Saltar al contenido

Saltar al menú secundario

Haka hoki ki te kona ha'amata o te puka

Taŋata haka ˈite o ruŋa o Iehoha

rapa nui

¿He aha te meˈe hāpī e te Pipiria?

 HĀPĪ 4

¿Ko ai a Ietū?

¿Ko ai a Ietū?

1, 2. (a) ¿E riva rō koe mo kī ko māhani ˈā koe ki te nuˈu himene, aŋa i te perikura hai ˈite nō tōˈona ˈīŋoa? Ka haˈauraˈa mai. (b) ¿He aha te meˈe e manaˈu ena te nuˈu o ruŋa o Ietū?

MEˈE rahi te taŋata himene, taŋata aŋa i te perikura e māhani ena e te nuˈu o ruŋa i te henua. E peaha ko ˈite a koe te ˈīŋoa o te ŋā nuˈu nei. E taˈe o te ai ko ˈite a koe i te rāua ˈīŋoa, ko māhani ˈā koe i a rāua. Te parautiˈa kai ˈite mau ˈā koe pe hē a rāua e pe hē te rāua haka tere iŋa.

2 Rahi no te nuˈu i aŋanirā ko ŋaroˈa ˈā o ruŋa i a Ietū, no atu tōˈona noho iŋa i ruŋa i te henua 2000 matahiti a tuˈa, e no atu te ˈite tōˈona ˈīŋoa ˈina kai ˈite pe hē mau a Ietū. Kē nuˈu e kī rō ˈā a īa he taŋata riva, takoˈa e ai rō ˈā te nuˈu e kī ena he profeta, ˈe e ai rō ˈā te nuˈu e manaˈu ena ko īa te ˈAtua. ¿E pe hē koe e manaˈu ena? (Ka taiˈo te Kona 12 mo ata hāpī.)

3. ¿O te aha he meˈe hopeˈa o te nui-nui mōˈou mo ˈite o ruŋa o Iehoha e o ruŋa o Ietū?

3 He meˈe hopeˈa o te nui-nui mōˈou he ˈite te parautiˈa o ruŋa o Ietū. ¿O te aha? Te Pipiria e kī rō mai ˈā: “ˈI te haˈauraˈa mau mo ora ki te hopeˈa raˈa, he hāpī he oho o ruŋa i a koe e te ˈAtua parautiˈa mau ē, e o ruŋa i te taŋata uŋa mai era e koe ko Ietū Kiritō” (Juan 17:3). He aŋi ˈā, mo ˈite ōˈou te parautiˈa o ruŋa o Iehoha e o ruŋa o Ietū, e riva nō koe mo noho i ruŋa i te henua nehe-nehe ki te hopeˈa raˈa (Juan 14:6). Mo uˈi ōˈou a ruŋa i te huru haka tere o Ietū, he hāˈūˈū atu o te ai ko haka ˈite mai ˈā, hē te huru hopeˈa o te riva-riva mo haka tere ōˈou (Juan 13:34, 35). I te hāpī 1 ko aŋi-aŋi a tātou te parautiˈa o ruŋa i te ˈAtua. I te hora nei he hāpī tātou he aha te meˈe hāpī e te Pipiria o ruŋa o Ietū.

 ¡KO RAVAˈA ˈĀ TĀTOU I TE MĒSIA!

4. ¿He aha te haˈauraˈa o te vānaŋa “Mēsia” e “Kiritō”?

4 Rahi nō te matahiti a tuˈa, raˈe ki te poreko o Ietū, a Iehoha ko kī ˈā i ruŋa i te Pipiria pe nei ē, he uŋa e Īa i te Mēsia, te Kiritō. Te vānaŋa ena he Mēsia mai te ˈarero Hebreo i eˈa mai ai, e te vānaŋa Kiritō mai te ˈarero Griego. Ararua ˈīŋoa nei te haˈauraˈa “he kope vae e tahi”, he taŋata vae e te ˈAtua mo aŋa i te aŋa nui-nui e tahi. Oīra e kī ena ko Ietū te Mēsia, te Kiritō, o te ai ko vae ˈā e Iehoha i a īa mo aŋa i te aŋa nui-nui e tahi. Mo te Mēsia ko Ietū, e haka tano tahi i te taˈatoˈa vānaŋa kī era e te ˈAtua. E takoˈa e riva nō a īa mo hāˈūˈū atu i te hora nei. Raˈe ki te poreko mai o Ietū, rahi nō te taŋata e haŋa era mo ˈite ko ai te kope ka riro era he Mēsia.

5. ¿I uˈi rō te pukuraŋa o Ietū i a īa pahe Mēsia?

5 Ko ˈite riva-riva ˈā te pukuraŋa o Ietū ko īa mau ˈā te Mēsia (Juan 1:41). A Simón Pedro i kī rō ki a Ietū: “Ko koe te Kiritō” (Mateo 16:16). ¿Pe hē tātou ana ˈite riva-riva pe nei ē ko Ietū te Mēsia?

6. ¿Pe hē e hāˈūˈū ena e Iehoha ki te taŋata māhatu riva mo aŋi-aŋi ko ai te Mēsia?

6 Rahi nō te matahiti a tuˈa, raˈe ki te poreko o Ietū, te profeta o te ˈAtua i pāpaˈi rō te vānaŋa mo hāˈūˈū ki te taŋata, mo aŋi-aŋi ko ai te Mēsia. ¿Pe hē i hāˈūˈū ai rā ŋā vānaŋa? I he haˈauraˈa atu. Mo oho koe ki te aeropuerto mo tiaki i te taŋata e tahi kai māhani e koe, e ai te taŋata mo haka aŋi-aŋi atu pe hē tōˈona huru, tōˈona kahu uru, tōˈona rauˈoho, mo riva koe mo ravaˈa i a īa. Pahe huru mau nei ˈā, hai ta ˈana profeta, a Iehoha i haka aŋi-aŋi mai ai o ruŋa i te aŋa, aŋa era e te Mēsia e he aha te meˈe ka piri era ki a īa. Te haka tano tahi o rā ŋā vānaŋa pāpaˈi era i muˈa ˈā i ruŋa i a Ietū, he hāˈūˈū ki te taŋata māhatu riva mo aŋi-aŋi ko īa te Mēsia.

7. ¿Ko vānaŋa hē te vānaŋa o muˈa ˈā haka aŋi-aŋi mai ko Ietū te Mēsia?

 7 Ki uˈi e rua o rā vānaŋa kī era e te profeta. Te vānaŋa raˈe, e 700 matahiti a tuˈa raˈe ki te poreko o Ietū, a Miqueas i kī rō pe nei ē, te Mēsia ka poreko era i te kaiŋa iti-iti o Belén (Miqueas 5:2). E ¡i ira mau ˈā a Ietū i poreko ai! (Mateo 2:1, 3-9). Te rua vānaŋa, a Daniel i kī pe nei ē, i te matahiti 29 d.C. * ka ˈite era ko ai tū Mēsia era (Daniel 9:25). A tātou ko uˈi ˈā e rua nō o te rahi o te vānaŋa kī era o ruŋa i te Mēsia e ko aŋi-aŋi ˈā ko Ietū tū Mēsia era. (Ka taiˈo te Kona 13 mo ata hāpī.)

Hora era o tōˈona papatito i riro ai a Ietū he Mēsia o he Kiritō

8, 9. ¿Pe hē i haka aŋi-aŋi mai ai ko Ietū te Mēsia hora papatito era i a īa?

8 A Iehoha ko haka tikeˈa riva-riva ˈā ko Ietū mau ˈā te Mēsia. Te ˈAtua i kī rō ki a Iovani papatito, nā a īa he haka aŋi-aŋi ki a īa ko ai te Mēsia. I te matahiti 29 d.C. he oho a Ietū ki a Iovani mo papatito i a īa, e he tikeˈa e Iovani tū vānaŋa ki era e te ˈAtua. Te Pipiria e kī rō mai ˈā pe hē i oho ai: I ˈoti era tōˈona papatito, he eˈa mai a Ietū mai roto i te vai; e ¡Ka uˈi! He ha-hata te raŋi ˈe he tikeˈa e īa te turu iŋa mai o te vārua maitai o te ˈAtua ki ruŋa i a īa pahe paloma. ¡E ka uˈi! Takoˈa, he reˈo e tahi mai ruŋa i te raŋi ka kī: ‘He Poki āˈaku nei, he haŋa rahi āˈaku e ko rahi ˈā tōˈoku koa i a īa’ (Mateo 3:16, 17). I tikeˈa era e i ŋaroˈa era e Iovani te ŋā meˈe nei, he ˈite rō ai pe nei ē, ko Ietū te Mēsia (Juan 1:32-34). I rā mahana, hora vaˈai era e Iehoha i  tōˈona vārua maitai, i riro ai a Ietū he Mēsia. Ko īa te kope vae era e te ˈAtua mo riro he pūˈoko haka tere e he ˈariki takoˈa (Isaías 55:4).

9 Te vānaŋa pāpaˈi era i ruŋa i te Pipiria i muˈa ˈā, te vānaŋa kī era e Iehoha hai tōˈona reˈo mau ˈā, e i te meˈe i haka tikeˈa era e Īa i te hora era ko papatito ˈā a Ietū, ko haka ˈite mai ˈā ko Ietū te Mēsia. Oīra mai ki hāpī tātou i ruŋa i te Pipiria, mai kona hē a Ietū i oho mai ai e pe hē tōˈona huru.

 ¿MAI HĒ A IETŪ I OHO MAI AI?

10. ¿He aha te meˈe e hāpī ena te Pipiria o ruŋa o Ietū raˈe ki tōˈona turu mai ki ruŋa i te henua?

10 Te Pipiria e kī rō mai ˈā, rahi nō te matahiti noho o Ietū i ruŋa i te raŋi, raˈe ki tōˈona turu mai ki ruŋa i te henua. A Miqueas i kī rō, te Mēsia, mai te mahana o muˈa ˈā tōˈona ora iŋa (Miqueas 5:2). Ko rahi ˈā te kī o Ietū pe nei ē, i ruŋa i te raŋi a īa e noho era, raˈe ki tōˈona poreko i ruŋa i te henua (Ka taiˈo Juan 3:13; 6:38, 62; 17:4, 5). E i raˈe ki tōˈona turu mai ki ruŋa i te henua e hāhine rahi rō ˈā ki te ˈAtua.

11. ¿O te aha a Ietū he poki haŋa rahi a Iehoha?

11 A Ietū he poki haŋa rahi a Iehoha. ¿O te aha? O te ai ko īa te meˈe i aŋa raˈe e te ˈAtua ki te taˈatoˈa meˈe. Oīra e kī ena ko Ietū “te atariki o te meˈe aŋa tahi era” * (Colosenses 1:15). A Ietū takoˈa he poki haŋa rahi a Iehoha o te ai āˈana i aŋa hokotahi nō, oīra e kī ena poki aŋa e īa mau nō (Juan 3:16). Ko Ietū mau nō te kope i hāˈūˈū ki te ˈAtua mo aŋa i te meˈe taˈatoˈa (Colosenses 1:16). Ki a Ietū nō e raŋi ena te Vānaŋa, o te ai ki a īa a Iehoha e uŋa era te roŋo e i te vānaŋa, mo vaˈai ki te merahi e ki te taŋata (Juan 1:14).

12. ¿Pe hē tātou e aŋi-aŋi nei a Ietū e te ˈAtua taˈe ko tū kope ˈā?

12 Kē nuˈu e manaˈu ena pe nei ē, te ˈAtua e ko Ietū ko tū kope ˈā. Taˈe ko te meˈe nei te meˈe hāpī e te Pipiria. Te Pipiria e kī rō ˈā i ai rō e tahi kope i aŋa i a Ietū, te haˈauraˈa o te meˈe nei, i ai rō te haˈamata o Ietū. E a Iehoha, te kope aŋa tahi era i te meˈe taˈatoˈa, ˈina ōˈona haˈamata (Salmo 90:2). Pahe poki o te ˈAtua a Ietū ˈina kai  manaˈu e ˈina kai tute mo riro a īa he ˈAtua. Te Pipiria ko hāpī riva-riva mai ˈā, ata hau te nui-nui o te matuˈa ki te poki (Ka taiˈo Juan 14:28; 1 Corintios 11:3). Ko Iehoha nō te ˈAtua mana pūai (Génesis 17:1). Ko Īa te ata nui-nui e te kope ata pūai o te ao taˈatoˈa. (Ka taiˈo te Kona 14 mo ata hāpī.)

13. ¿O te aha te Pipiria e kī ena te huru o Ietū “pahe huru mau ˈā o te ˈAtua e taˈe tikeˈa nei e tātou”?

13 Rahi nō te matahiti a Iehoha e tāˈana poki era ko Ietū, i aŋa ai hokorua nō, raˈe ki te aŋa te raŋi e i te henua. A Iehoha e haŋa raŋi rō ˈā ki a Ietū e peira ˈā Ietū ki a Iehoha (Juan 3:35; 14:31). A Ietū i haka tere rō i a īa a te huru era o tōˈona matuˈa, oīra te Pipiria e kī ena “tōˈona huru, pahe huru mau ˈā o te ˈAtua e taˈe tikeˈa nei e tātou” (Colosenses 1:15).

14. ¿Pe hē te poki haŋa rahi a Iehoha i riva ai mo poreko pahe taŋata?

14 Te poki haŋa rahi a Iehoha i haŋa rō mo haka rē tōˈona kona noho i ruŋa i te raŋi e mo poreko pahe taŋata i ruŋa i te henua. ¿Pe hē i tuˈu ai rā meˈe? Hai tōˈona mana pūai, a Iehoha i haka tupu ai i tāˈana poki, i roto i te manava o te neru judia e tahi te ˈīŋoa ko Māria. Oīra taˈe o te matuˈa tane taŋata i haka tupu i a Ietū. E o te ai peira, i poreko ai mai a Māria i te poki hara kore e tahi, e he nape e īa ko Ietū (Lucas 1:30-35).

¿PE HĒ TE HURU O IETŪ?

15. ¿Pe hē koe ana aŋi-aŋi riva-riva i a Iehoha?

15 Rahi nō te meˈe āˈau mo hāpī o ruŋa o Ietū, he aha tāˈana meˈe i aŋa, he aha tāˈana meˈe i hāpī e pe hē tōˈona huru, hai taiˈo te puka era o Mateo, Marcos, Lucas e Juan mai ruŋa i te Pipiria. He Evaneria e kī ena ki te ŋā puka nei. O te ai te huru o Ietū pē tōˈona matuˈa tane ˈā, taˈa  meˈe ka taiˈo ena he hāˈūˈū takoˈa atu mo aŋi-aŋi riva-riva ōˈou i a Iehoha. Oīra a Ietū i riva ai mo kī: “Te kope tikeˈa era i a au, ko tikeˈa takoˈa ˈā i te Matuˈa” (Juan 14:9).

16. ¿He aha te meˈe a Ietū i hāpī? ¿ˈAˈai te meˈe hāpī era e Ietū?

16 Rahi nō te taŋata e raŋi era ki a Ietū “Maˈori” (Juan 1:38; 13:13). Te meˈe hopeˈa o te nui-nui i aŋa ai e īa, he hāpī o ruŋa i te parau ˈāpī o te haka tere o te ˈAtua. ¿He aha te haka tere nei? He haka tere o te ˈAtua ka ˈariki tahi era i te henua taˈatoˈa mai ruŋa i te raŋi, e he vaˈai i te hauhaˈa riva ki te taŋata haka roŋo ki te ˈAtua (Mateo 4:23). Taˈatoˈa meˈe hāpī a Ietū mai a Iehoha i oho mai ai. A Ietū i kī: “Te meˈe hāpī nei e au, taˈe āˈaku, o te kope uŋa mai era i a au” (Juan 7:16). Ko ˈite era ˈā a Ietū pe nei ē, ko haŋa ˈā Iehoha mo haka roŋo te taŋata i te parau ˈāpī riva-riva o ruŋa i te haka tere o te ˈAtua ka ˈariki era te henua taˈatoˈa.

17. ¿I hē a Ietū e hāpī era? ¿He aha a īa e ito-ito era mo hāpī ki te tahi?

17 ¿I kona hē a Ietū e hāpī era? I te taˈatoˈa kona e ravaˈa era i te taŋata. I te rauhuru kona e hāpī era, i ˈuta, i tai, i te kona hoˈo i te kai, i te hare o te taŋata, i te hare pure o te judio. ˈIna a īa kai tiaki mo oho te taŋata ki a īa, āˈana te oho te kimi i te taŋata (Marcos 6:56; Lucas 19:5, 6). A īa e aŋa era mai te pōˈā ki te pō hai ito-ito mo hāpī ki te taŋata. ¿O te aha i aŋa ai peira? O te ai ko ˈite ˈā, ko te meˈe nei te meˈe haŋa o te ˈAtua mo aŋa ōˈona, e takoˈa a īa meˈe haka roŋo nō ki tōˈona matuˈa (Juan 8:28, 29). A Ietū i vānaŋa takoˈa rō o ruŋa i te ˈAtua o te ai e haka ˈaroha rō ˈā i te taŋata (Ka taiˈo Mateo 9:35, 36). A Ietū ko haŋa ˈā mo hāpī ki te rahi o te taŋata te parau ˈāpī riva-riva, o te ai ko tikeˈa ˈā e īa, te pūˈoko haka tere o te hare pure o rā hora, ˈina he hāpī te parautiˈa o ruŋa i te ˈAtua e o ruŋa i tōˈona haka tere.

18. ¿Ko huru hē te huru o Ietū ata haŋa āˈau?

 18 A Ietū e here rō ˈā ˈe e tapa rō ˈā i te taŋata. A īa he kope riva e meˈe taˈe roa mo vānaŋa ki a īa. Ata ki te ŋā poki e haŋa era mo hāhine ki a īa (Marcos 10:13-16). Takoˈa he taŋata haka tere titīka a īa. He enemī mau ōˈona te toke-toke e te aŋa titīka kore (Mateo 21:12, 13). Hora noho era o Ietū i ruŋa i te henua, te taŋata ˈina he tapa e ˈina he moˈa i te ŋā viˈe. E a Ietū meˈe tapa nō i te ŋā viˈe ˈe e moˈa takoˈa rō ˈā i a rāua (Juan 4:9, 27). A Ietū ˈina he haka nui-nui i a īa. Ko haka tikeˈa ˈā e īa i te meˈe nei, hora tata era i te vaˈe o tōˈona repahoa, e te aŋa nei o te tāvini te aŋa (Juan 13:2-5, 12-17).

I te taˈatoˈa kona e ravaˈa era i te taŋata e hāpī era e Ietū ki a rāua

19. ¿Pe hē a Ietū i haka tikeˈa ai tōˈona haŋa mo hāˈūˈū i te taŋata e o te aha i aŋa ai peira?

19 Ko ˈite era ˈā Ietū hē te meˈe tano mau mo te taŋata e ko haŋa ˈā mo hāˈūˈū i a rāua. Peira i haka tikeˈa ai, i te hora haka ora era i te maiūi o te taŋata hai mana o te ˈAtua (Mateo 14:14). Mo haˈauraˈa atu, e tahi mahana te taŋata repera e tahi, he hāhine ki a īa e he kī: “Mo haŋa nō ōˈou, e riva nō mo haka maitaki mai”. A Ietū i ŋaroˈa rō te mamāe o te taŋata nei e i haka ˈaroha rō i a īa, e ko haŋa ˈā mo hāˈūˈū i a īa. Oīra a Ietū i haka toro ai tōˈona rima e he haka puā e he kī: “¡Ko haŋa a au! Ka maitaki koe.” E te kope maiūi era, he ora rō ai (Marcos 1:40-42). ¡Ka manaˈu rā koe he aha te meˈe i ŋaroˈa tū taŋata era!

A ĪA I HAKA ROŊO RŌ KI TŌˈONA MATUˈA TANE

20, 21. ¿Pe hē a Ietū i haka tikeˈa mai ai tōˈona haka roŋo ki te ˈAtua ki te hora hopeˈa?

20 Hai tōˈona huru haka tere a Ietū i haka tikeˈa mai ai, ko īa te kope hopeˈa o te haka roŋo ki te ˈAtua. No atu te meˈe mo piri ki a īa e te meˈe rake-rake aŋa e te nuˈu taˈe haŋa era ki a īa, a īa i haka roŋo rō ki tōˈona matuˈa. Mo haˈauraˈa atu, ˈina a Ietū kai hara hora haka atu era e te Tātane i a īa  (Mateo 4:1-11). I ai takoˈa rō tōˈona huaˈai ˈina kai tapa ko īa te Mēsia, e ko kī ˈā tōˈona maˈa-maˈa, no atu rā meˈe i aŋa i oho nō a Ietū te aŋa o te ˈAtua (Marcos 3:21). No atu te rave ˈino o te taŋata i a īa, i aŋa tahi rō e Ietū te meˈe uŋa era e tōˈona matuˈa, e ˈina a īa kai haŋa mo aŋa i te meˈe rake-rake i ruŋa i rā ŋā nuˈu (1 Pedro 2:21-23).

21 No atu te rahi o te mamāe e te rake-rake o tōˈona mate, ko te haka roŋo iŋa ˈā a Ietū ki a Iehoha (Ka taiˈo Filipenses 2:8). Ka haka topa rā tuˈu manaˈu pe hē a īa i haka ˈuhu ai i te mahana era o tōˈona mate. Ko maˈu ˈā ko puru ˈā, te taŋata reo-reo ko kī ˈā ko vāvā a īa ki te ˈAtua, te pūˈoko haka tere o rā hora ko haka ūtuˈa ˈā i a īa, te nuˈu e haka meˈe-meˈe rō ˈā i a īa e te vaˈe hau ko toˈo ˈā, ko tiaŋi ˈā ko rave ˈino ˈā e ko veo ˈā i ruŋa i te pou. Hora era ko oho ˈā  mo mate he ohu e īa: “¡Ko mao ˈā te aŋa!” (Juan 19:30). I te toru mahana o tōˈona mate, he haka ora haka ˈou e Iehoha pahe kuhane (1 Pedro 3:18). I tano era te tapati he hoki haka ˈou a Ietū ki ruŋa i te raŋi e he noho a te pāˈeŋa mataˈu o te ˈAtua e he tiaki te hora mo haka ˈariki e te ˈAtua i a īa (Hebreos 10:12, 13).

22. ¿He aha te tātou rāveˈa mo ravaˈa o te haka roŋo o Ietū ki tōˈona mate iŋa?

22 O te ai a Ietū i haka roŋo rō ki tōˈona matuˈa ki tōˈona mate iŋa, e ai rō ˈā te rāveˈa o tātou i te hora nei, mo ora ki te hopeˈa raˈa i ruŋa i te henua nehe-nehe, pahe meˈe haŋa era a Iehoha mai muˈa ˈā. I te hāpī 5 he vānaŋa tātou pe hē te mate o Ietū e vaˈai mai ena i te rāveˈa mo ora ki te hopeˈa raˈa.

^ párr. 7 Te haˈauraˈa o te tiaraˈa d.C. he matahiti mai te poreko o Ietū pē muˈa e a.C. he matahiti raˈe ki te poreko o Ietū.

^ párr. 11 Ki a Iehoha e raŋi ena he Matuˈa o te ai āˈana i aŋa i te meˈe taˈatoˈa (Isaías 64:8). Ki a Ietū e raŋi ena he poki o te ˈAtua o te ai a Iehoha i aŋa i a īa. Ki te merahi e ki a Atamu e kī takoˈa rō ˈā he ŋā poki o te ˈAtua (Job 1:6; Lucas 3:38).