Maata te au tane e te au vaine akaipoipo tei kite mai e e ngatā ia ratou i te pukapuka meitaki, noatu ko raua anake ua. Eaa ra te tumu?

•  Noo kapiti kare ra e vaitata ana—eaa te tumu?

•  Taau ka rauka i te rave

•  Ta te au tokorua i karanga

•  Au manako no te uriuri

•   Roiroi

   “Me noo kapiti maua no te pukapuka, penei kua roiroi taku tane me kore kua roiroi au. Me roiroi tikai au, ka viviki ua au i te riri i te au mea rikiriki. E meitaki ake no maua kia akarakara tivi.”—Anna.

•   Pou te taime ki runga i te initaneti

   “E pou maata ana te taime ki runga i te social media e te au tamataora i runga i te initaneti. Ka pou te ora e kare oou taime no te tuatua ki toou tokorua. E ngari ake eiaa korua noo kapiti.”—Katherine.

•   Tuke ta korua e reka ana

   “Me oki mai taku tane mei te angaanga, ka akapou aia i tona taime ki te au mea tana e reka ana. E meitaki te reira nona, no te mea e angaanga pakari ana aia. Inara e inangaro ana au kia akapou aia i tera ora no maua.”—Jane.

•   Angaanga

   “No te au apinga electronic, ka rave ua au i taku angaanga i te kainga. E maata te taime e pau ana au i te au imere e te text no te angaanga i toku taime e noo kapiti ana maua ko taku vaine.”—Mark.

•   Mea puapinga kia akapou meitaki korua i te taime me noo kapiti, kare no tetai au taime ua.

   Kaveinga Pipiria: “Kia timata oki kotou i te au mea e maata ua atu te meitaki.”—Philipi 1:10.

   E akamanako: Te akaari ra ainei koe e puapinga atu toou oraanga akaipoipo i taau ngai angaanga me kore ki taau au mea e reka ana? Ka akapou ainei koe i te taime ki toou tokorua me oti roa taau angaanga?

   Tauturu: Akanoo putuputu i tetai tuatau meitaki kia noo kapiti ki toou tokorua e auraka e taui i te reira.

   “E reka ana au me parani taku tane i tetai apinga na maua anake ua. Akapapu maira te reira e e inangaro maata tona iaku, e te reka ra aia i te akapou i tona taime kiaku. Ka akamaata teia i toku inangaro iaia.”—Anna.

•   Apii kia rauka i te “akaruke” i taau apinga electronic.

   Kaveinga Pipiria: “E atianga to te au mea katoa nei.”—Koheleta 3:1.

   E akamanako: Te text putuputu ra ainei koe i toou taime tei akanooia no toou tokorua?

   Tauturu: Tauta kia kaikai kapiti korua e tai taime i te au rā ravarai—e te akaruke i ta korua tereponi ki roto i tetai pia ke. E tuatau meitaki teia no te pukapuka i ta korua i rave ana i tera rā.

•   Me ka rauka, e rave kapiti i ta korua au angaanga.

   Kaveinga Pipiria: “E meitaki nga tangata toko rua i te takitai; no te mea e tutaki meitaki ta raua i ta raua angaanga.”—Koheleta 4:9.

   E akamanako: Eaa te putuputu me aere takake koe me kore toou tokorua i te rave i tetai angaanga?

   Tauturu: E angaanga kapiti e te tauturu i tetai e tetai—noatu me ka rauka ua e tai tangata i te rave i te reira.

   “Te akariro ra ainei koe i te au angaanga mei te oko kai, te orei te au mereki e te kapu, te atuatu kakau, te pakoti tita ei atianga noou kia akapou i tetai tuatau meitaki ki toou tokorua?”—Nina.

•    Kia rauka te au akamanakoanga tau

   Kaveinga Pipiria: “Kia kitea meitakiia oki to kotou maru.”—Philipi 4:5.

   E akamanako: Akapeea koe me akapapu e kare koe e tapapa maata atu i ta toou tokorua ka rave?

   Tauturu: E uriuri kapiti kia mārama korua i te au anoano o tetai e tetai. E iki akapeea korua me akapou meitaki i to korua taime kia mataora korua.

   “Maata tikai te maroiroi o taku tane, inara kare oku maroiroi no te makimaki iaku. E akamaroiroi ana au i taku tane kia aere e rave i tana e inangaro, e ka tiaki au iaia kia oki mai. Ka noo au ki te kainga ma te akangaroi me aere aia i te rave i tana e anoano ra. Mataora maua i te rave i ta maua e anoano ra i te rave.”—Daniela.

 Mea mua, kia akamanako takake korua i teia au uianga. E oti, e uriuri kapiti i ta korua pauanga.

•    Te akapou ra ainei korua i tetai tuatau meitaki no korua anake i teia taime?

•   Ka rauka ainei ia koe i te akameitaki i toou tokorua no te rave i te reira?

•   Eaa taau ka inangaro i toou tokorua kia akameitaki atu?

•   E apai ke putuputu ana te au apinga electronic i toou manako mei te akarongo meitaki ki te tuatua a toou tokorua?

•   Akapeea korua me akaari i te tu tau no ta korua tapapa anga i tetai e tetai?

•   Eaa te au taui anga ta korua ka rave i teia epetoma kia puapinga meitakiia to korua taime?