Saltar al contenido

Saltar al menú secundario

Haka hoki ki te kona ha'amata o te puka

Taŋata haka ˈite o ruŋa o Iehoha

rapa nui

Mo hāpī ki taˈa ŋā poki

 KAU 1

He ˈaˈamu e tahi haŋa e tātou mo aŋi-aŋi

He ˈaˈamu e tahi haŋa e tātou mo aŋi-aŋi

¿Ko ˈaˈamu atu ˈā tuˈu hoa i te meˈe e tahi mo taˈe kī ki te rua?... * I ruŋa i te Puka o te ˈAtua e ai rō ˈā e tahi ˈaˈamu taˈe ˈite e te rahi o te taŋata. Te ˈaˈamu nei he ˈaˈamu hopeˈa o te nui-nui o te ai mai te ˈAtua i oho mai ai. Mai muˈa ˈā nuˈu taˈe rahi te nuˈu ˈite o ruŋa i te ˈaˈamu nei. Te merahi takoˈa ko haŋa era ˈā mo ˈite o ruŋa i nei ˈaˈamu. ¿Haŋa rō koe mo ˈite o ruŋa i te ˈaˈamu nei?...

¿He aha te meˈe haŋa era o te merahi mo ˈite?

Rahi nō te matahiti a tuˈa, te ˈAtua i aŋa ai te taŋata e i te viˈe raˈe. ¿Ko ai te rāua ˈīŋoa?... Ko Atamu koīa ko Eva. A rāua i te henua nehe-nehe e noho era, ko Edén toˈona ˈīŋoa. ¡Te Tau o nei kona! O te ˈAtua i aŋa peira mo noho o rāua. Te haŋa o te ˈAtua, mo aŋa e rāua koīa ko te rāua ŋā poki, te henua taˈatoˈa pahe kona tau e tahi, pē Edén ˈā. Toˈona haŋa he noho tahi i ruŋa i te henua tau nei mo ora mo oho rō ai, e ˈina e ko mate. ˈIna rā meˈe kai tuˈu peira, ¿O te aha?

O te ai kai haka roŋo a Atamu koīa ko Eva ki te ˈAtua, oīra tātou e taˈe noho nei i ruŋa i te henua nehe-nehe. No atu nei meˈe, ko kī ˈā e te ˈAtua, nā he tano te mahana he riro haka ˈou te henua he kona nehe-nehe e tahi. Taˈatoˈa taŋata ka noho era i ruŋa, he koa tahi e ˈina e ko mate. ¿Pe hē ka aŋa ena nei meˈe e te ˈAtua? Mai muˈa ˈā ˈina e tahi taŋata i ˈite pe hē te ˈAtua ka aŋa era nei meˈe, o te ai kai haka ˈite e te ˈAtua i te haˈauraˈa o te ˈaˈamu nei.

I turu mai era Ietū ki ruŋa i te henua, he ata hāpī ki te taŋata o ruŋa i te ˈaˈamu nei. A Ietū i kī, te ariki o te ˈAtua, he ariki te henua taˈatoˈa, e mo nei ariki e aŋa mo riro te henua pahe kona nehe-nehe e tahi. A Ietū i hāpī takoˈa rō mo nonoˈi tātou ki te ˈAtua mo tuˈu mai rā hora.

¿E haŋa rō koe mo noho i ruŋa i te henua tuˈu pe nei?... E uˈi o rehu rō, mo te taŋata haka roŋo ki te ˈAtua nō, e noho i ruŋa i te henua nehe-nehe nei. Te Puka o te ˈAtua he ˈaˈamu mai o ruŋa i te rahi o te taŋata e ŋā viˈe i haka roŋo ki te ˈAtua. I ruŋa i te puka iti-iti nei, he hāpī tātou ko ai a rāua e pe hē tātou ana riva mo tuˈu pē rāua ˈā. ¿Haŋa rō koe mo ˈite ko ai a rāua?...

MAI KI TAIˈO I RUŊA I TE PUKA O TE ˈATUA:

  • Marcos 4:11

  • 1 Pedro 1:12

  • Génesis 1:26-28; 2:8, 9; 3:6, 23

  • Mateo 6:9, 10

  • Salmo 37:11, 29

^ párr. 3 Ka taiˈo ka oho ena koe i te puka iti-iti nei he tikeˈa koe e toru tuki (...) i muri i te rauhuru ˈui. Ki ˈoti te taiˈo i rā ŋā ˈui, ka tiaki iti e ka haˈatiˈa mo pahono atu taˈa poki.