taime kia noo kapiti ki toku tokorua? Eaa ta te tokorua ka karanga?’

•   Tamate. Karanga te Pipiria: “Kia timata oki kotou i te au mea e maata ua atu te meitaki.” (Philipi 1:10) Ka rauka ainei ia koe te tamate i taau apinga apaipai kia kore te ngai angaanga e tamanata ia koe?

   “E akamutu ana au i te angaanga i te taime i akanooia. E oti, ka tamate au i taku au karere i runga i taku tereponi.”—Jeremy.

   Ui kia koe: ‘Tei runga ua ana ainei au i taku apinga apaipai penei ua ake te inangaro mai ra toku pu me kore tangata angaanga iaku? Eaa ta te tokorua ka karanga?’

•    Kia manako tau. Karanga te Pipiria: “Kia kitea meitakiia oki to kotou maru.” (Philipi 4:5) Ae, i tetai au taime ka tamanata rai te angaanga i toou oraanga akaipoipo. Ei akaraanga, penei ka riro te angaanga a te tokorua kia taniuniu tetai pae iaia i muri ake i te ora angaanga. Ma te manako tau, auraka e māro maata atu i te tokorua.

   “E pitiniti meangiti ta taku tane, e maata tana au angaanga ka rave rapurapu i muri ake i te ora angaanga. I tetai taime, e riri ana au, inara no te mea te akapou kapiti ra maua i tetai tuatau no maua ua, kua mako ua.”—Beverly.

   Ui kia koe: ‘Te manako ra ainei au i te apainga a toku tokorua, ma te kore e māro atu iaia? Eaa ta te tokorua ka karanga?’

 Mea mua, ka uriuri takake korua i teia au uianga. E oti, uriuri korua i te pauanga.

•   I akaapa ana ainei toou tokorua e kua apai koe i te angaanga ki te kainga? Me koia ia, te akatika ra ainei koe?

•   Eaa te au ngai kia akatanotano koe i toou oraanga angaanga?

•   I manako ana ainei koe, kare e rauka i toku tokorua i te akaruke i te angaanga “ki te angaanga”? Me koia ia, te maara ra ainei ia koe eaa te reira?

•   Eaa te au taui anga, ka inangaro koe i toou tokorua kia akatanotano i te oraanga angaanga?