“Iaku e kite ra i te au manamanata i te apii, ka akamanako au i te akaraanga o tetai taku i reka tei na roto ana i te reira. Ka tauta au i te aru i tona akaraanga. Me rauka te akaraanga meitaki ka māmā i reira iaku te na roto i te au manamanata.”—Haley.

 Ka tauturu te akaraanga meitaki ia koe kia kopae i te au manamanata ma te akatupu i toou au akakoroanga. Te mea puapinga e iki i tetai akaraanga meitaki.

•  Eaa ka iki meitaki ei?

•  Akapeea me iki

•  Ta toou au oa i karanga

 Eaa ka iki meitaki ei?

•   Te au akaraanga taau ka iki ka akakeu te reira ia koe.

   Akakite te Pipiria ki te au Kerititiano kia iki i te akaraanga meitaki, te na ko ra: “E aru atu i to ratou akarongo, ma te manako i te openga o ta ratou tuatua.”—Ebera 13:7.

   Tauturu: Mei te mea ka riro tetai akaraanga ei akakeu ia koe no te meitaki me kore no te kino, e iki i te aronga e tu meitaki to ratou, kare te aronga e reka uaia ra e pera te aronga aiteite te mataiti.

   “E maata taku i apii mai mei te oa Kerititiano ko Adam—tona tu e tona akaraanga. Te maara nei rai iaku tetai au mea tana i tuatua e i rave. E maata tikai tana i rave tei tauturu iaku.”—Colin.

•   Te au akaraanga taau ka iki ka akakeu i toou manako e taau ka rave.

   Te akakite ra te Pipiria: “Auraka e vavare; e kino te tuatua meitaki i te kapiti anga kikino ra.”—1 Korinetia 15:33.

   Tauturu: E akara i te au akaraanga meitaki, kare ko te akaraanga umere ua o vao. Te openga, ka tupu te manamanata.

   “Ka akaraanga puapinga kore ua koe e te viivii me akaaite ua koe ia koe uaorai ki te aronga rongonui. Ka manata ua koe i toou tutu akamanea.”—Tamara.

   Akamanako: Eaa te manamanata me iki koe i te aronga akatutu teata e te aronga oro tei rongonui?

•   Te au akaraanga taau ka iki kare i papu ka akatupu te reira i toou au akakoroanga.

   Te akakite ra te Pipiria: “Ko tei kapiti katoa i tona aerenga ki to te aronga pakari ra, ka pakari katoa ïa.”—Maseli 13:20.

   Tauturu: E iki i te akaraanga ma te au tu meitaki taau ka inangaro i te aru. Ia koe e akara ra ia ratou, e maata taau ka apii mai no te akatupu i toou akakoroanga.

   “Eiaa e akatupu i te akakoroanga papu kore ‘Ka inangaro au kia papa au,’ inara e karanga koe, ‘Ka inangaro au kia papa au mei ia Jane rai. E papa ua ana aia e te rave meitaki i tana angaanga.’”—Miriam.

   Te mea puapinga: Me iki koe i tetai ei akaraanga meitaki, ka rauka ia koe te akatere i toou tu.

 Akapeea me iki

 E iki koe i tetai akaraanga meitaki e rua.

1.   E iki koe i tetai tu ka inangaro koe i te taangaanga e oti e kimi i te oa mei te reira te tu.

2.   E iki i te oa taau e reka ana e oti e akara i tetai o tona au tu taau ka inangaro i te aru.

 Ka tauturu te pepa angaanga ia koe.

 Kapiti mai ki te aronga akaraanga meitaki:

•  Te au Oa. “Ka inangaro au kia aite au mei toku oa piri mou. E akono ua ana aia i te au oa. E mapu ake aia iaku, e kite ana au i tona au tu manea te ngere ra au, e ka inangaro au i te aru i tona akaraanga.”—Miriam.

•  Aronga Mamaata. Ko toou nga metua me kore te au taeake i roto i te akarongo. “Kare e ekoko, e akaraanga meitaki toku nga metua. E maata to raua au tu manea. E kite ana au i to raua tarevake, inara te vaira to raua tu tiratiratu noatu te reira. Me pakari mai au, ka inangaro au kia aite au mei ia raua.”—Annette.

•  Aronga i roto i te Pipiria. “E maata taku akaraanga i iki i roto i te Pipiria—Timoteo, Ruta, Iobu, Petero, te tamaine Iseraelal—e tukeke te tumu i iki ei au ia ratou. Te maata atu taku apii i teia aronga o te Pipiria, ko te puapinga atu te reira kiaku. Reka tikai au te apii i teia au tua i roto i te puka Aru i to Ratou Akarongo, e te ‘Role Model Index’ i roto i te nga voriumu o te puka Ui te au Mapu E—Au Pauanga ka Puapingaia.”—Melinda.

 Tauturu: E iki kia maata te au akaraanga meitaki. Karanga te apotetoro ko Paulo ki te au Kerititiano: “E akara meitaki i te aronga e na reira katoa, ko matou oki to kotou akaraanga.”—Philipi 3:17.

 Kua kite ainei koe? Kia riro koe ei akaraanga meitaki no tetai! Te karanga ra te Pipiria: “Ei akaraanga ra koe na tei akarongo ra, i te tuatua, i te aerenga, i te aroa, i te tu o te ngakau ra, i te akarongo ra, i te viivii kore.”—1 Timoteo 4:12.

 “Ka riro koe ei oa puapinga ma te tauturu i tetai ke kia meitaki katoa. Kare koe i kite koai te akara maira, e penei ko taau ka tuatua ka riro ei taui i te oraanga o tetai.”—Kiana.