Saltar al contenido

Saltar al menú secundario

Haka hoki ki te kona ha'amata o te puka

Taŋata haka ˈite o ruŋa o Iehoha

rapa nui

¿He aha te meˈe hāpī e te Pipiria?

¿He aha te meˈe haŋa o te ˈatua mo tātou?

¿He aha te meˈe haŋa o te ˈatua mo tātou?

I te hora e uˈi ena koe i te teata, e haka roŋo ena i te radio, ˈe e taiˈo ena i te parau ˈāpī, he tikeˈa e he haka roŋo koe te rahi o te ˈaˈamu o ruŋa i te tiŋaˈi taŋata, tamaˈi, e te tahi atu meˈe rake-rake. Koite a koe mau ˈā, nā e maiūi mai ena, e takoˈa e mamāe mai ena tuˈu māhatu o ruŋa i te mate o tuˈu huaˈai o repahoa here.

Ka ˈui atu:

  • ¿Ko te meˈe nei te meˈe haŋa o te ˈAtua māˈaku e mo tōˈoku huaˈai?

  • ¿I hē au ana kimi i te rāveˈa mo hāˈūˈū mai i te hora o tōˈoku ˈati?

  • ¿E kore rō te tamaˈi e te ˈati e tahi mahana?

I ruŋa i te Pipiria he ravaˈa koe i te pāhono mau mo te ŋā ˈui nei.

 TE PIPIRIA E HĀPĪ RŌ ˈĀ TE ˈATUA HE AŊA I TE MEˈE HOPEˈA O TE RIVA-RIVA MO TE HENUA.

  • Te taŋata e ko korohuˈa e te ŋā viˈe e ko rūau, e ko ŋaroˈa haka ˈou te mamāe, e ˈina e ko mate. (Revelación 21:4)

  • Te nuˈu koke e te nuˈu taˈe haˈere, he haˈere haka ˈou. (Isaías 35:6)

  • Te nuˈu matakeva he tikeˈa. (Isaías 35:5)

  •  Te nuˈu mate he ora haka ˈou. (Juan 5:28, 29)

  • ˈIna e tahi taŋata mo maiūi. (Isaías 33:24)

  • He ai te kai mo te taˈatoˈa ˈe e ko maruaki. (Salmo 72:16)

 KA HĀPĪ TE PIPIRIA MO RAVAˈA I TE MEˈE RIVA-RIVA

E ai rō ˈā te taŋata e manaˈu ena te meˈe taiˈo ena e koe i te kona raˈe era, he moe vārua nō. Te ˈAtua ko kī ˈā ˈina he mahana toe, nā Īa he haka ˈāpī i te henua taˈatoˈa e i ruŋa i te Pipiria e kī ena pe hē ka aŋa ena.

Taˈe ko te meˈe nō nei te meˈe kī e te Pipiria. I ruŋa e kī rō ˈā pe hē tātou ana ravaˈa te koa mau e pe hē ana riva-riva tātou ora iŋa i te hora nei. Ka haka topa rā tuˈu manaˈu o ruŋa i te ŋā ˈati e haka tipa-tipa ena i a koe pahe moni kore, te ture i roto i te huaˈai, te maiūi e te mate o te tātou nunaˈa here. Te Pipiria he hāˈūˈū atu mo ˈite pe hē koe ana haka tere i te hora o tuˈu ˈati e takoˈa mo haka rehe tuˈu mamāe hai pāhono atu i te ŋā ˈui nei:

 Mo ai e taiˈo ˈā koe i te puka nei, nā koe e haka tikeˈa ˈā tuˈu haŋa mo ˈite he aha te meˈe hāpī e te Pipiria. Mo te puka iti-iti nei e hāˈūˈū atu. E ai rō ˈā te ˈui i te hopeˈa o te ŋā kupu vānaŋa nei, mo hāˈūˈū atu mo ata riva-riva tuˈu aŋi-aŋi i te Puka o te ˈAtua. Ko rahi ˈā te taŋata i ruŋa i te henua e koa mai ena o te hāpī i te Pipiria i muri i te Taŋata Haka ˈite o ruŋa o Iehoha. Ko haŋa ˈā mātou mo koa takoˈa ōˈou. Mo te ˈAtua e hāˈūˈū atu ka hāpī ka oho ena koe i te Pipiria.