Kare te Pipiria i akakite ana i naea te Atua i anga ai te ao rangi e pini ua ake e eaa te roa. Akakite te Pipiria: “I muatangana ra, kua anga iora te Atua i te rangi e te enua.” (Genese 1:1) Kare te Pipiria i akakite ana i naea te “muatangana” i akamata ei. Kua tupu te reira i mua ake i te tuatau o te ono “ra,” te angaia anga te au mea.

•  E 24 ora ainei te roa o te au rā e ono?

•  Eaa tei tupu i te tuatau o te ono rā?

•  E tika ainei ta Genese tataanga ki te kite taieni?

•  I naea te rā, te marama, e te au etu te angaia anga?

•  Eaa ta te Pipiria i akakite te roa o te enua te vai ua anga?

 Kare. I roto i te Pipiria, te tuatua “rā” e tukeke tona roa, tei runga ua i te aiteanga o te irava. Ei akaraanga, akakite tetai tuanga o te irava e ko te katoa anga o te rā.—Genese 2:4.

 “Vai utonga kore ua te enua, kare e marikonga” e kua akariro te Atua i te reira ei paraneta tau. (Genese 1:2) E oti kua anga aia i te au mea ora no te enua. Akakite te Pipiria e ono apinga tei tupu i te tuatau o te au rā, te angaia anga te au mea:

•  Rā 1: Anga te Atua i te mārama ki rungao i te enua, tupu atura te po-e-te-ao.—Genese 1:3-5.

•  Rā 2: Anga te Atua i te atea, me kore te kotinga i rotopu i te vai i te enua nei e te vai i runga roa ake i te enua.—Genese 1:6-8.

•  Rā 3: Anga te Atua i te enua marō. Anga katoa aia i te matie.—Genese 1:9-13.

•  Rā 4: Anga te Atua i te ra, te marama, e te au etu ei akamārama i te enua.—Genese 1:14-19.

•  Rā 5: Anga te Atua i te au mea ora o te moana, te vai e te mareva.—Genese 1:20-23.

•  Rā 6: Anga te Atua i te au manu o te enua e te tangata.—Genese 1:24-31.

 I te openga o te ono rā, kua akangaroi e kua akamutu te Atua i tana anga anga i te au mea.—Genese 2:1, 2.

 Kare te Pipiria i karanga ana e e puka taieni te reira. Inara, te akakite ra e kua akapapaia te au mea tei angaia kia mārama te aronga tatau Pipiria o te reira tuatau pera i teia rā. Kare te tataanga o te au mea tei angaia e patoi ana i te kite taieni. Tata te tangata apii i te paraneta ko Robert Jastrow e: “Tukeke te au manako, inara aiteite ua te au mea tei tupu i roto i te au tataanga o te paraneta e te tataanga Pipiria no Genese; te au mea tei tupu e tae ua atu ki te taime i angaia ai te tangata, kua tupu viviki te reira ma te taka meitaki, i te taime tau tikai.”

 Kua vai ua ana te ra, te marama, e te au etu ei tuanga no “te rangi” i “muatangana.” (Genese 1:1) Inara, kare te mārama i tae ana ki rungao i te enua no te petetue o te mareva. (Genese 1:2) Noatu kua kiteaia tetai manga mārama i te rā mua, kare te reira i taka meitaki. I te rā a, kua manea te mareva. Karanga te Pipiria kua akamata te ra, te marama e te au etu i te “akamārama i te enua,” e ka kiteaia te reira me akaraia atu mei te enua.—Genese 1:17.

 Kare te Pipiria i tuatua ana eaa te roa o te enua te vai ua anga. Akakite a Genese 1:1 e e akamata anga to te ao rangi e pini ua ake, kapiti mai to tatou enua. Kare teia tuatua e patoi ana i te au kite taieni e te au tamanako anga a te aronga kite taieni.