Saltar al contenido

Saltar al menú secundario

Haka hoki ki te kona ha'amata o te puka

Taŋata haka ˈite o ruŋa o Iehoha

rapa nui

Mo hāpī ki taˈa ŋā poki

 KAU 10

A Ietū he taŋata haka roŋo

A Ietū he taŋata haka roŋo

¿Meˈe aŋa rahi mo haka roŋo ki a koro e ki a nua?... Peaha ko tuˈu ˈā te mahana kai haŋa koe mo haka roŋo ki a rāua. E ¿Ko ˈite ˈā koe he aha te meˈe mo haˈūˈū atu mo haka roŋo ˈoˈou? Ka uˈi koe a ruŋa i a Ietū. ¿Ko ˈite ˈā koe meˈe haka roŋo nō a īa ki a Iehoha e ki toˈona matuˈa?... Mai ki hāpī tātou o ruŋa i a Ietū.

Raˈe ki te turu mai ki ruŋa i te henua, a Ietū i ruŋa i te raŋi e noho era i muri i toˈona matuˈa ko Iehoha. I ai takoˈa rō te matuˈa o Ietū i ruŋa i te henua, te ˈīŋoa o rāua ko José e ko María. ¿Ko ˈite ˈā koe pe hē a rāua i riro ai he matuˈa o Ietū?...

A Iehoha ko toˈo ˈā i a Ietū e ko haka tupu ˈā i roto i a María e peira i poreko ai i ruŋa i te henua. Te meˈe nei i aŋa ai hai mana o te ˈAtua. I tupu era Ietū i roto i a María, he nui-nui he oho pahe ŋā poki taˈatoˈa. I tano era te iva avaˈe he poreko. Peira i riro ai a José rāua ko María he matuˈa o Ietū i ruŋa i te henua.

E 12 nō matahiti o Ietū i oho ai koīa ko toˈona huaˈai ki Jerusalén ki te ŋoŋoro e tahi o te ˈAtua. I te hoki iŋa mai ki te rāua hare mai tū ŋoŋoro era, he ŋaro a Ietū. He eˈa ia he kimi e José rāua ko María e ˈina kai ravaˈa. ¿He aha a Ietū i ŋaro ai? O te ai ko aŋa ˈā e tahi meˈe mo haka tikeˈa i te rahi o toˈona here ki toˈona matuˈa o ruŋa i te raŋi ko Iehoha. ¿I hē a Ietū koe e manaˈu ena?...

¿O te aha a Ietū i oho ai ki te Hare o te ˈAtua?

I tahuti a José rāua ko María ki Jerusalén mo kimi i a Ietū i te taˈatoˈa kona. A rāua ko tipa-tipa ˈā i te taˈe ravaˈa i a īa. I tano era ka toru mahana o te kimi, he ravaˈa i roto i te Hare o te ˈAtua. ¿Ko ˈite ˈā koe o te aha i oho ai a Ietū ki ˈira?... I ˈira a īa e riva era mo ata ˈite o ruŋa i toˈona Matuˈa ko Iehoha. Oīra i noho ai i rā kona. A īa e here rahi rō ˈā ki a Iehoha e ko haŋa ˈā mo ata ˈite pe hē ana haka koa i a Īa. Takoˈa, i paˈari i oho era a Ietū, ko te haka roŋo haŋa ˈā ki a Iehoha. No atu te aŋa rahi e i te aŋa rake-rake aŋa e te taŋata i ruŋa i a īa, i haka roŋo rō a Ietū ki toˈona matuˈa ko Iehoha. ¿I haka roŋo takoˈa rō ki a José rāua ko María?... E ē, te Puka o te ˈAtua e kī rō ˈā e ē.

¿He aha te meˈe o tātou mo hāpī o ruŋa o Ietū?... Ko hāpī mai ˈā i te meˈe nui-nui e tahi: e haka roŋo ki a nua e ki a koro, no atu te aŋa rahi mo haka roŋo. ¿E aŋa takoˈa rō koe peira?...

MAI KI TAIˈO I RUŊA I TE PUKA O TE ˈATUA:

  • Lucas 1:30-35; 2:45-52

  • Efesios 6:1

  • Hebreos 5:8